ជំងឺរាករូស ជាជំងឺទូទៅមួយ អាចកើតលើមនុស្សគ្រប់វ័យ មិនរើសពេល ក៏មិនចម្លែកទេ បើកើតស្រីៗកំពុងពពោះ ព្រោះពេលខ្លះអាចមកពីការផ្លាស់ប្ដូរអ័រម៉ូន និងរាងកាយ ពេលខ្លះអាចមកពីការឆ្លងមេរោគ ឬពោះវៀនដំណើរការខុសប្រក្រតី។ ចុះបើរាករូស អំឡុងពេលពពោះ គួរឲ្យបារម្ភអត់ តើត្រូវធ្វើម៉េច? ចង់ដឹង អានអត្ថបទ “Hello គ្រូពេទ្យ’ ដឹងថា។
ឧស្សាហ៍រាកពេលពពោះ មានមូលហេតុអីខ្លះ?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១- រាកដោយសារផ្លាស់ប្ដូរអ័រម៉ូន
នៅពេលពពោះ អ័រម៉ូន Prostaglandin ដូចជា Oxytocin កើនឡើង ដើម្បីជួយភ្ញោចការកន្ត្រាក់ក្នុងស្បូន ទន្ទឹមនឹងនោះ ក៏បង្កើនចលនាប្រព័ន្ធរំលាយអាហារដែរ។ បើសិនលាមកឆ្លងកាត់តាមពោះវៀនធំលឿនពេក នឹងបណ្ដាលទៅជារាក។
២- រាកដោយសារមេរោគក្នុងពោះវៀន
មេរោគក្នុងពោះវៀន បង្កឡើងដោយពពួកសរីរាង្គតូចល្អិត ដូចជា ពពួកបាក់តេរី Escherichia, Coli Campylobacter, Salmonella ឬ Shigella Genera ក៏ដូចជាពពួកវីរុស និងប៉ារ៉ាស៊ីត Giardia lamblia Cryptosporidium enteritis ជាដើម។ ពួកវាចម្លងចូលក្នុងខ្លួនយើង តាមរយៈការញុាំចំណីអាហារ ឬទឹកមិនស្អាត។ ស្រីពពោះមានផ្ទុកមេរោគទាំងនេះ តែងមានរោគសញ្ញា ដូចជា បត់ជើងចេញឈាម ក្អួតចង្អោរ គ្រុនក្ដៅ ឬវិលមុខធេងធោង។
៣- រាកដោយសារពោះវៀនដំណើរការខុសប្រក្រតី
ជំងឺរាករ៉ាំរ៉ៃ អាចបង្កឡើងដោយសារជំងឺក្រពះពោះវៀនធ្ងន់ធ្ងរ ដូចជា ជំងឺរលាកពោះវៀន ដំបៅពោះវៀនធំ ឬជំងឺហើមពោះ ហើយវាមានរោគសញ្ញា ដូចជា ចុករមួលពោះ ហើម ឬឆ្អល់ពោះ ស្រកទម្ងន់ ហេវហត់ អស់កម្លាំង ក្អួតចង្អោរ មានបញ្ហាស្បែក ឬសន្លាក់ និងស្លេកស្លាំង។
៤- រាកដោយសារកត្តាផ្សេងៗ
ក្រៅពីកត្តាធំៗខាងលើ ស្រីៗកំពុងពពោះ អាចមានអាការៈរាករូសដោយសារបញ្ហាមួយចំនួនទៀតដូចជា៖
– ប្រតិកម្មអាហារ
– ការផ្លាស់ប្ដូររបបអាហារ
– តានតឹង តប់ប្រមល់
– ការប្រើប្រាស់ថ្នាំមួយចំនួន
– ញុាំអាហារមានជាតិស្ករខ្ពស់ និងផឹកគ្រឿងស្រវឹង។
៥- រាកអំឡុងពេលពពោះត្រូវធ្វើម៉េច?
ជំងឺរាករូស អាចបណ្ដាលឲ្យស្រីៗពពោះ ខ្សោះជាតិទឹក និងខ្វះជីជាតិ អាចប៉ះពាល់សុខភាពទាំងម៉ាក់ៗ និងគភ៌។ សូមប្រញាប់ជួបពិគ្រោះជាមួយគ្រូពេទ្យ បើសិនមានធ្វើទុកក្នុងខ្លួនដូចខាងក្រោម៖
– បត់ជើងមកមានឈាម ឬសំបោរ
– រាកយូរលើសពី ៤៨ម៉ោង
– រាកចាប់ពី ៦ដង ក្នុងមួយថ្ងៃ
– គ្រុនក្ដៅលើសពី ៣៩អង្សារសេ
– ឧស្សាហ៍ក្អួត
– ចុកពោះខ្លាំង
– ស្ងួតមាត់ ស្រេកទឹកមិនបាត់ បត់ជើងតូចតិច និងមានពណ៌ក្រមៅ។
ថ្វីត្បិតអាការៈរាក ជារឿងសាមញ្ញ តែងស្រីៗកំពុងពពោះ មិនត្រូវធ្វេសប្រហែសទេ គួរពិភាក្សាជាមួយគ្រូពេទ្យជំនាញ បើមានរោគសញ្ញាសង្ស័យគ្រោះថ្នាក់ដូចបានរៀបរាប់ខាងលើ មិនត្រូវផ្សំថ្នាំ ឬលេបថ្នាំដែលគ្មានវេជ្ជបញ្ជាត្រឹមត្រូវនោះទេ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម