Parasitic Infections (ការបង្ករោគដោយប៉ារ៉ាស៊ីត)

និយមន័យ

ការបង្ករោគដោយប៉ារ៉ាស៊ីតជាអ្វី?

សត្វល្អិត គឺជាប៉ារ៉ាស៊ីត ឬអតិសុខុមប្រាណ រស់នៅបានដោយសារពឹងផ្អែកសារពាង្គកាយដទៃដែលភាគច្រើនវាផ្ដល់មកវិញនូវទុក្ខទោស និងផលវិបាកជាច្រើនដល់រាងកាយដែលវានៅជាមួយ។ បញ្ហាសត្វល្អិតនេះ គឺចោទយ៉ាងខ្លាំងទៅលើសុខភាពរបស់ប្រជាជននៅតំបន់ត្រូពិក និងប្រទេសកំពុងអភិវឌ្ឍន៍។

Parasitic Infections (ការបង្ករោគដោយប៉ារ៉ាស៊ីត)

រោគសញ្ញា

នៅពេលយើងមានសត្វល្អិតក្នុងខ្លួនហើយ វានឹងចាប់ផ្ដើមបឺតជញ្ជក់ថាមពលរបស់យើង និងបង្កជារោគសញ្ញាដូចជា៖

ជំងឺកាមរោគម្យ៉ាងដែលបង្កពីប៉ារ៉ាស៊ីត Trichomonas វាមិនសូវមានសញ្ញាអ្វីប្រាកដទេប៉ុន្តែក្នុងករណីខ្លះវាអាចធ្វើឲ្យមានរមាស់ ឡើងក្រហម និងចេញទឹករម្អិលច្រើនពីប្រដាប់បន្តពូជ។
ប៉ារ៉ាស៊ីត Guadias វាបង្កជា រាក ដើរខ្យល់ច្រើន ឈឺពោះ ឬលាមករឹង និងកង្វះជាតិទឹកជាដើម
ប៉ារ៉ាស៊ីត Cryptosporidose វាបង្កឲ្យមាន ឈឺពោះ ក្អួតឬចង្អោរ ស្រកទម្ងន់ កង្វះជាតិទឹក និងស្រកទម្ងន់ជាដើម
ប៉ារ៉ាស៊ីត Toxoplasmose អាចទៅជាហើមកូនកណ្ដុរឈឺសាច់ដុំ និងមានសញ្ញាដូចអ្នកកើតផ្ដាសាយអ៊ីចឹង។ ប៉ារ៉ាស៊ីតនេះ ត្រូវគេប្រយ័ត្នណាស់ចំពោះស្ត្រីដែលកំពុងពពោះ។

មូលហេតុ

ប៉ារ៉ាស៊ីតបែងចែកជា ៣ប្រភេទ ធំៗ៖

បឋមសត្វ៖ គឺជាប៉ារ៉ាស៊ីតឯកកោសិកាអាចស្វ័យដំឡើងទ្វេបានពេលបានចូលទៅក្នុងរាងកាយមនុស្ស មានដូចជាអាមីប ឬ Guardias ជាដើម។
ដង្កូវព្រូន៖ វាជាប៉ារ៉ាស៊ីតពហុកោសិកាដែលអាចរស់នៅ និងលូតលាស់ក្នុងសារពាង្គកាយរបស់មនុស្សបាន មានដូចជា ព្រូនសំប៉ែត ព្រូនមូលជាដើម។
សត្វល្អិត៖ គឺជាប្រភេទសត្វដែលមាននៅមជ្ឈដ្ឋានជុំវិញខ្លួនមនុស្សហើយអាចបង្កទៅជាជំងឺបាននៅពេលដែលវាបានខាំ ឬចូលទៅក្នុងស្បែកមនុស្សដូចជាមូស និងចៃជាដើម។

ការចម្លងរបស់ប៉ារ៉ាស៊ីតមានច្រើនរបៀប និងសណ្ឋានដូចជា៖

ការប្រើប្រាស់ទឹកមិនស្អាត
ការរស់នៅក្នុងមជ្ឈដ្ឋានដែលគ្មានអនាម័យ
ឆ្លងតាមឈាម
តាមការរួមភេទ
តាមភ្នាក់ងារចម្លងដូចជាមូសក្នុងជំងឺគ្រុនចាញ់ជាដើម

