ស្ត្រីពពោះពេលខ្លះ ឃ្លាននេះឃ្លាននោះស្ទើរទ្រាំមិនបាន បែរពេលខ្លះអត់ឃ្លានអីទាំងអស់ ឃើញអីក៏រអើម ចង់ឆ្កួត ញ៉ាំមិនចូល។ ទោះយ៉ាងណា ត្រូវញ៉ាំឲ្យបានច្រើន ព្រោះអំឡុងពេលពពោះ ទាំងម៉ាក់ៗ និងបេប៊ីក្នុងផ្ទៃ សុទ្ធតែត្រូវការអាហារទ្រទ្រង់ការលូតលាស់ជាចាំបាច់។ “Hello គ្រូពេទ្យ’ នឹងប្រាប់មូលហេតុពិត ធ្វើឲ្យយើងសុខៗលែងឃ្លានអាហារ អំឡុងពេលពពោះ។
១- ធុំអាហារអំឡុងពេលពពោះ
ស្ត្រីមានផ្ទៃពោះជាងពាក់កណ្តាលធុំអាហារមួយភាគធំ ញ៉ាំអាហារមិនចូល ទាំងឃ្លានអាហារទាំងនោះខ្លាំងប៉ុនណាក៏ដោយ។ ពេលធុំអាហារណាមួយ យើងនឹងលេចចេញអាការៈចាញ់គភ៌ ចង្អោរ និងក្អួត គ្រប់ពេល ទាំងព្រឹក ថ្ងៃ ល្ងាច និងយប់។ ជាធម្មតា បញ្ហាធុំអាហារ និងអាការៈចាញ់ភាគច្រើន មានរយៈពេល ១ អាទិត្យ កើតនៅអំឡុងត្រីមាសទី១ ក្រោយនៃការពពោះ។ ប៉ុន្តែ បើអាការៈធុំអាហារ ញ៉ាំអីរកតែក្អួត នៅបន្តលើពាក់កណ្តាលត្រីមាសដំបូង វាអាចបន្តដល់ទៅ ៩ ខែ ឬក្រោយសម្រាល ទើបអាចត្រលប់មករកភាពប្រក្រតីវិញ។
ករណីធុំអាហារ ញ៉ាំមិនចូលអំឡុងពេលពពោះ មកទល់នឹងពេលនេះ នៅតែជាអាថ៌កំបាំងធម្មជាតិមួយដែលយើងនៅតែមិនអាចយល់បានច្បាស់។ អ្នកវិទ្យាសាស្ត្រជឿថា អាចជាក់ពាក់ព័ន្ធការចាប់ផ្តើមបម្រែបម្រួលអ័រម៉ូន HCG អំឡុងពេលពពោះ ដែលជាកត្តារួមចំណែកចម្បងធ្វើឲ្យយើងមិនឃ្លានចំណី ព្រោះអ័រម៉ូននេះនឹងកើនឡើងខ្ពស់បំផុតនៅត្រីមាសទី១ អំឡុងសប្តាហ៍ទី ១១ ហើយនឹងធ្លាក់ចុះវិញ ក៏ជាពេលស្រីៗពពោះ ចាប់ផ្តើមចង្អោរ និងក្អួត ដូចគ្នា។
អត្ថបទពាក់ព័ន្ធ៖
- បម្រាមចំពោះស្រីៗមានផ្ទៃពោះ ម៉ាក់ៗត្រូវធ្វើឲ្យបាន
- ១០ សំណួរជុំវិញទស្សនៈយល់ខុសអំពីការមានផ្ទៃពោះ
២- តួនាទីអ័រម៉ូន
អ័រម៉ូនផ្សេងៗក៏រួមចំណែកធ្វើឲ្យមានការប្រែប្រួលក្លិន និងរសជាតិយើងញ៉ាំដូចគ្នា។ អំឡុងពេលពពោះ អាការៈឃ្លាន និងរសវិញ្ញាណយើង កើនឡើងខ្លាំង ក្លិនអាហារឆួល អាចធ្វើឲ្យចង្អោរ ក្អួត ប៉ុន្តែក៏មិនកើតលើស្រីៗពពោះទាំងអស់នោះដែរ។ ស្រីៗភាគច្រើន ធុំក្លិនសាច់មាន់ ក៏ធ្វើឲ្យចង់ក្អួត ឬចង្អោរភ្លាមៗ ទាំងសាច់មាន់គ្មានក្លិនឆួល។
បម្រែបម្រួលអ័រម៉ូន បង្កើនការបញ្ចេញទឹកមាត់ច្រើន ពេលខ្លះអាចប្រែទៅជារសជាតិលោហធាតុ នៅក្នុងទឹកមាត់ ពេលខ្លះទៀត ទោះជាអាហារនោះមិនធ្វើឲ្យប្រតិកម្មចាញ់គភ៌ក៏ដោយ ប៉ុន្តែគ្នាយើង អាចនឹងមិនឃ្លានទាល់តែសោះ។ អ្នកជំនាញលើកឡើងថា អ័រម៉ូនជាមូលហេតុចម្បងនៃការចាប់ផ្តើម និងបញ្ចប់អាការៈធុំអាហារអំឡុងពេលពពោះ។
យ៉ាងណា ស្រីៗចាញ់កូន មិនប្រឈមហានិភ័យរលូត គភ៌ស្លាប់ក្នុងផ្ទៃ និងកើតមុនខែនោះទេ។ ប៉ុន្តែត្រូវចាំថា នៅ ៣ ខែដំបូងនៃការពពោះ ពេលយើងធុំអាហារ ជាពេលដែលការលូតលាស់របស់គភ៌ងាយរងគ្រោះដូចគ្នា។ រឿងធុំអាហារ ឬញ៉ាំមិនចូល គ្មានអីប៉ះពាល់ធ្ងន់ធ្ងរដល់កូនក្នុងផ្ទៃ និងម៉ាក់ៗដែរ ទោះបីជាពេលខ្លះមិនបានញ៉ាំអាហារដែលល្អសម្រាប់សុខភាពក៏ដោយ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញ វេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-pregnancy-weight-gain]
