ម៉ាក់ៗដែលឲ្យអូនបៅម្សៅទឹកដោះគោ ទំនងជាបានដឹងច្បាស់ពីរបៀបរៀបចំឆុងទឹកដោះគោឲ្យអូនៗហើយ តែដឹងទេថាម្សៅទឹកដោះគោឆុងហើយ អាចទុកបានក្នុងរយៈពេលប៉ុន្មាន?

ក្រោពីរៀបចំឆុងម្សៅទឹកដោះគោឲ្យអូនៗហើយ បើម៉ាក់ៗទុកចោលក្នុងសីតុណ្ហភាពធម្មតាយូរពេក វានឹងខូចគុណភាពបាន។ ដើម្បីឲ្យម្សៅទឹកដោះគោអូនៗឆុងរួចហើយមានសុវត្ថិភាពពេលអូនៗបៅ ម៉ាក់ត្រូវឲ្យអូនៗបៅទឹកដោះគោឆុងហើយក្នុងរង្វង់ពីរម៉ោងបន្ទាប់ពីឆុងរួច។ ប៉ុន្តែ បើម៉ាក់ៗបានចាប់ផ្ដើមយកទឹកដោះគោឆុងហើយនោះឲ្យអូនៗបៅ ទឹកដោះគោដែលអូនៗកំពុងបៅមិនត្រូវបន្តបៅយូរជាងម៉ោងនោះទេ។

មួយវិញទៀត បើម៉ាក់ៗគិតថាចង់ឆុងទឹកដោះគោម្សៅទុកឲ្យអូនៗបៅពេលក្រោយ ម៉ាក់ៗត្រូវរក្សាទឹកដោះគោឆុងរួចទុកក្នុងដប រួចដាក់ចូលក្នុងទូទឹកកក និងត្រូវប្រើក្នុងរង្វង់២៤ម៉ោងតែប៉ុណ្ណោះ។

ម្សៅទឹកដោះគោ

ចំណុចមួយទៀត ម៉ាក់ៗគួរដឹងដែរនោះ គឺថាបើម៉ាក់ៗឲ្យអូនៗបៅហើយ និងមានសល់ទឹកដោះគោក្នុងដប មិនត្រូវទុកឲ្យបៅបន្តទៀតទេ ត្រូវចាក់ចោលភ្លាមដែរ នេះបើតាមការបញ្ជាក់របស់មជ្ឈមណ្ឌលគ្រប់គ្រងជំងឺ CDC អាមេរិក។ CDC អាមេរិកបញ្ជាក់ថាទឹកដោះគោដែលនៅសល់ គឺអាចមានលាយឡំជាមួយទឹកមាត់របស់អូនៗ ដែលអាចផ្ដល់ឱកាសឲ្យបាក់តេរីលូតលាស់បាន។ ដូចគ្នាដែរ ម៉ាក់ៗត្រូវចាំថាត្រូវសម្អាតកំប៉ុងទឹកដោះគោអូនឲ្យបានស្អាត និងមានអនាម័យជានិច្ចមុននឹងប្រើប្រាស់ជាថ្មី។

ចំពោះម្សៅទឹកដោះគោ ដែលម៉ាក់ៗទើបបានទិញ ឬមិនទាន់បានបើកប្រើប្រាស់ត្រូវរក្សាទុកនៅកន្លែងត្រជាក់ ស្ងួត និងមិនត្រូវទុកនៅក្រៅផ្ទះ ដូចជាក្នុងរថយន្តឡើយ។

ចំណែកឯកម្សៅទឹកដោះគោដែលបានបើកប្រើហើយ ម៉ាក់ត្រូវរក្សាទុកនៅកន្លែងត្រជាក់ ហើយស្ងួត ដោយត្រូវគ្របគម្របឲ្យបានជិតល្អ និងហាមដាច់ខាតដាក់ក្នុងទូទឹកកក។ ដូចគ្នាដែរ ជាធម្មតាម្សៅទឹកដោះគោដែលបើកហើយ គួរតែប្រើឲ្យអស់ក្នុងរង្វង់មួយខែ ឬត្រូវពិនិត្យការបញ្ជាក់លើសម្បកកំប៉ុង។

ពេលម៉ាក់ៗបើកម្សៅទឹកដោះគោប្រើហើយ ត្រូវសរសេរកាលបរិច្ឆេទបើកប្រើប្រាស់លើគម្របកំប៉ុង ដើម្បីឲ្យម៉ាក់ៗងាយស្រួលចងចាំ។ អ្វីដែលត្រូវចងចាំមែនទែននោះ គឺម៉ាក់មិនត្រូវប្រើប្រាស់ម្សៅទឹកដោះគោហួសកាលបរិច្ឆេទប្រើប្រាស់ សម្រាប់អូនៗបៅនោះទេ។

ម្សៅទឹកដោះគោឆុងហើយអាចទុកឲ្យ​កូន​បៅ​​បានប៉ុន្មាន​ម៉ោង?

ម្សៅទឹកដោះគោឆុងហើយអាចទុកឲ្យកូនបៅបានប៉ុន្មានម៉ោង?