បើរវល់ ហើយចង់រក្សាអត្ថបទទុកអានពេលក្រោយច្រើនប៉ុណ្ណាក៏បាន គ្រាន់តែ Login ហើយចូលទៅកាន់ សុខភាពខ្ញុំ ឥឡូវនេះ!

មាតិកា

រង្វាស់សុខភាព

ចែករំលែក

សប្តាហ៍ទី ៤២៖ គួរឲ្យបារម្ភអត់ ពេលនេះហើយនៅមិនទាន់សម្រាលទៀត?

ការលូតលាស់គភ៌

១- បេប៊ីលូតលាស់ដល់ណាហើយ?

សប្តាហ៍ទី ៤២៖ គួរឲ្យបារម្ភអត់ ពេលនេះហើយនៅមិនទាន់សម្រាលទៀត?

ផ្ទុយទៅវិញភាគច្រើនកើតក្នុងអំឡុងពេល ២ សប្ដាហ៍នៃថ្ងៃបានកំណត់ មានន័យថាបើបេប៊ីមិនទាន់កើតនៅអំឡុងពេលនេះ ក៏មិនមានអ្វីជាការបារម្ភដែរ។ ៩៨% បេប៊ីច្រើនកើតមុនចុងសប្ដាហ៍ទី ៤២ ដូចនេះ អូនៗនឹងកើតលឿនជាងការគិតរបស់យើង។

ដំណាក់កាលនេះ អូនៗអាចមានទំហំប៉ុនផ្លែខ្នុរ ឬផ្លែឪឡឹក តែកុំទាន់ភ័យអី ទោះបីជាអូនៗមានទំហំធំក៏ពិតមែន តែយើងនៅអាចសម្រាលតាមធម្មជាតិបាន។

យ៉ាងណាមិញទោះបីជារឿងធម្មតាក៏ដោយ តែបេប៊ីដែលក្រកើតអាច មានបញ្ហាគួរឲ្យកត់សម្គាល់ ដូចជា សក់ ឬក្រចកវែងជាងក្មេងធម្មតា ស្បែកស្ងួត របក ប្រេះ ឬជ្រួញជាដើម។ បញ្ហាទាំងនេះភាគច្រើនកើតឡើងតែក្នុងរយៈពេលខ្លីប៉ុណ្ណោះ ដោយសារតែក្នុងអំឡុងពេលកំណត់ត្រូវសម្រាលនោះ ទឹករំអិលការពារទារកក្នុងផ្ទៃ ចាប់ផ្តើមស្រកចុះបន្តិចម្តងៗ។

បម្រែបម្រួលរាងកាយ

២- រាងកាយម៉ាក់ៗប្រែប្រួលបែបណាខ្លះ?

នៅសប្ដាហ៍ទី ៤២ យើងអាចមានរោគសញ្ញាដូចជាសប្ដាហ៍មុនៗ រួមមាន រមួលក្រពើ ពិបាកគេង ឈឺចង្កេះ ធ្ងន់ត្រគាក ឫសដូងបាត នោមញឹក និងការកន្ត្រាក់ជាដើម។ មិនតែប៉ុណ្នោះ បញ្ហាស្ត្រេស ក៏អាចកើតមានដូចគ្នា។

អ្វីយើងអាចធ្វើបានដើម្បីខ្លួនឯង និងអូនៗក្នុងផ្ទៃ គឺព្យាយាមសម្រាកឲ្យបានច្រើន និងរង់ចាំឲ្យបេប៊ីកើតចេញដោយខ្លួនឯង។

ត្រូវចាំថាបេប៊ីអាចកើតនៅចុងសប្ដាហ៍ ដូចនេះគួរមានការប្រុងប្រយ័ត្នចំពោះសញ្ញានៃការសម្រាលរួមមាន៖

– ចេញជាតិរម្អិល (អាចជាឈាម )

– បែកទឹកភ្លោះ

– ការកន្ត្រាក់ថេរ និងខ្លាំងក្នុងចន្លោះពេលខ្លី

ចំណុចអីខ្លះគួរបារម្ភ?

ខណៈពេលបញ្ហានេះមិនមានគ្រោះថ្នាក់ក៏ដោយ តែសម្រាប់គ្នាយើងមានជំងឺ និងកំពុងពពោះ ៤២ សប្ដាហ៍ ប្រឈមខ្ពស់ទៅនឹងផលវិបាកដូចជា៖

– សុកមានបញ្ហា

– ទឹកភ្លោះតិច

– ទងសុកត្បៀត

– តម្រូវឲ្យទៅផ្នែកសង្រ្គោះបន្ទាន់សម្រាប់ទារក (neonatal intensive care unit)

– អាចមានរបួសក្នុងអំឡុងពេលសម្រាល

– តម្រូវឲ្យវះកាត់សម្រាល

ការជួបគ្រូពេទ្យ

៣- គួរប្រាប់អីខ្លះទៅពេទ្យ?

ការណាត់ជួបជាមួយពេទ្យ យើងគួរពិភាក្សាររាល់ផលវិបាកអាចកើតមានអំឡុងពេលមានផ្ទៃពោះនេះ ដូចជា ផលវិបាកបានរៀបរាប់ខាងលើ។

នៅសប្ដាហ៍ទី ៤២ យើងគួរតាមដានរាប់ចំនួនបេប៊ីកម្រើក តាមដែលអាចធ្វើបាន ដូចទៅនឹងត្រីមាសទី ៣ ។ បើចំនួនកម្រើកមានការផ្លាស់ប្ដូរ គួរប្រាប់ទៅគ្រូពេទ្យ ឬឆ្មបជាបន្ទាន់។

សញ្ញាផ្សេងទៀត យើងគួរប្រុងប្រយ័ត្នមាន ដូចជា ហូរទឹករម្អិលខុសធម្មតា ហូរឈាម ឬឈឺពោះ។ បើប្រទះសញ្ញាទាំងនេះ ត្រូវតែប្រាប់គ្រូពេទ្យជាបន្ទាន់។

តេស្តអីខ្លះចាំបាច់?

