អំឡុងពពោះជាពេលដែលស្រីៗយើងថ្នមទាំងខ្លួនប្រាណ តមទាំងចំណីអាហារមួយចំនួនដែលធ្វើឲ្យប៉ះពាល់ដល់សុខភាពម្តាយ ពិសេសកូនក្នុងពោះ។ តាមក្បួនពេទ្យបានហាមប្រាណម៉ាក់ៗដែលមានផ្ទៃពោះមិនឲ្យញ៉ាំ និងធ្វើរឿងមួយចំនួនខាងក្រោមនេះ។
១- ហាមញ៉ាំប្រៃ
មនុស្សធម្មតាញ៉ាំប្រៃមិនល្អទៅហើយ ឯស្រីៗមានផ្ទៃពោះរឹតតែគ្រោះថ្នាក់ខ្លាំង។ បើម៉ាក់ៗមានជំងឺលើសឈាម ឬជំងឺទឹកនោមផ្អែម ហើយញ៉ាំប្រៃទៀតនោះ អាចវិវត្តទៅជាជំងឺបម្រុងក្រឡាភ្លើង-ក្រឡាភ្លើង ប្រកាច់ស្លាប់ទាំងម្តាយទាំងកូន។
២- ហាមញ៉ាំសាច់ច្រើន
សាច់សម្បូរប្រូតេអ៊ីនមែន តែស្រីៗពពោះមិនត្រូវញ៉ាំច្រើនពេកទេ ពិសេសពពួកសាច់ឆៅ ឬឆ្អិនមិនល្អ សាច់កំប៉ុងជាដើម ព្រោះងាយឆ្លងពពួកបាក់តេរី ឬប៉ារ៉ាស៊ីត។ ម្យ៉ាងទៀតការញ៉ាំសាច់ច្រើនពេកធ្វើឲ្យលើសជាតិប្រូតេអ៊ីនទៅជាហើមជើង។
៣- ហាមញ៉ាំថ្នាំដោយគ្មានវេជ្ជបញ្ជា
មានតែថ្នាំប៉ារ៉ាសេតាម៉ុល និងថ្នាំបំបាត់អាការៈផ្តាសាយប៉ុណ្ណោះដែលស្រីៗមានផ្ទៃពោះអាចញ៉ាំបានដោយគ្មានវេជ្ជបញ្ជា ថ្នាំក្រៅពីនោះចាំបាច់ត្រូវទៅជួបគ្រូពេទ្យជាមុន ទើបអាចប្រើបាន មិនប៉ះពាល់ដល់កូនក្នុងពោះ។
៤- ហាមជក់បារី
ជាតិនីកូទីន និងសារធាតុគីមីពុលរាប់ពាន់ប្រភេទផ្សេងទៀតដែលមានក្នុងបារី និងផ្សែងបារីមិនត្រឹមតែធ្វើឲ្យម៉ាក់ៗកើតជំងឺច្រើនមុខទេ អាចធ្វើកូនក្នុងពោះប្រឈមនឹងបញ្ហាសុខភាពទាំងនៅពេលពោះ និងក្រោយពេលសម្រាល ដោយការបឺតស្រូបផ្សែងបារីតាមរយៈទងសុក ដូចជាដំណើរការមុខងាររបស់សុកមិនបានល្អ អាចធ្វើឲ្យកូនរលូត កើតមុនកំណត់ កូនលូតលាស់មិនល្អ មិនគ្រប់គីឡូ-មិនគ្រប់លក្ខណៈ មានបញ្ហាផ្លូវដង្ហើម សួត ឬកើតមកស្លាប់។
អត្ថបទពាក់ព័ន្ធ៖ កូនក្នុងពោះទៅជាយ៉ាងណា បើម៉ាក់ៗជក់ ឬនៅជិតអ្នកជក់បារី?
៥- ហាមផឹកស្រា
គ្រូពេទ្យហាមស្រីៗមានផ្ទៃពោះមិនឲ្យផឹកគ្រឿងស្រវឹងគ្រប់ប្រភេទ ព្រោះជាតិអាល់កុលដែលមានក្នុងគ្រឿងស្រវឹងធ្វើឲ្យប៉ះពាល់ដល់ការលូតលាស់ និងខួរក្បាលកូនក្នុងពោះ។
៥- ហាមផឹកកាហ្វ
ជាតិកាហ្វេអ៊ីនក៏មានផលប៉ះពាល់ដល់ការលូតលាស់របស់កូនក្នុងពោះដែរ ដូច្នេះម៉ាក់ៗមិនត្រូវញ៉ាំនោះទេ ឬបើញៀនអត់មិនបាន យើងត្រូវកាត់បន្ថយឲ្យនៅចំនួនតិច។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-due-date]
