ដើរលេងសមុទ្រមធ្យម ងំឡើងភ្នំ មើលប្រាសាទ ឬដើរលេងក្រៅប្រទេស អារម្មណ៍សប្បាយនោះសប្បាយ ហត់យ៉ាងណាក៏ដើររួច ប៉ុន្តែដល់សណ្ឋាគារវិញ គ្មានកម្លាំងអីតិច ហើយឈឺជើង និងកែងជើងទៀត។ បើជួបបញ្ហាហ្នឹង “Hello គ្រូពេទ្យ” មានគន្លឹះពិសេសៗជួយកែខៃបាន៖

១- កម្រើកម្រាមជើង

តាមយន្តហោះ ឡានក្រុង សម្រាកមាត់សមុទ្រ ឬសណ្ឋាគារអី អាចព្យាយាមចង្អុល (កម្រើក) និងឈ្លីម្រាមជើង ៥ វិនាទី ឲ្យបាន ១០ ដង។ វាអាចជួយមិនឲ្យគ្នាយើងរមួលក្រពើ និងធ្វើឲ្យចរន្តឈាមរត់បានស្រួល។

២- ធ្វើសរសៃបាតជើង

ម៉ាស្សាបាតជើងទៀងទាត់ មុនពេលគេងរាល់ថ្ងៃ។

៣- ហាត់ប្រាណត្រង់ជើង

រលាស់ តម្រង់ជើង និងចង្អុលម្រាមទាំងសងខាង មុន ឬពេលហោះហើរ ធ្វើដំណើរផ្លូវឆ្ងាយ ព្រោះអាចការពារមិនឲ្យហើម។ គ្នាយើងអាចឈរ ឬដើរទៅមក ២-៣ នាទី ក្នុងមួយម៉ោងម្តងអំឡុងពេលធ្វើដំណើរ។

៤- ពត់ខ្លួន

ពេលធ្វើដំណើរតាមឡាន ឬយន្តហោះ ត្រូវចេះពត់ខ្លួនរាល់ ១-២ ម៉ោងម្តង។ ដើរ ឬឈរ មិនត្រឹមតែជួយតម្រង់ខ្នងប៉ុណ្ណោះទេ ថែមទាំងជួយសម្រួលសាច់ដុំជើង និងបង្កើនចរន្តឈាមទៀតផង។ ពេលធ្វើដំណើរតាមឡាន ព្យាយាមចុះសម្រាក ទោះបីជាមិនចង់ចូលបន្ទប់ទឹកក៏ដោយ។

៥- បង្វិលកជើង

សម្រួលប្រអប់ជើង និងជើង តាមការបង្វិលកជើងយឺតៗមួយៗ។

៦- ជ្រើសស្បែកជើងងាយស្រួលដើរ

សម្រាប់ស្រីៗគ្នាយើង ចៀសវាងពាក់ស្បែកជើងកែងរាល់ថ្ងៃ។ ស្បែកជើងកែងល្មមៗ ក៏ធ្វើឲ្យជើងយើងមានបញ្ហាដែរ។ ជ្រើសស្បែកជើងរាបស្មើ ស្រួលដើរ អាចជួយបាតជើងរាល់ថ្ងៃ ឯស្បែកជើងកែងទុកសម្រាប់តែទៅកម្មវិធីបានហើយ។ ជ្រើសស្បែកជើងណាផលិតពីវត្ថុធាតុដើម មិនហប់ និងផលិតពីកប្បាស ដើម្បីកុំឲ្យជើងហើម រលាក កកិត និងពងបែក។

៧- ដាក់របស់ទាំងនេះតាមខ្លួន

យកឧបករណ៍ព្យាបាលបឋមទៅជាមួយផង ដូចជា បង់បិទដំបៅ បង់រុំ និងកន្ត្រៃកាត់ក្រចក សម្រាប់គ្នាយើងមានបញ្ហាជើងដោយមិនដឹងខ្លួន ដូចជា មុត ឬឡើងខ្ទុះ។

៨- ដឹងពីស្ថានភាពជើងច្បាស់

បើមានរបួសជើង ឬមានបញ្ហាមិនស្រួល មុនពេលធ្វើដំណើរ ត្រូវពិភាក្សាជាមួយពេទ្យមុនថ្ងៃធ្វើដំណើរ។ ព្យាបាលឲ្យជា កុំឲ្យប៉ះពាល់ដល់ដំណើរកម្សាន្ត ពិសេសសម្រាប់អ្នកទឹកនោមផ្អែម។

៩- ថែទាំសុខភាពជើងប្រចាំថ្ងៃ

– លាងជើងជាមួយទឹកក្តៅឧណ្ហៗ

– តម្រឹមក្រចកឲ្យស្មើ ខាត់ឲ្យរលោងស្អាត

– ពាក់ស្រោមជើងមានអនាម័យស្អាត

– ជូតជើង និងចន្លោះម្រាមជើងឲ្យស្ងួត

– ផ្សើមកែងជើង និងបាតជើង ប៉ុន្តែកុំឲ្យសើម ឬស្អិត ពេលពាក់ស្រោមជើង និងស្បែកជើង។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ទៅណាទៅណី ឧស្សាហ៍ឈឺជើង កែងជើង អាចសាកវិធីទាំងនេះ