ទារកតូចៗ គឺគួរឲ្យស្រលាញ់ណាស់ ដែលធ្វើឲ្យអ្នកគ្រប់គ្នាតែងតែក្រឺតក្នាញ់។ ជាមួយនឹងម្រាមដៃជើងតូចៗ ស្នាមញញឹមខ្ជូតៗ និងថ្ពាល់ក្រម៉ាប់ៗ យើងពិបាកនឹងហាមចិត្តខ្លួនឯងមិនឲ្យថើបទារកតូចៗទាំងនោះណាស់។ ពិតណាស់ ការថើបគឺជាវិធីសាស្ត្រមួយក្នុងការបង្ហាញពីក្ដីស្រលាញ់ ហើយវាមើលទៅហាក់ដូចជាពុំមានបង្កគ្រោះថ្នាក់នោះទេ។ ប៉ុន្តែ ដើម្បីសុវត្ថិភាពកូនតូច យើងចាំបាច់ត្រូវជៀសវាងការថើបទារកដែលទើបនឹងកើត។
១. ហេតុអី្វយើងមិនគួរថើបទារកដែលទើបនឹងកើត?
ជាទូទៅ ទារកទើបនឹងកើតមានប្រព័ន្ធភាពស៊ាំខ្សោយ ដែលទាមទារការថែទាំជាពិសេសសម្រាប់ពួកគេ នៅក្នុងអំឡុងពេលពីរបីសប្ដាហ៍ដំបូង។ ការប៉ះពាល់ទៅនឹងមេរោគ ក៏ដូចជាបាក់តេរីប្រភេទណាមួយ គឺអាចបង្កគ្រោះថ្នាក់ដល់អាយុជីវិតរបស់ពួកគេ។ សូម្បីតែមុនពេលប៉ះពាល់ ឬបីទារក ក៏ទាមទារឲ្យយើងត្រូវលាងសម្អាតដៃឲ្យបានស្អាតជាមុនសិនដែរ ពីព្រោះដៃរបស់យើងគឺជាប្រភពនៃភ្នាក់ងារបង្កមេរោគរាប់ពាន់។ ស្រដៀងគ្នានេះដែរ មុខរបស់យើងក៏គ្របដណ្ដប់ដោយមេរោគ រាប់ពាន់ នៅពេលដែលយើងថើប ហើយភ្នាក់ងារបង្ករោគទាំងនេះ នឹងត្រូវបានផ្ទេរទៅលើស្បែករបស់ទារកតូចៗជាក់ជាមិនខាន។
២. មេរោគអាចធ្វើឲ្យទារកមានគ្រោះថ្នាក់ដល់អាយុជីវិត
ជាក់ស្ដែង ទារកងាយនឹងប្រឈមជាមួយនឹងជំងឺរើមណាស់ ហើយជំងឺនេះ បណ្ដាលឲ្យមានដំបៅនៅជុំវិញមាត់ និងបបូរមាត់ចំពោះមនុស្សពេញវ័យ។ ពេលខ្លះ ជំងឺនេះមិនបង្ហាញរោគសញ្ញាជាក់លាក់ណាមួយចំពោះមនុស្សពេញវ័យនោះទេ ប៉ុន្តែវាអាចបណ្ដាលឲ្យទារកស្លាប់បាន។ វាត្រូវបានគេប៉ាន់ប្រមាណថា នៅអាយុ៤០ឆ្នាំ គ្នាយើងជាង៩០%បានប្រឈមទៅនឹងមេរោគជាក់លាក់នេះ និងអាចចម្លងទៅទារកដែលទើបនឹងកើតបានផងដែរ។ ទោះបីជានរណាម្នាក់ដែលមានមេរោគប្រភេទនេះ ប៉ះពាល់ដៃរបស់ទារក ហើយទារកយកដៃទៅញីភ្នែក ច្រមុះ ឬមាត់ ក៏មេរោគអាចរាលដាលទៅដល់ភ្នាសរម្អិលដែលនាំឲ្យមានការឆ្លងមេរោគទៅកាន់ទារកបានដូចគ្នា។ ដោយសារតែទារកមានប្រព័ន្ធភាពស៊ាំខ្សោយ មេរោគអាចកើនឡើងយ៉ាងឆាប់រហ័ស ដែលបណ្ដាលឲ្យមានការរលាកនៅក្នុងខួរក្បាល និងខួរឆ្អឹងខ្នងថែមទៀតផង។
៣. ប៉ាម៉ាក់គួរធ្វើយ៉ាងម៉េច?
នៅរយៈពេលពីរបីខែដំបូង គឺពិតជាមានសារសំខាន់ខ្លាំងណាស់ចំពោះទារក ដែលប៉ាម៉ាក់ត្រូវមានការប្រុងប្រយ័ត្នបន្ថែម។ យើងគួរតែឲ្យអ្នកដែលឈឺនៅឲ្យឆ្ងាយពីទារកតូចៗ។ បន្ថែមពីនេះ ប្រសិនបើនរណាម្នាក់ចង់ប៉ះពាល់ ឬកាន់ទារកដែលទើបនឹងកើត ចូរឲ្យពួកគេលាងសម្អាតដៃឲ្យបានត្រឹមត្រូវជាមុនសិន។ ការលាងសម្អាតដៃជាមួយនឹងទឹកលាងដៃ ក៏ជាមធ្យោបាយដ៏មានប្រសិទ្ធភាពមួយផងដែរ។ ដូចគ្នានេះដែរ នៅក្នុងរយៈពេលប៉ុន្មានខែដំបូង ចូរជៀសវាងនាំកូនទៅទីកន្លែងដែលមានមនុស្សច្រើន ក៏ដូចជាមិនគួរអនុញ្ញាតឲ្យមានភ្ញៀវច្រើនមកលេងផ្ទះរបស់យើងនោះឡើយ។
[embed-health-tool-vaccination-tool]
