ស្តាប់ហេតុផលនេះហើយ ប៉ាម៉ាក់ឈប់ប្រើស្លាបព្រាធម្មតាវាស់ថ្នាំឲ្យកូនទៀតទៅ!

ជាធម្មតា គ្រប់ប្រភេទថ្នាំទឹកដាក់លក់លើទីផ្សារ សុទ្ធតែមានរង្វាស់ថ្នាំត្រឹមត្រូវ មិនថាស្លាបព្រា ឬគម្របភ្ជាប់មកជាមួយ។ ប៉ុន្តែបច្ចុប្បន្ន យើងសង្កេតឃើញ ប៉ាម៉ាក់មួយចំនួន តែងប្រើប្រាស់ស្លាបព្រាបាយធម្មតា វាស់ថ្នាំឲ្យកូនផឹក ដែលទម្លាប់នេះមិនល្អទេ ព្រោះស្លាបព្រាបាយធម្មតាមានទំហំខុសពីស្លាបព្រារង្វាស់ថ្នាំ នាំឲ្យខុសកម្រិតថ្នាំ អាចបង្កផលប៉ះពាល់ដល់កូនបាន។ “Hello គ្រូពេទ្យ’ នឹងពន្យល់ប្រាប់ពីកំហុសពេលប្រើស្លាបព្រាបាយ និងផលប៉ះពាល់ឲ្យគ្នាយើងបានដឹង។

១- ប្រើស្លាបព្រាបាយដើម្បីវាស់ថ្នាំទឹក

ចុះប៉ាម៉ាក់មានធ្លាប់សួរខ្លួនឯងអត់ ថាតើធ្វើបែបនេះ ត្រឹមត្រូវទេដើម្បីវាស់កម្រិតថ្នាំទឹកឲ្យកូន? បច្ចុប្បន្ន ប៉ាម៉ាក់ភាគច្រើន បានប្រើវិធីនេះដើម្បីវាស់កម្រិតថ្នាំ ដូចជាសេរ៉ូក្អក ឬថ្នាំបញ្ចុះកម្ដៅ នៅពេលកូនៗឈឺ។ យើងអាចគិតថា វាជារឿងធម្មតា ដូច្នេះហើយទើបមានការសិក្សាពាក់ព័ន្ធនឹងករណីនេះ ដែរអាចនឹងផ្លាស់ប្តូរគំនិតរបស់យើងបាន។

នៅក្នុងការសិក្សាមួយ ធ្វើឡើងដើម្បីដឹងពីរបៀបប៉ាម៉ាក់វាស់ថ្នាំឲ្យកូនៗ ដោយបានរកឃើញថា ប៉ាម៉ាក់ជិត ៣៩% បានប្រើកម្រិតថ្នាំខ្លួនចង់បាន មិនត្រឹមត្រូវតាមស្ថានភាពជំងឺកូន និងមានចំនួន ៤១% មានកំហុសក្នុងការវាស់ ទៅនឹងកម្រិតថ្នាំគ្រូពេទ្យបានកំណត់។ ដូចគ្នានេះដែរ ប៉ាម៉ាក់មួយចំនួន បានប្រើស្លាបព្រាកាហ្វេ ឬស្លាបព្រាបាយ មានកម្រិតថ្នាំខុស ២,៣ ដង ទៅនឹងស្លាបព្រា ឬគម្របរង្វាស់ថ្នាំ ខណៈពេលករណីមិនបានអនុវត្តតាមវេជ្ជបញ្ជាគ្រូពេទ្យមានជិត ១,៩ ដង។

អត្ថបទពាក់ព័ន្ធ៖

ទម្លាប់ល្អៗម៉ាក់ប៉ាគួរធ្វើ មុនពេលឲ្យកូនចូលគេង
ហេតុផលអ៊ីចឹងតាស៎ បានក្មេងៗទាល់តែបង្ខំបានព្រមញ៉ាំបាយ

