ចូលចិត្តព័ត៌មាន “Hello គ្រូពេទ្យ” សូមចូលរួមស្ទង់មតិនៅទីនេះ។ មតិអ្នកទាំងអស់គ្នា ពិតជាមានតម្លៃសម្រាប់ “Hello គ្រូពេទ្យ” អាចកែលម្អព័ត៌មានឲ្យកាន់តែប្រសើរ!
មាតិកា
ម៉ាក់ប៉ាឆ្ងល់អត់ ហេតុអីបានកូនកើតមកក្ដាប់ដៃជាប់យូរ?
បន្ទាប់ពីអាអូនកើតរួចមក ក្រៅពីសម្គាល់ពីរបៀបរបបម៉ោងញ៉ាំ ម៉ោងគេងរបស់អាអូន មានម៉ាក់ប៉ាមួយចំនួនសង្កេតឃើញថា ដៃរបស់កូនចេះក្ដាប់ជាប់រហូត ពេលខ្លះបែកញើសនៅប្រអប់ដៃទៀត។ ចុះហេតុអីបានជាកូនទើបកើតចេះតែក្ដាប់ដៃជាប់ មិនព្រមលាសោះ?
បើតាមការបកស្រាយរបស់លោកវេជ្ជបណ្ឌិត ចាន់ ស៊ីណេត ប្រធានផ្នែកសម្ភព និងរោគស្ត្រីនៃមន្ទីរពេទ្យមិត្តភាពកម្ពុជា-ចិន ទារកក្ដាប់ដៃជាប់ភាគច្រើនមិនមែនជារោគសញ្ញាអ្វីមួយដែលយើងគួរឲ្យបារម្ភទេ ហើយការក្ដាប់ដៃជាប់របស់ទារកក៏អាចបណ្ដាលមកពីប៉ុន្មានកត្តាខាងក្រោមនេះដែរ៖
១.Palmar Grasp Reflex (រ៉េហ្វ្លិចក្នុងការចាប់របស់ទារក)
ទារកមានរ៉េហ្វ្លិចក្នុងការចាប់ខ្លាំង ដែលមិនអាចឲ្យអាអូនលាដៃបាន។ បើយើងឲ្យកូនកាន់ ឬដាក់ម្រាមដៃយើងឲ្យកូនកាន់ យើងនឹងឃើញថា កូននឹងកាន់ដៃយើងជាប់មិនលែង។
២.ពិការភាពខួរក្បាល(Cerebral Palsy)
ពិការភាពខួរក្បាលអាចជាកត្តាមួយបណ្ដាលឲ្យទារកក្ដាប់ជាប់រាល់ពេល។ ក្នុងករណីដែលទារកក្ដាប់ដៃជាប់រហូត ហើយរាងកាយកូនក៏រឹង វាអាចជាសញ្ញាបញ្ហាប្រព័ន្ធសរសៃប្រសាទដែលខួរក្បាលទារកពិបាកក្នុងបញ្ជាសាច់ដុំផ្សេងៗ ។
៣.Vestigial Primitive Reflex
អាអូនអាចមិនទម្លាប់នឹងបរិយាកាសខាងក្រៅនៅឡើយ ព្រោះពេលដែលទារកនៅក្នុងពោះ អាអូនមានទម្រង់ក្ដោបចូលគ្នា (ដៃក្ដោប ហើយជើងបត់មកដាក់ជិតខ្លួន)។ ទម្រាំតែកូនអាចលាដៃធម្មតាបាន គឺត្រូវចំណាយពេលរាប់សប្ដាហ៍ឯណោះ។
ជាទូទៅ ទារកទើបនឹងកើតក្ដាប់ដៃតែរយៈពេលប៉ុន្មានខែក្រោយកើតប៉ុណ្ណោះ ហើយពេលដែលអាអូនមានអាយុ ៣-៤ខែ កូននឹងចាប់ផ្ដើមលាដៃមកធម្មតាវិញ ដោយសារប្រព័ន្ធសរសៃប្រសាទរបស់កូនលូតលាស់រឹងមាំទៅៗ។ អាអូនក៏អាចចាប់ផ្ដើមឆោងយករបស់លេង ហើយពេលដែលកូនអាយុបាន ៦-៧ខែ អាអូននឹងរៀនចាប់កាន់របស់នេះនោះ រួចប្រលែងចេញវិញ។
ប៉ុន្តែ គ្រប់ទារកទាំងអស់មិនដូចគ្នា ទារកខ្លះលាដៃ ចេះកាន់របស់លឿន ខ្លះទៀតក៏យឺតទៅតាមពេលវេលា និងការលូតលាស់របស់កូន។ ផ្ទុយទៅវិញ ប្រសិនបើអាអូននៅតែក្ដាប់ដៃជាប់រហូត ពេលដល់អាយុ ៦-៧ខែហើយ ម៉ាក់ប៉ាអាចយកកូនទៅពិគ្រោះជាមួយគ្រូពេទ្យកុមារបាន។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
កំណែប្រែបច្ចុប្បន្ន
07/10/2020
អត្ថបទដោយ នាង សុខុមដាលីញ៉ា
ត្រួតពិនិត្យដោយ វេជ្ជ. ចាន់ ស៊ីណេត
បច្ចុប្បន្នភាពដោយ៖ ដេត ធន្នី
ត្រួតពិនិត្យដោយ
វេជ្ជ. ចាន់ ស៊ីណេត
ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម