បុរសជនជាតិខ្មែរ អាយុ ៧៥ឆ្នាំ ឆ្លងកូវីដ ១៩ រស់នៅសង្កាត់កាកាប ខណ្ឌពោធិ៍សែនជ័យ ស្លាប់បន្ទាប់ពីចូលសម្រាកនៅមន្ទីរពេទ្យមិត្តភាពខ្មែរ-សូវៀតបាន ១ថ្ងៃប៉ុណ្ណោះ។
បើលោកជំទាវ យក់ សម្បត្តិ រដ្ឋលេខាធិការ ក្រសួងសុខាភិបាល ថ្លែងប្រាប់កម្ពុជាថ្មី បុរសខាងលើឈ្មោះ ស្តើង ជា អាយុ ៧៥ឆ្នាំ មានអាការៈ ហត់ និងពិបាកដកដង្ហើមវិវត្តរហ័សរយៈពេល ៣ ទៅ ៤ ថ្ងៃ គួបផ្សំនឹងជំងឺប្រចាំកាយលើសឈាម។
បុរសរូបនេះ ទើបតែតេស្តឃើញវិជ្ជមានកូវីដ១៩ នៅយប់ថ្ងៃទី ២១ ខែមីនានេះ ហើយបានចូលសម្រាកក្នុងមន្ទីរពេទ្យនៅថ្ងៃទី ២១ ខែមីនា ក្នុងសភាពហត់ខ្លាំង។ ដោយសភាពរលាកសួតធ្ងន់ធ្ងរខ្លាំងទាំងសងខាង និងមានខ្សោយសួតខ្លាំងគ្រូពេទ្យមិនអាចជួយសង្គ្រោះបាន បុរសរូបនោះបានស្លាប់នៅព្រឹកថ្ងៃទី ២២ មីនា។
បើតាមគណនីហ្វេសប៊ុក Vannak Ebiza បុរសអ្នកជំងឺកូវីដ ១៩ ដែលបានស្លាប់នេះ មានតួនាទីជាសាស្រ្តាចារ្យវេជ្ជបណ្ឌិត លោកធ្លាប់គ្រូពេទ្យព្យាបាលនៅមន្ទីរពេទ្យកុមារជាតិ និងជាអនុប្រធានការិយាល័យបច្ចេកទេស។ មុខងារចុងក្រោយជាទីប្រឹក្សាវិទ្យាស្ថានវិទ្យាសាស្រ្តសុខាភិបាលខេមរភូមិន្ទ និងជាប្រធានអាសន:រោគកុមារនៅសាកលវិទ្យាល័យអន្តរជាតិ។ គណនីខាងលើនេះក៏បានអរគុណដល់លោកវេជ្ជបណ្ឌិត ស្តើង ជា ដែលបានចំណោយពេលវេលាជួយបង្រៀនណែនាំមេរៀននិងបទពិសោធន៍ល្អៗ។
គិតត្រឹមព្រឹកថ្ងៃទី ២២ មីនា ២០២១ មានអ្នកស្លាប់ដោយសារជំងឺកូវីដ ១៨ ចំនួន ៤ករណី៖
១. បុរសជនជាតិខ្មែរ អាយុ៥០ឆ្នាំ នៅសង្កាត់ចាក់អង្រែ ភ្នំពេញ ស្លាប់នៅមន្ទីរមិត្តភាពខ្មែរ-សូវៀត កាលពីថ្ងៃទី១១ ខែមីនា ឆ្នាំ២០២១
២. ស្រ្តីជនជាតិខ្មែរ អាយុ៦២ឆ្នាំ នៅសង្កាត់ស្នោ ខណ្ឌកំបូល ភ្នំពេញ ស្លាប់នៅមន្ទីរពេទ្យមិត្តភាពខ្មែរ-សូវៀត នៅថ្ងៃទី១៩ ខែមីនា ឆ្នាំ២០២១
៣. បុរសជនជាតិខ្មែរ អាយុ៤៦ឆ្នាំ នៅសង្កាត់បឹងសាឡាង ខណ្ឌទួលគោក ភ្នំពេញ ស្លាប់នៅមន្ទីរពេទ្យមិត្តភាពខ្មែរ-សូវៀត នៅថ្ងៃទី១៩ ខែមីនា ឆ្នាំ២០២១។
៤. បុរសជនជាតិខ្មែរ អាយុ៧៥ឆ្នាំ នៅសង្កាត់កាកាប ខណ្ឌពោធិ៍សែនជ័យ ភ្នំពេញ ស្លាប់នៅមន្ទីរពេទ្យមិត្តភាពខ្មែរ-សូវៀត ថ្ងៃទី២១ ខែមីនា ឆ្នាំ២០២១។
[embed-health-tool-bmi]