ក្នុងដំណាក់កាលនេះ រឿងសំខាន់បំផុត គឺត្រូវទទួលការមើលថែដិតដល់ពីគ្រូពេទ្យ ដោយសារតែបេប៊ីកើតយឺតពេល អាចប្រឈមខ្ពស់ទៅនឹងផលវិបាក ច្រើនជាងបេប៊ីកើតតាមការកំណត់។

ដរាបណាអូនៗស្ថិតក្រោមការឃ្លាំមើលយ៉ាងយកចិត្តទុកដាក់ ហើយមិនបង្ហាញសញ្ញាគួរឲ្យព្រួយបារម្ភនោះទេ ក៏មិនមានអ្វីត្រូវបារម្ភដែរ។

អំឡុងពេលនេះ ពេទ្យអាចនឹងធ្វើតេស្តមួយចំនួន ដើម្បីបញ្ជាក់ថាបេប៊ីមានសុខភាពល្អ។ តេស្តទាំងនោះរូមមាន ពិនិត្យអេកូនៅសប្ដាហ៍ទី ៤២ (Non-stress test) និងតេស្តការកន្ត្រាក់របស់ទារក។ គោលបំណងធ្វើតេស្តនេះ ដើម្បីបញ្ជាក់ថាបេប៊ីធ្វើចលនាបានល្អ ចង្វាក់ដង្ហើមល្អ មានទឹកភ្លោះគ្រប់គ្រាន់ និងចង្វាក់បេះដូងមានសុខភាពល្អ។

ដោយសារតែយើងមានការប្រឈមនឹងគ្រោះថ្នាក់ គ្រូពេទ្យអាចនឹងធ្វើការជំរុញពេលសម្រាល។ វិធីចាំបាច់ណាស់ បើតេស្តបង្ហាញថា បេប៊ីមិនអាចនៅក្នុងពោះយូរជាងនេះទៀត ការជំរុញឲ្យឆាប់សម្រាលច្បាស់ជាត្រូវធ្វើឡើងរួមមាន៖

– ច្បូតភ្នាសស្បូន៖ គ្រូពេទ្យនឹងយកដៃរកកិតនឹងថងទឹកភ្លោះ នាំឲ្យមានការបញ្ចេញអ័រម៉ូន ធ្វើឲ្យមានការកន្ត្រាក់អំឡុងពេល ៤៨ ម៉ោងក្រោយ។

– បំបែកថង់ទឹកភ្លោះ៖ គ្រូពេទ្យនឹងបំបែកថង់ទឹកភ្លោះ ដោយប្រើឧបករណ៍ជំនួយវេជ្ជសាស្ត្រ។

វិធីនេះនាំឲ្យមានការកន្ត្រាក់ក្នុងរយៈពេល ២-៣ ម៉ោង។

– បើកមាត់ស្បូន៖ គ្រូពេទ្យនឹងបញ្ចូលថ្នាំមួយប្រភេទគេស្គាល់ថា Prostaglandin ទៅក្នុងទ្វាមាស។ អំឡុងពេលមួយយប់ ថ្នាំនេះនឹងជួយឲ្យស្បូនបើក។

– ជំរុញការកន្ត្រាក់៖ គេចាក់ថ្នាំសំយោគពីអុកស៊ីតូស៊ីនតាមសរសៃ ថ្នាំនេះជំរុញឲ្យមានការកន្រ្តាក់ស្បូន។

សុខភាព និងសុវត្ថិភាព

៤- ត្រូវដឹងពីអីខ្លះ?

ទាំងនេះ គឺជាគន្លឹះអាចជួយយើងបាន មានដូចជា៖

– ប្រាប់ព័ត៌មានទៅគ្រូពេទ្យឲ្យបានទៀងទាត់

– ពិភាក្សាយ៉ាងម៉ត់ចត់ជាមួយពេទ្យ ពាក់ព័ន្ធការសម្រេចចិត្តរបស់យើង

– កុំប្រងើយកន្តើយចំពោះតេស្តណាមួយ

– ដើរឲ្យបានច្រើន

– ព្យាយាមកុំឲ្យមានអារម្មណ៍ស្ត្រេសច្រើន

– ប្រុងប្រយ័ត្នចំពោះរោគសញ្ញា ដូចជា ឈឺត្រគៀក ពិបាកគេង ការកន្ត្រាក់ និងសញ្ញាចំពោះអ្នកមានផ្ទៃពោះផ្សេងទៀត មិនថាធ្ងន់ ឬស្រាលឡើយ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ គ្រូពេទ្យឯកទេស.វេជ្ជ. ចាន់ ស៊ីណេតឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ Leng Pechsovatey · កែ 05/09/2019

សប្តាហ៍ទី ៤២៖ គួរ​ឲ្យ​បារម្ភ​អត់ ពេល​នេះ​ហើយ​នៅ​មិន​ទាន់​សម្រាល​ទៀត?

ការលូតលាស់គភ៌

បម្រែបម្រួលរាងកាយ

ការជួបគ្រូពេទ្យ

សុខភាព និងសុវត្ថិភាព

សប្តាហ៍ទី ៤២៖ គួរឲ្យបារម្ភអត់ ពេលនេះហើយនៅមិនទាន់សម្រាលទៀត?