ទារកទើបកើតមិនទាន់ស៊ាំទៅនឹងមុខងារផ្សេងៗនៃរាងកាយរបស់ពួកគេនៅឡើយ។ ដូច្នេះហើយ ទារកមួយចំនួនអាចនឹងយំនៅពេលពួកគេបន្ទោបង់ ពីព្រោះតែអាអូនមានអារម្មណ៍ចម្លែក។ យ៉ាងណាមិញ ពេលខ្លះ ទារកអាចយំនៅពេលបន្ទោបង់បណ្ដាលមកពីការឈឺចាប់ ឬបញ្ហាក្រពះជាដើម។

ប្រសិនបើទារកតែងតែយំនៅពេលបន្ទោបង់ ម៉ាក់ៗគប្បីសង្កេតមើលរោគសញ្ញាបន្ថែម ដើម្បីកំណត់ឲ្យបានច្បាស់អំពីមូលហេតុ ក៏ដូចជាស្វែងរកការព្យាបាលដ៏សមស្រប។

១. ទទួលអារម្មណ៍នៃការបន្ទោបង់

ប្រសិនបើអាអូនយំនៅពេលបន្ទោបង់នៅប៉ុន្មានថ្ងៃដំបូង វាអាចដោយសារតែពួកគេកំពុងតែសម្របខ្លួនទៅនឹងអារម្មណ៍នៃការបន្ទោបង់។ ម្យ៉ាងវិញទៀត វាក៏អាចមកពីសាច់ដុំពោះរបស់ទារកនៅមិនទាន់លូតលាស់នៅឡើយ ដែលពិបាកឲ្យលាមកឆ្លងកាត់។ បញ្ហានេះគឺជារឿងធម្មតា ហើយម៉ាក់ៗក៏មិនចាំបាច់បារម្ភដែរ ពីព្រោះពួកគេនឹងស៊ាំចំពោះរឿងនេះក្នុងពេលឆាប់ៗមិនខាន។

២. ទល់លាមក

ទារកតូចៗក៏អាចប្រឈមនឹងការទល់លាមកដូចគ្នា ដែលធ្វើឲ្យពួកគេយំនៅពេលបន្ទោបង់។ ប្រសិនបើទារកបន្ទោបង់ពិបាក និងមិនទៀងទាត់ ពួកគេអាចនឹងមានបញ្ហាទល់លាមក។ សញ្ញាទូទៅដែលបញ្ជាក់ថាទារកទល់លាមក៖

មួម៉ៅ
ក្អែល
លាមករឹង និងស្ងួត
មានការឈឺចាប់នៅពេលបន្ទោបង់
ឈឺពោះ និងហើមពោះ
បន្ទោបង់តិចជាង៣ដងក្នុងមួយសប្ដាហ៍

៣. ការពិបាកក្នុងការបន្ទោបង់ (Infant dyschezia)

ស្ថានភាពនេះ គឺនៅពេលដែលទារកយំលើសពី១០នាទី មុនពេលបន្ទោបង់។ មុខរបស់ទារកអាចប្រែទៅជាពណ៌ក្រហម ឬស្វាយ រហូតដល់ពេលលាមកទន់ ឬរាវឆ្លងកាត់។ បញ្ហានេះគឺជារឿងធម្មតា និងកើតឡើងជាទូទៅ ហើយវានឹងបាត់ទៅវិញបន្ទាប់ពីរយៈពេលពីរបីសប្ដាហ៍។

៤. ការប្រេះរន្ធគូទ

ក្នុងករណីដែលអាអូនមានអាការៈទល់លាមករ៉ាំរ៉ៃ ពួកគេអាចនឹងវិវត្តទៅជាការប្រេះរន្ធគូទ ដោយមានការដាច់រលាតតូចមួយនៃស្បែកក្នុងស្រទាប់នៃរន្ធគូទ ឬចង្អូរគូទ ដែលបណ្ដាលមកពីការបន្ទោបង់លាមករឹង។