២- ផលប៉ះពាល់ដោយការប្រើប្រាស់ស្លាបព្រាវាស់ថ្នាំខុស

នៅក្នុងការសិក្សាថ្មីៗនេះ គឺមានអ្នកចូលរួមជិត ២០០នាក់ ដោយត្រូវគេស្នើសុំឲ្យចាក់ថ្នាំទឹកផ្តាសាយចំនួន ៥ មិល្លីលីត្រ ស្មើនឹង ១ ស្លាបព្រាកាហ្វេ ចូលទៅក្នុងស្លាបព្រាផ្សេងៗនៅឯផ្ទះបាយ ហើយនៅពេលប៉ាម៉ាក់ទាំងនោះ ចាក់ថ្នាំក្នុងកម្រិត ៥ មិលី្លលីត្រ ទៅក្នុងស្លាបព្រាមានទំហំមធ្យម និងស្លាបព្រាធំ អ្នកស្រាវជ្រាវក៏បានសួរពីទំនុកចិត្តក្នុងការចាក់ថ្នាំទៅក្នុងស្លាបព្រាទាំងនោះ។ ជាលទ្ធផលគួរភ្ញាក់ផ្អើលជាខ្លាំង ដោយមានចំនួនប្រហែល ១១,៦% បានចាក់ថ្នាំលើសកម្រិតទៅក្នុងស្លាបព្រាធំ និងមាន ៨,៤% ចាក់ថ្នាំខ្វះកម្រិតទៅក្នុងស្លាបព្រាទំហំមធ្យម ទោះបីជាប៉ាម៉ាក់ដែលចូលរួមភាគច្រើន គិតថាខ្លួនបានចាក់ថ្នាំក្នុងត្រឹមត្រូវក៏ដោយ។

យោងតាមលោកវេជ្ជបណ្ឌិត Ian Paul អនុប្រធានរងនៃការស្រាវជ្រាវរបស់មហាវិទ្យាល័យវេជ្ជសាស្រ្តផ្នែករោគកុមារ នៃសាកលវិទ្យាល័យ Penn State សហរដ្ឋអាមេរិក ចំនួនថ្នាំត្រូវបានចាក់ទៅក្នុងស្លាបព្រាធម្មតា គឺមិនត្រឹមត្រូវនោះទេ។ កម្រិតមិនត្រឹមត្រូវទាំងនេះ អាចធ្វើឲ្យក្មេងងាយ ផឹកថ្នាំលើសកម្រិត ឬខ្វះកម្រិត។ ការឲ្យថ្នាំទាំងអស់លើក្មេងៗ ត្រូវផ្អែកលើទម្ងន់ ស្ថានភាពសុខភាព និងអាយុ ហេតុនេះ ក្មេងៗនឹងកាន់តែងាយរងគ្រោះថ្នាក់ជាងមនុស្សពេញវ័យ នៅពេលមានការប្រើប្រាស់កម្រិតមិនត្រឹមត្រូវ អាចបណ្តាលឲ្យក្មេងមានសុខភាពបញ្ហាធ្ងន់ធ្ងរបាន។ លើសពីនេះ មានករណីពុលថ្នាំច្រើន សុទ្ធសឹងបណ្តាលមកពីការឲ្យថ្នាំខុសកម្រិតនេះឯង។

៣- អ្វីប៉ាម៉ាក់គួរធ្វើ

ដើម្បីសុវត្ថិភាពកូនយើង និងប្រសិទ្ធភាពនៅពេលផឹកថ្នាំ ប៉ាម៉ាក់គ្រប់រូប គួរតែប្រើគម្រមថ្នាំ ស្លាបព្រាថ្នាំ សឺរ៉ាំងថ្នាំ ឬឧបករណ៍បន្តក់ថ្នាំមានក្រិត ដើម្បីគ្រប់គ្រងកម្រិតថ្នាំ ឬអាចស្នើសុំស្លាបព្រាក្រិត ប្រើសម្រាប់វាស់កម្រិតថ្នាំពីគ្រូពេទ្យក៏បាន។ យើងក៏អាចផ្លាស់ប្តូរកម្រិតថ្នាំ ពីការវាស់តាមស្លាបព្រាកាហ្វេ ទៅជាមិល្លីលីត្របានដែរ ព្រោះការកំណត់បរិមាណថ្នាំជាមិល្លីលីត្រ អាចកាត់បន្ថយហានិភ័យបង្កកំហុសក្នុងការប្រើថ្នាំបាន ៥០% នៅពេលដែលមិនមានឧបករណ៍សម្រាប់វាស់ថ្នាំ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញដើម្បីស្វែងយល់ពីដំណោះស្រាយរបស់អ្នក។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

Editor HK

អត្ថបទដោយ ចាន់ សុខឡាង · កែ 04/10/2019