ដេរមាត់ស្បូន មានប្រយោជន៍អីខ្លះ ប្រឈមអីខ្លះ?

ស្រីៗមានបញ្ហាសុខភាពច្រើនជាងប្រុសៗ ពិសេសក្រោយសម្រាលកូន អាចប្រឈមបញ្ហាសុខភាពមួយចំនួន ដូចជា កើតមានសង្វារលើពោះ រហែកទ្វារមាស ឬឡើងគីឡូ ខូចរាងលែងស្អាតក៏មាន។ យ៉ាងណា បញ្ហាទាំងនេះជារឿងទូទៅទេ ចុះមានធ្លាប់ឮដេរមាត់ស្បូនអត់? បើធ្លាប់ឮ ដឹងគេដេរដើម្បីអីអត់? ចង់ដឹងច្បាស់ “Hello គ្រូពេទ្យ’ មួយនេះ នឹងពន្យល់គ្នាយើងឲ្យបានដឹង។

១- អ្វីជាការដេរមាត់ស្បូន?

ដេរមាត់ស្បូន ជាភាសាបច្ចេកទេសហៅថា Cervical Cerclage ត្រូវបានធ្វើក្នុងអំឡុងពេលមានផ្ទៃពោះ ឬមុនពេលពពោះ ដើម្បីការពារកុំឲ្យមានការបាត់បង់កូនក្នុងពោះ ឬការពារកុំឲ្យសម្រាលកូនមិនគ្រប់ខែ។ វិធីដេរ គឺថាគ្រូពេទ្យ នឹងប្រើអំបោះដេរបិទមាត់ស្បូន (ទ្វារដែលតភ្ជាប់រវាងស្បូន និងទ្វាមាស) តែម្តង។

ការដេរមាត់ស្បូន មានពីរប្រភេទ ដោយទី ១ គេដេរផ្ទាល់ទៅលើមាត់ស្បូន ហៅថា Transvaginal Cervical Cerclage) ត្រូវធ្វើតាមច្រកទ្វារមាស ខណៈប្រភេទទី ២ មិនសូវមានប្រជាប្រិយភាពទេ ដោយការដេរតាមពោះ ហៅថា Transabdominal Cervical Cerclage)។ យ៉ាងណា គ្រប់ប្រភេទដេរទាំងអស់ ពេទ្យត្រូវរូសចេសចេញវិញ នៅពេលយើងពពោះឈានដល់សប្ដាហ៍ទី ៣៧។

២- ហេតុអីត្រូវដេរមាត់ស្បូន?

ជាធម្មតាមាត់ស្បូនបិទជិត ហើយរឹង ប៉ុន្តែនៅពេលស្រីៗមានផ្ទៃពោះ មាត់ស្បូននឹងប្តូរទៅជាសភាពទន់ និងមានប្រវែងខ្លី ហើយបើកចំហដើម្បីត្រៀមសម្រាលកូន។ តែចំពោះមាត់ស្បូនមានភាពទន់ខ្សោយនោះ មាត់ស្បូនយើងនឹងបើកលឿនជាងការកំណត់ អាចនាំឲ្យកើតមានការសម្រាលកូនមិនគ្រប់ខែ។

បើស្បូនស្រីៗ បើកមុនថ្ងៃសម្រាល ទារកអាចនឹងប្រឈមនឹងគ្រោះថ្នាក់ដល់ជីវិត ហេតុនេះគ្រូពេទ្យនឹងផ្តល់យោបល់ឲ្យធ្វើការដេរមាត់ស្បូន នេះតែម្តង។ ទោះជាយ៉ាងណា ក៏មិនមែនគ្រប់ស្ត្រីទាំងអស់ សុទ្ធតែអាចធ្វើការដេរមាត់ស្បូនបានទេ ដោយសារការដេរមានផលប៉ះពាល់ធ្ងន់ធ្ងរមួយចំនួនចំពោះស្រីៗគ្នាយើង ក៏មិនអាចជួយការពារកើតមុនខែបានគ្រប់ករណីដែរ។ មុនពេលសម្រេចចិត្តដេរមាត់ស្បូន គ្នាយើងគ្រប់រូប គួរយល់ដឹងពីផលវិបាក និងអត្ថប្រយោជន៍ទាំងអស់ ដែលអាចកើតមានឡើង។

៣- ស្រីៗពពោះដែលចាំបាច់ត្រូវដេរមាត់ស្បូន

– មានប្រវត្តិរលូតកូនពីមុនអំឡុងត្រីមាសទី ២ នៃការពពោះ និងបង្កឲ្យមានការរីកចំហមាត់ស្បូន ខ្វះកម្លាំងពេលសម្រាល ឬបញ្ហារបើកសុក ជាដើម។

– មានការដេរមាត់ស្បូនពីមុន បណ្តាលមកពីមាត់ស្បូនបានរីកចំហក្នុងអំឡុងត្រីមាសទី ២។

– បានធ្វើការពិនិត្យរាងកាយ និងមានរោគវិនិច្ឆ័យ មានបញ្ហារីកចំហមាត់ស្បូនដោយមិនមានការឈឺចាប់នៅត្រីមាសទី ២ ។

– ធ្លាប់មានកូនភ្លោះ និងកើតចេញម្តងទាំងពីរតែម្តង (Singleton pregnancy) និងបានធ្វើរោគវិនិច្ឆ័យថា មានមាត់ស្បូនខ្លី (តិចជាង ២៥ មិល្លីម៉ែត្រ) តាមរយៈការមើលអេកូ មុនសប្តាហ៍ទី ២៤ នៃការពពោះ។

– មានផ្ទៃពោះពីមុន ធ្លាប់សម្រាលកូនមិនគ្រប់ខែ គឺមុនសប្តាហ៍ទី ៣៤។

អត្ថបទពាក់ព័ន្ធ៖

៥ យ៉ាងត្រូវដឹងពីអាការៈ និងការប្រែប្រួលអារម្មណ៍ស្រីៗពពោះ
ហេតុអីគ្រូពេទ្យណែនាំឲ្យស្រីៗពពោះ គេងផ្អៀងទៅខាងឆ្វេង?

៤- ស្ថានភាពសុខភាព ដែលស្រីមិនគួរដេរមាត់ស្បូន

គ្រូពេទ្យនឹងមិនអនុញ្ញាត្តិយើងដេរមាត់ស្បូនទេ បើយើងកំពុងពពោះ និងស្ថិតក្នុងលក្ខខណ្ឌដូចខាងក្រោម៖

– ហូរឈាមក្នុងទ្វាមាស

– កើតកូនមុនខែ

– ស្បូនមានការឆ្លងមេរោគ

– លេច ឬធ្លាយថង់ទឹកភ្លោះ មុនសប្តាហ៍ទី ៣៧

– ធ្លាប់មានគភ៌ច្រើនដង

– កូនកើតមក មានការវិវត្ត ឬលូតលាស់មិនប្រក្រតី (Fetal abnormalities)

– ស្រុតស្រោមទឹកភ្លោះចូលទៅក្នុងទ្វាមាស

ក្នុងអំឡុងត្រីមាសទី ២ បើទ្វាមាសយើងមានការរីកចំហ នេះជាបញ្ហាសុខភាពធម្មតាដែលកើតមាន ដូច្នេះគួរដេរមាត់ស្បូនឡើយ។

៥- មានអ្វីកើតឡើងក្រោយដេរមាត់ស្បូន?

ក្រោយការដេរមាត់ស្បូន ត្រូវរកជំនួយវេជ្ជសាស្ត្រជាបន្ទាន់ក្នុងករណី៖

– មានការកន្រ្តាក់ ឬរមួលសាច់ដុំ

– មានការឈឺចាប់នៅពោះផ្នែកខាងក្រោម និងខ្នងស្រដៀងនឹងការឈឺពោះកើតកូន

– មានហូរឈាមក្នុងទ្វាមាស

– ក្តៅខ្លួនលើសពី ៣៧,៨ អង្សារសេ

– រងាញាក់

– មានអារម្មណ៍ចង់ក្អួត ឬចង្អោរ

– ធ្លាក់សមិនប្រក្រតី

– លេច ឬធ្លាយដាច់ថង់ទឹកភ្លោះ

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ ចាន់ សុខឡាង · កែ 22/07/2019

ដេរមាត់ស្បូន មាន​ប្រយោជន៍អីខ្លះ ប្រឈមអីខ្លះ?

ដេរមាត់ស្បូន មានប្រយោជន៍អីខ្លះ ប្រឈមអីខ្លះ?