ធម្មតា យើងគ្រប់រូបតែងតែចង់បង្កើតគ្រួសារកក់ក្ដៅមួយ តែមិនមែនគ្រាន់តែរៀបការហើយជាការស្រេចនោះទេ។ ដើម្បីកសាងបានគ្រួសារមួយ គឺយើងត្រួវគិតគូរចង់បានកូន និងត្រៀមខ្លួននឹងជីវិតជាម៉ាក់ប៉ា ប៉ុន្តែមុននឹងចង់បានកូន ប្ដីប្រពន្ធគ្រប់រូបគួរតែដឹងរឿងរ៉ាវ ៥ យ៉ាងនេះជាមុនសិន។ នេះបើតាមលោកវេជ្ជបណ្ឌិត សឿ ច័ន្ធវិសាល ឯកទេសផ្នែកសម្ភព និងរោគស្ត្រី។

ទី១. បុរស និងស្ត្រីគួរយកចិត្តទុកដាក់សុខភាព មុនពេលកំណត់ថា ត្រូវមានកូនដូចជា មានគីឡូសមស្រប (BMI) មិនជក់បារី កាត់បន្ថយគ្រឿងស្រវឹង ការហ្វេ ហាត់ប្រាណដើម្បីបង្កើននូវលទ្ធភាពដែលអាចមានកូន ទាំងនេះជាកត្តាសំខាន់ដែលប៉ះពាល់ដល់សុខភាពកូនពេលកើតមក។

គណនាថ្ងៃសម្រាលកូន

គណនាទម្ងន់ស្ត្រីអំឡុងពពោះ

ទី២. ពេលវេលាមាស (ពេលវេលាល្អបំផុត) ដើម្បីបង្កកំណើតក្នុង១ខែ មានចំនួន៦ថ្ងៃ គឺ៥ថ្ងៃមុននឹងថ្ងៃពងទុំ (អូវុលជ្រុះ) (មានន័យថា ពីថ្ងៃទី៩ ដល់ថ្ងៃទី ១៤ នៃរដូវ សម្រាប់វដ្ដរដូវទៀង ២៨ ថ្ងៃ) រួមភេទរាល់ថ្ងៃ ឬ២ថ្ងៃម្ដង និងបង្កើនឱកាសមានកូន។

ទី៣. អត្រាលទ្ធភាពមានកូនរបស់ស្ត្រីថយចុះទៅតាមអាយុ ដូច្នេះស្ត្រីព្យាយាមមានកូនឲ្យបានឆាប់កាន់តែល្អ។ ស្ត្រីអាយុក្រោម ៣០ ឆ្នាំមានឱកាសមានកូនតែ ២០% នៃខែនីមួយៗ។ ឱកាសមានកូននេះ នឹងថយចុះនៅសល់តែ ៥% ប៉ុណ្ណោះចំពោះស្ត្រីដែលមានអាយុ ៤០ឆ្នាំ។ ចំពោះស្ត្រីមានអាយុ ចាប់ពី ៤៥ឆ្នាំឡើង មានហានិភ័យរលូតកូនខ្ពស់ និងកូនអាចមានជំងឺអូទីស្សឹម។

ទី៤. ភាគច្រើនប្ដីប្រពន្ធ និងមានកូនក្នុងរង្វង់១ឆ្នាំក្រោយរៀបការរួច។ ប្រសិនបើ ១២ខែ (៦ខែ ចំពោះស្ត្រីអាយុ ៣៥ឆ្នាំឡើង) មិនមានកូន គួរទៅប្រឹក្សា ជាមួយវេជ្ជបណ្ឌិតឯកទេសរោគស្ត្រី និងសម្ភព វិបត្តិអត់កូន ដើម្បីព្យាបាល។

ទី៥. ការព្យាបាលវិបត្តិអត់កូនដោយការចិញ្ចឹមកូនក្នុងកែវ (IVF) អត្រាជោគជ័យអាចមានកូនបានតែ៣០% សម្រាប់ស្ត្រីអាយុក្រោម៣៥ឆ្នាំ និងបានតែ ១០% ចំពោះស្ត្រីអាយុពី៤០-៤៤ឆ្នាំ និងចំពោះស្ត្រីអាយុ៤៥ឆ្នាំ ឡើង ការព្យាបាលដោយ IVF លទ្ធភាពមានកូន គឺស្ទើរតែគ្មានទាល់តែសោះ។

បន្ថែមពីលើនេះ លោកវេជ្ជបណ្ឌិតបន្តថា ការព្យាបាលវិបត្តិអត់កូនអាចជួយឲ្យស្ត្រីដែលគ្មានស្វាមី អាចមានឱកាសធ្វើជាម្ដាយបាន។ ហេតុនេះហើយ នៅពេលចង់បានកូន កសាងគ្រួសារតូច ឬធំ ប្តីប្រពន្ធគួរតែពិនិត្យមើលទៅលើប៉ុន្មានចំណុចដែលបានរៀបរាប់ខាងលើនេះ និងពិគ្រោះជាមួយអ្នកជំនាញផ្នែកសម្ភព ដើម្បីមានកូនដោយរលូន គ្មានបញ្ហាណាមួយកើតឡើង។

អត្ថបទគួរអាន៖

ប្ដីប្រពន្ធថ្មីថ្មោងត្រូវដឹង ៥ ចំណុចនេះ ពេលចង់បានកូន