អត្រាអ្នកផ្ទុកមេរោគអេដស៍ក្នុងចំណោមមនុស្សពេញវ័យ អាយុ ១៥-៤៩ឆ្នាំ បានថយចុះពី ០,៨% នៅឆ្នាំ ២០១០ មកនៅត្រឹម ០,៥% នៅឆ្នាំ ២០១៩។ ចំណែកចំនួនអ្នកស្លាប់គ្រប់វ័យដោយសារជំងឺអេដស៍បានថយចុះដែរ គឺថយពីប្រមាណ ២.៣០០នាក់ នៅឆ្នាំ ២០១០ មកត្រឹមប្រមាណ ១.៣០០ នាក់ ក្នុងឆ្នាំ ២០១៩។ នេះបើតាមរបាយការណ៍របស់អាជ្ញាធរជាតិប្រយុទ្ធនឹងជំងឺអេដស៍។
នៅក្នុងរបាយការណ៍នោះក៏បានបញ្ជាក់ដែរថា ចំនួនអ្នកឆ្លងថ្មីគ្រប់វ័យ បានថយចុះពីប្រមាណ ១.៩០០ នាក់ នៅឆ្នាំ ២០១០ មកនៅត្រឹមប្រមាណ ៧៨០ នាក់ នៅឆ្នាំ ២០១៩។
នៅក្នុងសារលិខិតរបស់សម្តេចនាយករដ្ឋមន្ត្រី ហ៊ុន សែន ក្នុងឱកាសទិវាពិភពលោកប្រយុទ្ធនឹងជំងឺអេដស៍ ថ្ងៃទី ១ ធ្នូ ២០២០ ដែលស្រង់របាយការណ៍របស់អាជ្ញាធរជាតិប្រយុទ្ធនឹងជំងឺអេដស៍ បច្ចុប្បន្នកម្ពុជាមានចំនួនផ្ទុកមេរោគអេដស៍គ្រប់វ័យមានប្រមាណ ៧៣.០០០ នាក់ ក្នុងនោះ ៨៤% បានធ្វើតេស្តឈាមដឹងពិតប្រាកដថា មានផ្ទុកមេរោគអេដស៍ ១០០% បានទទួលសេវាព្យាបាលដោយឱសថប្រឆាំងមេរោគអេដស៍ និង៩៦% ទទួលបានប្រសិទ្ធភាពនៃការព្យាបាលនាំឲ្យមានសុខភាពល្អ។
ទោះបីតួលេខខាងលើបង្ហាញនូវសញ្ញាវិជ្ជមានក្នុងទប់ស្កាប់ការរីករាលដាលមេរោគអេដស៍ និងជំងឺអេដស៍ក្តី តែក្នុងសារលិខិតរបស់សម្តេចនាយករដ្ឋមន្ត្រី ហ៊ុន សែន បានបញ្ជាក់ថា បច្ចុប្បន្នកម្ពុជាមានអ្នកផ្ទុកមេរោគអេដស៍ប្រមាណ ១២.០០០ នាក់ នៅមិនទាន់បានត្រលប់មកធ្វើតេស្តឈាម ដើម្បីបញ្ជាក់ពិតប្រាកដអំពីស្ថានភាពមេរោគអេដស៍នៅក្នុងខ្លួននោះទេ ខណៈអ្នកជំងឺអេដស៍មួយចំនួនទៀតបាននិងកំពុងលះបង់ការព្យាបាលឡើងវិញ។
ជាមួយគ្នានោះ ក្រុមបុរសរួមភេទជាមួយបុរស ក្រុមបំប្លែងភេទ ស្ត្រីបម្រើសេវាកម្សាន្តសប្បាយមានចំនួនកើនឡើង និងមានអត្រាឆ្លងមេរោគអេដស៍ខ្ពស់ ដែលនាំឲ្យមានការចម្លងមេរោគអេដស៍ទៅប្រជាពលរដ្ឋទូទៅទៀតផង។
ខាងក្រោមនេះជាសារលិខិតរបស់សម្តេចនាយករដ្ឋមន្ត្រី ហ៊ុន សែន ក្នុងឱកាសទិវាពិភពលោកប្រយុទ្ធនឹងជំងឺអេដស៍ ១ ធ្នូ ២០២០។
[embed-health-tool-bmi]
