បើតាមគំនិតចាស់ៗតែងតែឲ្យស្ត្រីមានផ្ទៃពោះផឹកទឹកដូងឲ្យបានច្រើន ជាពិសេសពេលជិតសម្រាល ត្រូវផឹកទឹកដូងទុំរាល់ថ្ងៃ ដើម្បីឲ្យស្រួលកើតកូន។ មូលហេតុដែលចាស់ៗជឿថា ទឹកដូងទុំអាចជួយឲ្យកូនកើតបានស្រួល ព្រោះតែមានជាតិប្រេងច្រើនដែលមានភាពរអិលចំណុចនោះហើយទើបម៉ាក់ៗមួយចំនួននៅតែបន្តជឿ និងអនុវត្តមកដល់សព្វថ្ងៃ។ តើការអះអាងបែបនេះត្រឹមត្រូវដែរឬទេ?
លោកវេជ្ជបណ្ឌិត ចាន់ ស៊ីណេត ប្រធានផ្នែកសម្ភព និងរោគស្ត្រី នៃមន្ទីរពេទ្យបង្អែកមិត្តភាពកម្ពុជា-ចិន សែនសុខ បានឲ្យដឹងថា ទឹកដូងពិតជាមានអត្ថប្រយោជន៍ច្រើនណាស់ចំពោះអ្នកមានផ្ទៃពោះ ព្រោះសម្បូរសារធាតុច្រើនរ៉ែច្រើនប្រភេទ ដូចជា ប៉ូតាស្យូម ម៉ាញេស្យូម កាល់ស្យូម និងផូស្វរ។ តួនាទីសំខាន់របស់សមាសធាតុរ៉ែទាំងនោះ គឺជួយក្នុងការទ្រទ្រង់រាងកាយរបស់ស្រី្តពីការបាត់បង់សារធាតុរ៉ែក្នុងខ្លួន។ តួនាទីផ្សេងទៀត គឺជួយរក្សាស្ថិរភាពជាតិអាស៊ីដអ៊ុយរិច ក្នុងឈាម កាត់បន្ថយការកើតគ្រួសក្នុងតម្រងនោម និងបង្ការករោគក្នុងផ្លូវទឹកនោម។
អត្ថបទពាក់ព័ន្ធ៖ ពេលពពោះម៉ាក់ៗញ៉ាំហឹរ កូនកើតមកឈឺភ្នែក ពិតអត់?
មិនត្រឹមតែប៉ុណ្ណោះទឹកដូងមានកំរិតជាតិស្ករតិច ជួយផ្ដល់ថាមពលចំពោះយើង និងជួយដល់កូនក្នុងផ្ទៃទទួលសារធាតុចិញ្ចឹមគ្រប់គ្រាន់ រក្សាលំនឹងផលិតទឹកភ្លោះក្នុងកម្រិតល្អសម្រាប់ទារកក្នុងផ្ទៃ។ តែសម្រាប់ទឹកដូងទុំដែលចាស់ៗថាជួយឲ្យកូនកើតស្រួលមិនមែនជាការពិតឡើយ ដោយខាងវិទ្យាសាស្ត្រមិនបានបញ្ជាក់ថាវាអាចជួយអ្វីបាននោះទេ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-pregnancy-weight-gain]
