ការរំលូតកូនដោយគ្មានសុវត្ថិភាពច្រើនកើតមាននៅប្រទេសកំពុងអភិវឌ្ឍ ហើយកត្តាមួយចំនួនធ្វើឲ្យស្ត្រីមានផ្ទៃពោះ ឬមានផ្ទៃពោះដោយចៃដន្យ មិនអាចទទួលបានការរំលូតកូនដោយសុវត្ថិភាព និងពេលខ្លះអាចមានគ្រោះថ្នាក់ដល់ជីវិតទៀតផង។
របាយការណ៍អង្គការសុខភាពពិភពលោក ចន្លោះឆ្នាំ២០១០ និង២០១៤ បង្ហាញថាស្រ្តីទៅរំលូតកូនមានជាង៥៦លាននាក់នៅទូទាំងពិភពលោក ដែលភាគច្រើនកើតនៅក្នុងប្រទេសកំពុងអភិវឌ្ឍ និងប្រហែលជា២៥លាននាក់គឺជាការរំលូតកូនដោយគ្មានសុវត្ថិភាព។ ពាក់កណ្តាលចំនួនទាំងអស់នៃការរំលូតកូនដោយគ្មានសុវត្ថិភាពកើតឡើងនៅបណ្ដាប្រទេសក្នុងទ្វីបអាស៊ី។ រីឯនៅអាហ្វ្រិកហានិភ័យនៃការស្លាប់ដោយការរំលូតកូនដោយគ្មានសុវត្ថិភាពគឺខ្ពស់ជាងគេ។
អត្ថបទពាក់ព័ន្ធ៖ រំលូតកូនប្រឈមបញ្ហាអីខ្លះ?
ការរំលូតកូនដោយគ្មានសុវត្ថិនៅតែជាកត្តាប្រឈមមួយដែលបណ្ដាលឲ្យស្រ្តីមានផ្ទៃពោះបាត់បង់ជីវិត ឬហៅថាមរណមាតា បើទោះបីជាការស្លាប់ដោយសារការរំលូតកូននេះភាគច្រើនបំផុតសុទ្ធតែអាចជៀសបានក៏ដោយ។ របាយការណ៍មួយចេញផ្សាយកាលពីឆ្នាំ២០១៨ បានបង្ហាញថាស្រ្តី និងក្មេងស្រីជាង ២២ ០០០ នាក់បានស្លាប់ដោយសារការរំលូតកូនដោយគ្មានសុវត្ថិភាពនេះ ជាងរៀងរាល់ឆ្នាំ ហើយ៩៧ភាគរយនៃអ្នកទាំងនោះស្ថិតក្នុងប្រទេសកំពុងអភិវឌ្ឍន៍។
នៅប្រទេសមួយចំនួនបានចាត់ទុកការរំលូតកូនជាអំពើខុសច្បាប់ និងហាមឃាត់ស្រ្តី និងក្មេងស្រីពីការទទួលបានសេវារំលូតកូន។ ការហាមឃាត់មិនឲ្យមានការរំលូតកូននេះ មិនបានធ្វើឲ្យស្រ្តី ឬក្មេងស្រីមានផ្ទៃពោះដោយចៃដន្យទាំងនោះបញ្ឈប់ការស្វែងរកសេវារំលូតកូននោះទេ តែបែរជាជំរុញអ្នកទាំងនោះឲ្យទៅទទួលសេវារំលូតកូនដោយគ្មានសុវត្ថិភាពទៅវិញ។
អត្ថបទពាក់ព័ន្ធ៖
- ស្រីៗមុនសម្រេចចិត្តរំលូតកូន ត្រូវដឹងពីគ្រោះថ្នាក់ទាំងនេះ
- ហេតុផលទាំងនេះហើយ បានជាស្រីៗមួយចំនួនសម្រេចចិត្តរំលូតកូន
- គួរធ្វើម៉េច បើភ្លាត់មានផ្ទៃពោះចៃដន្យ?
តើការរំលូតកូនដោយគ្មានសុវត្ថិភាពជាអ្វី?
