គ្នាយើងដឹងហើយថា ការបំបៅដោះកូន ជារឿងចាំបាច់មួយសម្រាប់ម៉ាក់ៗថ្មីថ្មោងដែលទើបសម្រាលកូនរួច ដោយសារទឹកដោះម្ដាយជាអាហារល្អបំផុតសម្រាប់ទារក។ ដូចគ្នានេះ មានការលើកឡើងមួយថា ម៉ោង ៤-៥ ព្រឹកព្រលឹម ជាពេលដែលម៉ាក់ៗសម្បូរទឹកដោះជាងគេ។ តើអំឡុងវេលានេះ ពិតជាសម្បូរទឹកដោះឲ្យកូនបៅមែនឬ?
បញ្ហានេះ លោកវេជ្ជបណ្ឌិត ឃួន សុវណ្ណារិទ្ធ ឯកទេសផ្នែកសម្ភព និងរោគស្ត្រី បានបកស្រាយឲ្យដឹងថា ពេលដែលម៉ាក់ៗបំបៅដោះកូន យើងមិនសម្គាល់ទេ ពេលណា ឬម៉ោងណា សម្បូរទឹកដោះឲ្យកូនបៅ។ ជាទូទៅអំឡុងពេលពពោះបាន៧ខែ រាងកាយរបស់ម្ដាយចាប់ផ្ដើមផលិតទឹកដោះ ហើយក្រោយម៉ាក់ៗសម្រាលបានពី ៣០-៦០នាទី ម៉ាក់ៗនឹងមានទឹកដោះដំបូងឲ្យកូនបៅហើយ។
ផ្ទុយទៅវិញ បើម្ដាយនោះមិនសម្បូរទឹកដោះឲ្យកូនបៅ ត្រូវបំបៅកូនឲ្យបានញឹកញាប់ ព្រោះវាបញ្ជាទៅប្រព័ន្ធប្រសាទម្ដាយឲ្យបញ្ចេញអ័រម៉ូន ប្រូឡាក់ទីន ឲ្យក្រពេញទឹកដោះផលិតទឹកដោះឡើងមកច្រើន។ មួយវិញទៀត បើមិនសម្បូរទឹកដោះឲ្យកូនបៅ ម៉ាក់ៗអាចប្រើវិធីម៉ាស្សាសុដន់ ដើម្បីជួយឲ្យទឹកដោះកើនឡើង តែចៀសវាងប៉ះពាល់ទៅលើចុងសុដន់ ព្រោះខ្លាចឆ្លងមេរោគមិនស្អាត ពេលកូនបៅអាចប៉ះពាល់ដល់កូន។
វេជ្ជបណ្ឌិតសម្ភពរូបនេះ បន្តថា ចំពោះម៉ាក់ៗដែលបំបៅដោះកូន ត្រូវធ្វើឲ្យអារម្មណ៍ឲ្យស្រស់ស្រាយ ព្រោះកាលណាម៉ាក់ៗគិតច្រើន ឬមិនសប្បាយចិត្ត វាក៏អាចប៉ះពាល់ទៅដល់ការផលិតទឹកដោះរបស់ម៉ាក់ៗដែរ។ “លើសពីនេះ ម៉ាក់ៗក៏ត្រូវបំប៉នអាហារឲ្យបានច្រើន ញ៉ាំទឹក ញ៉ាំចំណីចំណុកឲ្យបានគ្រប់មុខ លើកលែងតែអាហារដែលធ្វើឲ្យអាលែកហ្សី។ បើធ្វើបែបនេះបាន មិនបាច់ភ័យរឿងអត់ទឹកដោះទេ ពេលណាក៏មានឲ្យកូនបៅដែរ។”
[embed-health-tool-vaccination-tool]
