ដល់អាយុ ៩-១២ ខែ អូនតូចចេះវារ ឈរ តោងដើរ ឬដើរដោយមានការជួយទប់ អាចមើលឃើញពណ៌យ៉ាងច្បាស់ អាចប្រើដៃទាំង ២ ចេះធ្ងល់ ចេះរុករក ចាំថារបស់ទុកនៅឯណា និងអាចធ្វើតាមការប្រាប់សាមញ្ញជាៗដើម។ ដើម្បីជំរុញដល់ការអភិវឌ្ឍអាអូន នៅដំណាក់កាលនេះម៉ាក់ប៉ាអាចបង្រៀនអាអូនតាមរយៈការលេង និងតាមរយៈសកម្មភាពប្រចាំថ្ងៃ។
ខាងក្រោមនេះជាគន្លឹះខ្លះៗដែលប៉ាម៉ាក់អាចបង្រៀនអូនតូច ដើម្បីជំរុញដល់ការលូតលាស់រាងកាយ និងការអភិវឌ្ឍបញ្ញាស្មារតីរបស់អូនតូច៖
១. លេងលាក់របស់៖ ប៉ាម៉ាក់អាចលាក់របស់លេងនៅក្រោយខ្នង ឬក្រោមខ្នើយ រួចសួរអាអូនថា “ឡានអូននៅឯណា?” រួចឱ្យអូនតូចរក។ ការលេងបែបនេះអាចបង្កើនការយល់ដឹង និងសមត្ថភាពរុករករបស់អាអូន។
២. បង្រៀនអូនតូចឱ្យស្គាល់ឈ្មោះ៖ ប៉ាម៉ាក់អាចបង្រៀនអូនតូចឱ្យហៅសមាជិកនៅក្នុងគ្រួសារ និងបង្រៀនអូនតូចឱ្យស្គាល់ និងហៅឈ្មោះវត្ថុឬ សត្វចិញ្ចឹមដើម្បីឱ្យអូនតូចចាប់អារម្មណ៍ និងបង្កើតទំនាក់ទំនងជាមួយបរិស្ថានជុំវិញខ្លួន និងរៀនពាក្យថ្មីៗ។
អត្ថន័យពណ៌ និងរូបរាងលាមកទារក
៣. បង្រៀនអូនតូចឱ្យប្រើកាយវិការ៖ ម៉ាក់ប៉ាអាចបង្រៀនអាអូនប្រើដៃធ្វើកាយវិការមួយចំនួនដូចជា បាយៗ ចាបៗ ប៊ីៗ ទះដៃ កុំមាត់ជាដើម។ ការធ្វើបែបនេះនឹងជួយអាអូនរៀនធ្វើតាមការប្រាប់។
៤. បង្រៀនអូនតូចពីអវយវៈរាងកាយ៖ ប៉ាម៉ាក់អាចចង្អុល និងប្រាប់ពីភ្នែក ច្រមុះ ត្រចៀក មាត់ សក់ ដៃ ជើងរបស់តុក្កតាដល់អូនតូច រួចឱ្យអូនតូចចង្អុលពីភ្នែក ច្រមុះ…របស់អូនតូច និងរបស់ប៉ាម៉ាក់។ ការធ្វើបែបនេះយូរៗទៅអូនតូចនឹងស្គាល់អវយវៈរាងរបស់រាងកាយហើយ។
៥. អានសៀវភៅឱ្យអាអូនស្តាប់៖ ប៉ាម៉ាក់អាចជ្រើសរើសសៀវភៅដែលមានរូបភាពធំៗ និងមានពណ៌អានឱ្យអូនតូចស្តាប់បណ្តើរ ចង្អុលប្រាប់ពីរូបនីមួយៗនៅក្នុងសៀវភៅបណ្តើរ។ បន្ទាប់មកប្រាប់អូនតូចឱ្យរករូបក្នុងសៀវភៅ ព្រោះក្នុងវ័យនេះអូនតូចចូលចិត្តប្រើដៃណាស់ ហើយក៏មើលឃើញពណ៌ច្បាស់ដែរ។
ប៉ាម៉ាក់ត្រូវឧស្សាហ៍លើកទឹកចិត្តអូនតូចដោយប្រើពាក្យសរសើរដូចជា ពូកែណាស់ ល្អណាស់ ធ្វើបានល្អណាស់ជាដើម ដើម្បីបង្កើនជំនឿចិត្តអូនតូចក្នុងការរៀនរបស់ថ្មីៗ និងចៀសវាងប្រើពាក្យដូចជា ខុសហើយ មិនត្រូវទេ…ដែលអាចធ្វើឱ្យអូនតូចមានការរាលថយក្នុងការរៀនព្រោះខ្លាចខុស ។
[embed-health-tool-vaccination-tool]