ប៉ារ៉ាស៊ីត

ហានិភ័យ

គ្នាយើងអាចប្រឈមនឹងការឆ្លងប៉ារ៉ាស៊ីតមកក្នុងខ្លួនក្នុងករណីដូចខាងក្រោម៖

មានជំងឺដែលធ្វើឲ្យប្រព័ន្ធភាពស៊ាំចុះខ្សោយ
មានការធ្វើដំណើរកម្សាន្តនៅតំបន់ដែលមានការរាតត្បាតដោយប៉ារ៉ាស៊ីត
គ្មានទឹកស្អាតប្រើប្រាស់
ប្រើប្រាស់ទឹកបឹង ព្រែក ឬទន្លេដែលមានផ្ទុកពងព្រូន និងប៉ារ៉ាស៊ីត
មានការប៉ះពាល់លាមកសត្វដែលមានពងព្រូន
ស្ត្រីមានផ្ទៃពោះមិនគួរមានសត្វចិញ្ចឹមនោះទេព្រោះពួកវាគឺជាអ្នកដែលផ្ទុក និងដឹកនាំមេរោគជាច្រើនដែលយើងមិនអាចមើលឃើញ ដូចជាពពួក Toxoplasmos។

រោគវិនិច្ឆ័យ និងការព្យាបាល

រោគវិនិច្ឆ័យ

មុនធ្វើការកំណត់បានគ្រូពេទ្យនឹងសួរពីសញ្ញាដែលសង្ស័យក៏ដូចជាដំណើរកម្សាន្តក្នុងពេលថ្មីៗនេះ និងការប្រើប្រាស់ទឹក មុននឹងធ្វើតេស្តដូចខាងក្រោម៖

តេស្តមន្ទីរពិសោធន៍ នូវវត្ថុវិភាគដូចជាឈាមលាមក ទឹកនោមនិងកំហាកជាដើមដើម្បីរកមើលវត្តមានរបស់ពងព្រូន ឬប៉ារ៉ាស៊ីតដែលអាចឲ្យដឹងបានតាមរយៈជាតិប្រូតេអ៊ីននិង DNA របស់វា។
ការច្រឹបយកសាច់ទៅពិនិត្យក្នុងករណីសង្ស័យមានសត្វល្អិតនៅលើសារពាង្គកាយផ្នែកណាមួយ។
ក្នុងពេលដែលរុករកអ្នកជំងឺមិនត្រូវប្រើថ្នាំផ្សះ ថ្នាំបន្ថយជាតិអាស៊ីដក្រពះ និងថ្នាំទល់លាមកឡើយ ព្រោះវាអាចពិបាកនឹងរកមើលវត្តមានរបស់ពួកប៉ារ៉ាស៊ីតទាំងនោះ។

ការព្យាបាល

អាស្រ័យលើការធ្វើរោគវិនិច្ឆ័យគ្រូពេទ្យនឹងផ្ដល់ឲ្យអ្នកជំងឺនូវថ្នាំសម្លាប់ និងថ្នាំបញ្ចុះសត្វល្អិត។ គ្រូពេទ្យក៏អាចឲ្យថ្នាំព្យាបាលគួបផ្សំដើម្បីបន្ធូរអាការៈរំខានផ្សេងៗទៀតដែរដូចជា បំបាត់ការរាក និងបង្គ្រប់ជាតិទឹកជាដើម។

ចំណេះដឹងបន្ថែម

ដើម្បីជៀសវាងមានជំងឺដែលបង្កឡើងដោយប៉ារ៉ាស៊ីត យើងគួរអនុវត្តវិធីដូចខាងក្រោមនេះ៖

លាងដៃឲ្យបានញឹកញាប់មុនញ៉ាំអាហារ និងក្រោយពេលចេញពីបន្ទប់ទឹក
ចម្អិនអាហារឲ្យបានឆ្អិនល្អ
ប្រើប្រាស់តែទឹកស្អាត ក្នុងករណីដំណើរកម្សាន្តគួរទិញទឹកបរិសុទ្ធទុក
ពេលងូតទឹកតាមរមណីយដ្ឋានធម្មជាតិជៀសវាងការលេបទឹក
ស្ត្រីមានផ្ទៃពោះត្រូវជៀសវាងការចិញ្ចឹមសត្វ
រួមភេទដោយប្រើស្រោមអនាម័យ

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ យ៉ានណែត ដាញែល · កែ 18/01/2021

Parasitic Infections (ការ​បង្ក​រោគ​ដោយ​ប៉ារ៉ាស៊ីត​)

និយមន័យ

ការ​បង្ក​រោគ​ដោយ​ប៉ារ៉ាស៊ីត​​ជា​អ្វី?

រោគសញ្ញា

មូលហេតុ

ហានិភ័យ

រោគវិនិច្ឆ័យ​ និង​ការ​ព្យាបាល

រោគវិនិច្ឆ័យ​

ការ​ព្យាបាល

ចំណេះដឹង​បន្ថែម