រាងកាយ​របស់​ស្ត្រីចាប់ផ្ដើមប្រែប្រួល បូករួមទាំងទម្ងន់ក៏ចាប់ផ្ដើមកើនឡើងដែរ ព្រោះម៉ាក់ៗកំពុងមានជីវិតម្នាក់ទៀតក្នុងផ្ទៃ។ ដូច្នេះត្រូវច្បាស់ថា ម៉ាក់ត្រូវញ៉ាំអាហារបានគ្រប់គ្រាន់ បូករួមទាំង​ជីវជាតិពី​អាហារូបត្ថម្ភចាំបាច់នានា សម្រាប់​ការ​លូតលាស់​របស់​កូន។ ទម្ងន់របស់ស្ត្រីមានផ្ទៃពោះ មិន​មាន​ខ្នាត​ជាក់លាក់ទេ ប៉ុន្តែវាអាស្រ័យទៅលើទម្ងន់របស់ម៉ាក់ផ្ទាល់ មុន​ចាប់​ផ្ដើម​មាន​ផ្ទៃពោះ។ ដោយឡែក ករណី​ស្ត្រី​មាន​មាឌតូចល្អិត ឬ​ស្គម​មិនគ្រប់គីឡូមុនពពោះ គួរ​តែ​ចាំបាច់ឡើងគីឡូ​ច្រើនជាង​អ្នកមានរាងកាយ​ធម្មតា ឬ​អ្នក​ដែល​មាន​គីឡូ​លើស។ ដើម្បី​សុវត្ថិភាព ការលូតលាស់​របស់​គភ៌​ដោយស្ដង់ដារ​ត្រឹមត្រូវតាមក្បួនខ្នាតមិនបង្កហានិភ័យ ដល់ម្ដាយនិងកូន សូម​បន្តតាមដាន​គីឡូ​ដែល​ម៉ាក់ឡើង​ជា​ប្រចាំ។

ក្រៅពី​ការ​ឡើងគីឡូ​របស់​ម៉ាក់ មាន​ចំណុចមួយចំនួនទៀតដែលកើតឡើង​ចំពោះម៉ាក់ៗ ជាពិសេសផ្នែកខាងក្នុងដូចជា៖

• ការកើនឡើងចរន្តឈាមបណ្តាឲ្យមុខក្រហមនិងស្រាលក្បាល
• ស្បូនរីកនាំឲ្យក្បាលពោះរីកធំឡើងៗ
• សុដន់ប្រែប្រួលគឺជាសញ្ញានៃការផលិតទឹកដោះ
• ទល់លាមកនិង ក្រហាយទ្រូង

ធម្មតា​រាងកាយម៉ាក់​ធ្វើការ​និង​បញ្ចេញ​ថាមពល​ច្រើនដើម្បី​សុវត្ថិភាព​របស់​គភ៌ និង​បំពេញ​រាល់​ការ​វិវត្តន៍​នានា​ក្នុង​ស្បូន​ម៉ាក់។

ការឡើងគីឡូ ឬទម្ងន់​ត្រឹមត្រូវក្រោម​ការណែនាំ​គឺអាស្រ័យទៅតាម​លទ្ធផល​កម្រិត​ BMI របស់​ម៉ាក់​ផ្ទាល់ ដោយបែងចែកជា ៣កម្រិត​ផ្សេងគ្នា៖

• លទ្ធផល​ទាបជាង ១៨,៥ មានន័យ​ថា​កម្រិត​BMI ទាប
• លទ្ធផល​ចន្លោះពី ១៨,៥ ទៅ ២៤,៩ មានន័យថា​BMI ល្អធម្មតា
• លទ្ធផល​២៥ ឬ​លើស​នេះ មានន័យ​ថា​ BMI ខ្ពស់