ការរំលូតកូនដោយគ្មានសុវត្ថិភាពគឺធ្វើឡើងដោយគ្រូពេទ្យមិនមានជំនាញ ឬក្នុងមន្ទីរពេទ្យដែលមិនអនុវត្តតាមស្តង់ដារវេជ្ជសាស្ត្រ។ ការរំលូតកូនដោយមានអ្នកជំនាញក៏គ្មានសុវត្ថិភាពដែរ ប្រសិនជាប្រើប្រាស់សម្ភារៈមិនទំនើប ឬប្រើប្រាស់ថ្នាំដែលមិនមានព័ត៌មានត្រឹមត្រូវ។
ការរំលូតកូនដោយសុវត្ថិភាពត្រូវធ្វើឡើងដោយគ្រូពេទ្យជំនាញ និងមាននីតិវិធីត្រឹមត្រូវ។ ការរំលូតកូនអាចប្រព្រឹត្តិទៅតាមរយៈការរំលូតកូនដោយប្រើថ្នាំដែលទទួលបានការណែនាំពីគ្រូពេទ្យជំនាញ និងការរំលូតកូនប្រើឧបករណ៍ធ្វើឡើងដោយគ្រូពេទ្យជំនាញ។
ស្ត្រី ឬក្មេងស្រីដែលមានផ្ទៃពោះដោយចៃដន្យប្រឈមនឹងការរំលូតកូនដោយគ្មានសុវត្ថិភាពនៅពេលដែលអ្នកទាំងនោះមិនបានទទួលសេវារំលូតកូនត្រឹមត្រូវ។ កត្តាមួយចំនួនធ្វើឲ្យស្រ្តី ឬក្មេងស្រីទាំងនោះមិនអាចទៅរកសេវារំលូតកូនដោយសុវត្តិភាពបានរួមមាន៖
- ច្បាប់តឹងរឹងហួសហេតុពេក ឬការរំលូតកូនជាអំពើខុសច្បាប់
- សេវាសុខាភិបាលទន់ខ្សោយ
- ការចំណាយខ្ពស់
- ផ្នត់គំនិតសង្គម
- ប្រព័ន្ធសុខាភិបាលមិនអនុគ្រោះដល់ការរំលូតកូន
- ការរាំងស្ទាំងដោយសារ ការរង់ចាំយូរ មិនងាយបានទទួលការប្រឹក្សាយោបល់ និងការផ្តល់ព័ត៌មានមិនត្រឹមត្រូវ ជាដើម។
អត្ថបទពាក់ព័ន្ធ៖
- រឿងសំខាន់ស្រីៗត្រូវដឹងដើម្បីសុវត្ថិភាព ក្រោយលេបថ្នាំរំលូតកូន
- ក្រោយប្រើថ្នាំរំលូតកូន ស្រីៗត្រូវប្រុងប្រយ័ត្នអីខ្លះ?
- អាហារចាំបាច់បំផុតក្រោយរំលូតកូន
ផលវិបាកនៃការរំលូតកូនដោយគ្មានសុវត្ថិភាព
ការរំលូតកូនដោយគ្មានសុវត្ថិភាពមានផលប៉ះពាល់ស្ត្រីច្រើនដែលពេលខ្លះអាចគំរាមកំហែងដល់អាយុជីវិត។ ផលវិបាកទាំងនោះមានដូចជា
- ការយកសុកចេញមិនអស់
- ការធ្លាក់ឈាមច្រើន
- ការឆ្លងរោគផ្សេងៗ
- ការដាច់រហែកស្បូន
- របួសប្រដាប់ភេទ និងសរីរាង្គខាងក្នុង។
នៅពេលមានផលវិបាកដែលបង្កឡើងដោយការរំលូតកូនគឺត្រូវការការព្យាបាលឲ្យបានទាន់ពេលវេលាពីគ្រូពេទ្យជំនាញទោះបីជាការរំលូតកូននោះមិនស្របតាមច្បាប់ក៏ដោយ។ ប៉ុន្តែក្នុងករណីខ្លះ ការព្យាបាលទៅលើផលវិបាកបង្កឡើងដោយការរំលូតកូនដោយគ្មានសុវត្ថិភាពតម្រូវឲ្យអ្នកជំងឺផ្តល់ព័ត៌មានពីអ្នកដែលផ្តល់សេវារំលូតកូនខុសច្បាប់មុននឹងទទួលបានការព្យាបាល។ ការធ្វើបែបនេះអាចបង្កើនហានិភ័យដល់អ្នកជំងឺ ដូចនេះអ្នកផ្តល់សេវាសុខភាពមិនត្រូវពន្យារពេល និងផ្តល់ការព្យាបាលភ្លាមៗ។
ការបង្ការការរំលូតកូនដោយគ្មានសុវត្ថិភាព
ការរំលូតកូនដោយគ្មានសុវត្ថិភាពអាចបង្ការបានដោយ៖
- ការអប់រំសុខភាពផ្លូវភេទឲ្យបានទូលំទូលាយ
- ការបង្ការការមានផ្ទៃពោះដោយចៃដន្យតាមរយៈការប្រើប្រាស់មធ្យោបាយពន្យារកំណើត
- ការផ្តល់សេវាកម្មការរំលូតកូនដោយស្របច្បាប់ និងសុវត្ថិភាព។
បន្ថែមពីនេះទៀត ការស្លាប់ ឬពិការភាពមកពីការរំលូតកូនដោយគ្មានសុវត្ថិភាពអាចកាត់បន្ថយបានប្រសិនជាមានការព្យាបាលបានរហ័ស និងទាន់ពេលវេលា។
អត្ថបទពាក់ព័ន្ធ៖
- រំលូតកូនហើយ បើមានសញ្ញាទាំងនេះអាចគ្រោះថ្នាក់ដល់ជីវិត
- រំលូតកូន ហើយលែងមានកូនទៀត ដោយសារមូលហេតុទាំងនេះ
- ស្រីៗរំលូតកូន អាចប៉ះពាល់ដល់កូនក្រោយៗ ហើយប្រឈមកើតជំងឺធ្ងន់ៗ
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-pregnancy-weight-gain]
