មានម៉ាក់ៗជាច្រើនបានឡើងទម្ងន់ និងប្រែរូបរាងទៅជាធាត់ ពេលពពោះនេះឯង តែក៏មានម៉ាក់ៗខ្លះមិនសូវប្រែប្រួលទម្ងន់ខ្លាំងណាស់ណាដែរ។ ចំពោះម៉ាក់ៗដែលមិនសូវឡើងគីឡូ ទោះជាញ៉ាំច្រើនក៏ដោយនោះ តើអាចប៉ះពាល់ដល់ការលូតលាស់របស់កូនដែរ ឬទេ?
លោកវេជ្ជបណ្ឌិត ច័ន្ទ រស្មី ឯកទេសសម្ភព និងរោគស្ត្រី បានឲ្យដឹងថា តាមពិតទៅមិនមែនគីឡូយើងកាន់តែធ្ងន់ កាន់តែល្អនោះទេ ព្រោះនៅពេលដែលធាត់ពេក នឹងធ្វើឲ្យងាយប្រឈមមុខនឹងជំងឺទឹកនោមផ្អែម និងជំងឺលើសសម្ពាធឈាមខ្លាំងទៅវិញទេ ជាហេតុនាំឲ្យប៉ះពាល់ដល់កូនក្នុងផ្ទៃយ៉ាងងាយ ថែមទាំងអាចធ្វើឲ្យប៉ះពាល់ដល់សុខភាពទៀតផង។
វេជ្ជបណ្ឌិតរូបនោះបានណែនាំឲ្យស្ត្រីពពោះទាំងអស់ គួរតែគ្រប់គ្រងទម្ងន់ឲ្យបានល្អ ប្រសិនបើយើងស្គម ក្នុងកំឡុងពេលមានផ្ទៃពោះ គួរតែញ៉ាំឲ្យទម្ងន់ឡើងពីចន្លោះពី ១០ ទៅ ១២ គីឡូទើបប្រសើរ។ ប៉ុន្តែបើរាងធាត់ ក្នុងអំឡុងពេលមានផ្ទៃពោះ ទម្ងន់យើងគួរតែឡើងត្រឹមពី ៧ ទៅ ៨ គីឡូបានហើយ មិនគួរហួសហ្នឹងទេ ទើបមិនប៉ះពាល់ដល់ទារក និងខ្លួនយើងផ្ទាល់។
អ្វីដែលកាន់តែយកចិត្តទុកដាក់ គឺយើងមិនគួរថែរាង ហើយមិនព្រមញ៉ាំអាហារសម្បូរជីវជាតិសោះនោះ អាចធ្វើឲ្យកូនមិនអាចទទួលបានសារធាតុចិញ្ចឹមគ្រប់គ្រាន់ ដោយអាចប៉ះពាល់ដល់ការលូតលាស់របស់កូនបានយ៉ាងងាយ។
ចំពោះរបបអាហារវិញ គឺមិនគួរញ៉ាំរបស់ណាដែលមិនចាំបាច់ ហើយវាប៉ះពាល់ចំពោះសុខភាពឡើយដូចជា fast food គ្រឿងសមុទ្រ និងអាហារផ្អាប់ ក៏មិនគួរដែរ តែត្រូវញ៉ាំបន្លែ ផ្លែឈើ និងពពួកត្រី សាច់ ទើបមានប្រយោជន៍ចំពោះសុខភាព។
អត្ថបទពាក់ព័ន្ធ៖
- កំពុងពពោះ ចេះតែរមាស់អាចបណ្ដាលមកពីជំងឺមួយប្រភេទនេះ
- ស្រីៗមានផ្ទៃពោះ ចង់ញ៉ាំទុរេន ត្រូវដឹងរឿងទាំងនេះ!
- មានផ្ទៃពោះ ញ៉ាំខ្យង ខ្ចៅ លៀស ប៉ះពាល់កូនទេ?
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-due-date]
