ការរុំកន្សែងទារកទើបនឹងកើត បានក្លាយជាទម្លាប់មួយក្នុងការថែទាំទារកដែលម៉ាក់ប៉ាមួយចំនួននិយមប្រើ។ ការរុំកន្សែង ឬក្រណាត់ទារក ជួយឲ្យអាអូនមានអារម្មណ៍ថាដូចនៅក្នុងពោះម៉ាក់ៗដដែល ធ្វើឲ្យអាអូនមានភាពកក់ក្ដៅ ពេលមិនទាន់ស៊ាំនឹងបរិយាកាសខាងក្រៅ។ ផ្ទុយទៅវិញ បើម៉ាក់ប៉ារុំទារកខុសបច្ចេកទេស ដូចបង្កើនហានិភ័យដល់អាអូនវិញ។
តាមពិតទៅ ទម្លាប់រុំទារកទើបនឹងកើត ជួយឲ្យអាអូនឆាប់គេងលក់ និងគេងបានយូរម៉ោង មិនឆាប់ភ្ញាក់ ព្រោះទារកទើបនឹងកើតមួយចំនួនកន្ត្រាក់ដៃជើងញឹក ជាហេតុធ្វើឲ្យអាអូនភ្ញាក់ពីគេង ឬគេងមិនស្កប់ស្កល់។ នេះបើតាមការឲ្យដឹងពីលោកវេជ្ជបណ្ឌិត ចាន់ ស៊ីណេត ឯកទេសជំងឺទូទៅ។
ផ្ទុយទៅវិញ ការរុំទារកទើបនឹងកើតក៏មានគុណវិបត្តិដែរ ពីព្រោះពេលរុំ ជើងទារកត្រូវដាក់ត្រង់ និងផ្អឹបជាប់គ្នា ជាហេតុអាចបណ្ដាលឲ្យកូនប្រឈមនឹងបញ្ហាឆ្អឹងត្រគាក។ ក្នុងករណីដែលកន្សែង ឬកំណាត់រុំខ្លួនកូនតឹងពេក វាអាចបង្កើនហានិភ័យថប់ដង្ហើមលើទារក។
យោងតាមការស្រាវជ្រាវរបស់ American Academy of Pediatrics បានអះអាងឲ្យដឹងថា ទារកដែលរុំកន្សែង កំណាត់ជិតឈឹង រួចម៉ាក់ប៉ាដាក់ឲ្យគេងផ្អៀងខ្លួន ឬគេងផ្កាប់មុខ អាអូនអាចប្រឈមខ្ពស់នឹងបញ្ហាទារកស្លាប់ភ្លាមៗ ពិសេសទារកអាយុលើស ៦ខែ។
តិចនិករុំកន្សែងទារកត្រឹមត្រូវ
- ទារកមិនចាំបាច់រុំកន្សែង ឬកំណាត់ទេ ហេតុនេះ បើទារកគេងលក់ធម្មតា ម៉ាក់ប៉ាមិនបាច់ខ្វល់យកកំណាត់មករុំខ្លួនកូនដែរ
- ដាក់កូនឲ្យគេងផ្ងារមុខឡើងលើជានិច្ច ពិសេសពេលរុំកន្សែង ឬកំណាត់ឲ្យកូន
- រុំកន្សែង ឬកំណាត់ក្នុងរយៈពេលខ្លី ដើម្បីចៀសវាងមានបញ្ហាត្រគាក។
[embed-health-tool-vaccination-tool]
