នេះជារឿងចាំបាច់មួយសម្រាប់ម៉ាក់ៗដែលធ្លាប់សម្រាលកូនទី១ដោយវះកាត់ចង់ដឹង ព្រោះខ្លាចកូនទី២ មិនអាចសម្រាលតាមធម្មជាតិបាន។ ដើម្បីជម្រះមន្ទិលសង្ស័យនេះ លោកជំទាវវេជ្ជបណ្ឌិត គ្រុយ លាងស៊ីម អនុរដ្ឋលេខាធិការ ក្រសួងសុខាភិបាល និងជាទីប្រឹក្សាផ្នែកសម្ភព នៅមន្ទីរពេទ្យកាល់ម៉ែត បានឲ្យដឹងថា ពេលមានកូនទី២ ពិតជាអាចសម្រាលតាមផ្លូវក្រោមបាន។
សាស្ត្រាចារ្យដែលមានបទពិសោធយូរឆ្នាំផ្នែកសម្ភព បានឲ្យដឹងថា ករណីម្ដាយវះកូនដំបូងពេលកូនបន្ទាប់មានអត្រាកើតតាមធម្មតាបានរហូតទៅ ៦០ -៧០%។ “អ្នកមានកូនដំបូងវះ លើកទី២ អាចកើតបានធម្មតា តែគ្រូពេទ្យត្រូវតាមដានពិនិត្យមើលថ្នេរមុខរបួសចាស់ឲ្យបានដិតដល់បំផុតតាំងពីពពោះ រហូតជិតដល់ថ្ងៃសម្រាល ខ្លាចក្រែងមានបញ្ហាអ្វីមួយ ឬដាច់ដោចថ្នេរចាស់។ ប៉ុន្តែបើស្ថិតក្នុងករណីគួរឲ្យបារម្ភមួយចំនួន ត្រូវវះម្ដងទៀតដូចជាត្រគាកតូច កូនធំជាដើម”។
ប្រសិនបើកូនទី១ វះ ហើយទី២វះទៀត កូនបន្ទាប់ៗទៀតក៏នៅតែប្រើវិធីនេះដដែល ដើម្បីសម្រាល។ ករណីដែលអាចសម្រាលវិញបានទាល់តែកូនទី១វះ ទី២សម្រាល នោះទើបកូនក្រោយៗអាចសម្រាលបាន។ ចំពោះមូលហេតុធ្វើឲ្យម៉ាក់ៗត្រូវតែសម្រាលដោយវះជាចាំបាច់មានដូចជា ទងសុករុំកកូនច្រើនជុំ កូនទទឹងពោះ កូនមិនបង្វិលក្បាលចុះក្រោម សុកពាំងមាត់ស្បូន រហែកស្បូន សុខភាពម្ដាយ ឬកូនខ្សោយខ្លាំង ម្ដាយមានធ្លាក់ឈាមច្រើន ឬបែកទឹកភ្លោះយូរ ព្រោះតម្រូវឲ្យជួយសង្គ្រោះជាបន្ទាន់ បើទុកយូរអាចមានគ្រោះថ្នាក់ទាំងម្ដាយ និងកូន។
ជាធម្មតាពេទ្យមិនលើកទឹកចិត្តឲ្យស្ត្រីជ្រើសរើសវិធីវះឡើយ ទាល់តែព្យាយាមកើតតាមផ្លូវក្រោមអស់លទ្ធភាពសិន ទើបពេទ្យសម្រេចចិត្តឲ្យវះ។
អត្ថបទពាក់ព័ន្ធ៖
- មានបញ្ហាអីខ្លះ ម៉ាក់ៗត្រូវតែសម្រាលកូនដោយវះកាត់?
- មួយជីវិត ស្រីៗអាចសម្រាលកូនដោយវះកាត់ប៉ុន្មានដង?
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-due-date]
