ពេលជិះកង់ យើងប្រើកម្លាំងជើងខ្លាំង ព្រោះត្រូវធាក់កង់ដើម្បីឲ្យវាទៅមុខ ហើយដោយសារតែប្រើជើងខ្លាំងគ្នាយើងខ្លះគិតថា របួសភាគច្រើនបណ្ដាលមកពីការជិះកង់កើតឡើងលើជើងដូចជា កំភួនជើង ឬជង្គង់ជាដើម។ ប៉ុន្តែ ការសិក្សាបង្ហាញថា របួសលើរាងកាយពេលជិះកង់គួរឲ្យធុញនោះមិនមែនឈឺជង្គង់អីទេ តែជាបញ្ហាឈឺចង្កេះដោយសារជិះកង់វិញ។
ក្រុមអ្នកវិទ្យាសាស្ត្រន័រវែសបានសិក្សាលើអ្នកជិះកង់អាជីពចំនួន ១១៦នាក់ ដើម្បីពិនិត្យមើលលើផ្នែករាងកាយណាដែលរងរបួសខ្លាំងជាងគេដោយសារការជិះកង់។ ការសិក្សាបានបង្ហាញឲ្យឃើញថា៖
- ៤៥% នៃរបួសដោយសារការជិះកង់គឺបញ្ហាឈឺចង្កេះ
- ២៣% នៃរបួសដោយសារការជិះកង់គឺបញ្ហាឈឺជង្គង់
- ៤១% នៃ អ្នកជិះកង់ទាំងអស់បានស្វែងរកការព្យាបាលដោយសារឈឺចង្កេះ ឈឺខ្នង។
មូលហេតុទូទៅបំផុតនៃការឈឺចង្កេះចំពោះគ្នាយើងចូលចិត្តជិះកង់ គឺអាចដោយសារមានឥរិយាបថមិនល្អ (ឱនជិះកង់) បណ្ដាលឲ្យស្ពឹកខ្នង ឬចង្កេះ។ មួយវិញទៀតនោះ ការឈឺចង្កេះដោយសារជិះកង់អាចបង្កឡើងដោយសារសរសៃពួរសាច់ដុំទទួលរងការប៉ះទង្គិច ឬដោយសារប្រឹងធាក់កង់ខ្លាំងពេក។ បញ្ហាឈឺចង្កេះដោយសារជិះកង់ក៏អាចបណ្ដាលមកពីយើងធាក់កង់ខុសបច្ចេកទេសផងដែរ។
ក្បួនដោះស្រាយបញ្ហាឈឺចង្កេះដោយសារជិះកង់
១. កែតម្រូវកង់ឲ្យសមស្របទៅតាមរាងកាយរបស់យើង បើអាចគួរមានជំនួយពីអ្នកជំនាញក្នុងការជ្រើសរើសកង់ស័ក្ដិសមនឹងយើង។
២. ជ្រើសរើសប្រភេទកង់ត្រឹមត្រូវទៅតាមការជិះកង់ដូចជា កង់ជិះលេងធម្មតា កង់ជិះឡើងភ្នំ កង់កីឡា។ល។
៣. ក្នុងករណីយើងឈឺចង្កេះដោយសារជិះកង់ អាចយកទឹកកកមកស្អំកន្លែងឈឺចាប់ និងសម្រាកមួយរយៈសិន រហូតអាការៈប្រសើរឡើង។
៤. បើយើងឈឺចង្កេះដោយសារជិះកង់ខ្លាំង អាចលេបថ្នាំបំបាត់ការឈឺចាប់ដោយគ្មានវេជ្ជបញ្ជាបាន តែត្រូវប្រាកដថា ប្រើសមស្របទៅតាមកម្រិតរបស់ថ្នាំ
៥. លើសពីនេះ យើងអាចដោះស្រាយជាមួយក្បាច់ហាត់ប្រាណដូចខាងក្រោមក៏បាន៖
ក្បាច់ផ្អឹបជង្គង់ នឹងដើមទ្រូង៖
ការផ្អឹបជង្គង់នឹងដើមទ្រូង ជួយបន្ធូរភាពតានតឹងសាច់ដុំចង្កេះរបស់យើង។ ជំហានដែលយើងគួរអនុវត្តតាមមានដូចជា៖
ជំហានទី១៖ គេងឲ្យរាបស្មើនឹងឥដ្ឋ
ជំហានទី២៖ ទាញជង្គង់ទាំងសងខាងឡើងមកផ្អឹបនឹងដើមទ្រូង
ជំហានទី៣៖ យកដៃឱបជង្គង់ រួចសង្កត់ថ្នមៗផ្អឹបជង្គង់នឹងដើមទ្រូង
ជំហានទី៤៖ រក្សាលំនឹងនេះឲ្យបាន១៥វិនាទី សឹមលែងមកដាក់ជើងត្រង់ស្មើ រួចធ្វើក្បាច់នេះ២-៣ដងទៀត។
ក្បាច់កូនក្មេង
ក្បាច់កូនក្មេងក៏ជាក្បាច់យូហ្កាដ៏ពេញនិយមមួយទៀត ជួយបន្ធូរភាពតានតឹងសាច់ដុំចង្កេះរបស់យើងដូចគ្នា។ យើងគួរអនុវត្តតាមជំហាននីមួយៗ ដូចជា៖
ជំហានទី១៖ លត់ជង្គង់ចុះដោយដាក់ជង្គង់ឆ្ងាយពីគ្នា (ធំជាងទំហំត្រគាកបន្តិច) ប្រអប់ជើងស្របគ្នា និងបាត់ដៃរាបស្មើលើឥដ្ឋ។
ជំហានទី២៖ អង្គុយចុះថ្នមៗ ដោយឈោងដៃទៅមុខ ដាក់ថ្ងាសឲ្យរាបស្មើនឹងឥដ្ឋ
ជំហានទី៣៖ ព្យាយាមទាញសរសៃសសូង ពត់ខ្លួនឲ្យអស់
ជំហានទី៤៖ រក្សាលំនឹងនេះ២០វិនាទី រួចត្រឡប់ទៅលំនឹងដើមវិញ ហើយធ្វើវា២-៣ទៀត។
[embed-health-tool-bmi]