៥. ការចុកពោះ

អាការៈចុកពោះប៉ះពាល់ដល់ទារកប្រមាណ១០%ទៅ៤០% និងកើតឡើងភាគច្រើននៅពេលដែលទារកមានអាយុប្រហែល៦សប្ដាហ៍។ ទារកអាចនឹងយំខ្លាំង ប្រសិនបើពួកគេចុកពោះ។ រោគសញ្ញាផ្សេងទៀតរួមមាន លាមកមានឈាម មានហ្គាសច្រើន និងឈឺចាប់នៅពេលបន្ទោបង់ កន្ទួលរមាស់ស្បែក និងក្អួត។

ជុះយំ២

ប៉ាម៉ាក់គួរបារម្ភនៅពេលណា?

ការយំតិចតួច និងម្ដងម្កាល នៅពេលបន្ទោបង់គឺជារឿងធម្មតាប៉ុណ្ណោះសម្រាប់ទារក។ ប៉ុន្តែ ប្រសិនបើកូនយំខ្លាំង អំឡុងពេលបន្ទោបង់ មានអាការៈគ្រុនក្ដៅ ពិបាកក្នុងការបំបៅដោះ និងលាមកមានឈាម ប៉ាម៉ាក់គប្បីនាំកូនទៅជួបជាមួយនឹងគ្រូពេទ្យ។

តិចនិកជួយឲ្យទារកឈប់យំ នៅពេលបន្ទោបង់

ប៉ាម៉ាក់អាចអនុវត្តតិចនិកមួយចំនួនខាងក្រោមនេះ ដើម្បីជួយបំបាត់ការឈឺចាប់របស់ទារក និងកុំឲ្យពួកគេយំ នៅពេលបន្ទោបង់។

ប្រសិនបើអាអូនបៅទឹកដោះម្ដាយ ម៉ាក់ៗគប្បីផ្លាស់ប្ដូររបបអាហាររបស់ខ្លួន ដើម្បីឲ្យទារកបន្ទោបង់លាមកទន់។ ក្នុងករណីបំបៅទឹកដោះគោ ចូរពិគ្រោះយោបល់ជាមួយនឹងអ្នកជំនាញ ឬគ្រូពេទ្យ។
បញ្ចូលអាហារដែលមានជាតិសរសៃខ្ពស់ ដូចជាផ្កាខាត់ណាបៃតង ផ្លែសារី និងផ្លែចេកនៅក្នុងរបបអាហាររបស់កូន ចំពោះកូនដែលអាចចាប់ផ្ដើមញ៉ាំអាហាររឹងបាន។
រក្សាជាតិទឹកនៅក្នុងរាងកាយទារក ដោយការបំបៅញឹកញាប់។ សម្រាប់ទារកដែលមានអាយុលើសពី៦ខែ ម៉ាក់ៗអាចឲ្យពួកគេញ៉ាំទឹកបន្ថែម។
ម៉ាស្សាថ្នមៗនៅរន្ធផ្ចិត និងបរិវេណពោះ។
ស្អំទឹកក្ដៅឧណ្ហៗនៅលើពោះរបស់ទារក ដើម្បីឲ្យអាអូនបន្ទោបង់ងាយស្រួល និងធ្វើបែបនេះរៀងរាល់ពេលបំបៅរួច។

កូនតូចយំពេលជុះម្ដងៗ អាចមកពីមូលហេតុទាំងនេះ

១. ​ទទួល​អារម្មណ៍​​នៃ​ការ​បន្ទោបង់

២. ទល់​លាមក​

៣. ការ​ពិបាក​ក្នុង​ការ​​បន្ទោបង់ (Infant dyschezia)

​​​៤. ការ​ប្រេះ​រន្ធ​គូទ

៥. ​ការ​ចុក​ពោះ

​ប៉ា​ម៉ាក់​គួរ​បារម្ភ​នៅ​ពេល​ណា​?

តិចនិក​ជួយ​​​​​​ឲ្យ​ទារក​​ឈប់​យំ​​ នៅ​ពេល​បន្ទោបង់​