អាហារដែលមានផ្ទុកសារធាតុចិញ្ចឹមគ្រប់គ្រាន់ គឺល្អដើម្បីសុខភាព ជួយទ្រទ្រង់ដំណើរការក្នុងរាងកាយប្រចាំថ្ងៃកាន់តែប្រសើរ ប៉ុន្តែបើយើងមានបញ្ហាសុខភាពណាមួយ សារធាតុចិញ្ចឹមក្នុងអាហារយើងទទួលបាន នឹងជះឥទ្ធិពលមិនល្អមកលើសុខភាពយើងដូចគ្នា។ “Hello គ្រូពេទ្យ’ នឹងលើកឡើងពាក់ព័ន្ធអ្នកមានបញ្ហាតម្រងនោម គួរចៀសវាងសារធាតុចិញ្ចឹមដូចមានរៀបរាប់ខាងក្រោម។
១- កាឡូរី
យោងតាមស្ថានភាពសុខភាព និងកម្រិតគ្រោះថ្នាក់ អ្នកមានជំងឺតម្រងនោម គ្រូពេទ្យអាចជួយរៀបផែនការពិសេស ដែលបញ្ជាក់ពីកម្រិតកាឡូរី យើងគួរញ៉ាំប្រចាំថ្ងៃ ឬប្រចាំសប្ដាហ៍។ សូមធ្វើតាមផែនការរបស់គ្រូពេទ្យជាប្រចាំ ដើម្បីចៀសវាងពីផលវិបាកផ្សេងៗ ដែលអាចប៉ះពាល់ដល់សុខភាព។
២- ប្រូតេអ៊ីន
ការពិត ប្រូតេអ៊ីន (សាច់) គឺល្អណាស់សម្រាប់សុខភាពរាងកាយ ពិសេស ក្រចកដៃ និងសក់ តែការញ៉ាំជាតិប្រូតេអ៊ីនច្រើនពេក អាចនាំឲ្យមានផលវិបាក បើយើងកំពុងមានបញ្ហាណាមួយពាក់ព័ន្ធតម្រងនោម។ សូមពិគ្រោះជាមួយគ្រូពេទ្យ ដើម្បីអាចដឹងពីកម្រិតប្រូតេអ៊ីនយើងគួរញ៉ាំ។
– អាហារមានប្រូតេអ៊ីនទាប៖ បន្លែ ផ្លែឈើ អង្ករ និងនំប៉័ង។
– អាហារមានប្រូតេអ៊ីនខ្ពស់៖ ស៊ុត ត្រី សាច់ក្រហម និងសាច់សត្វស្លាប។
៣- កាបូអ៊ីដ្រាត
ចំពោះអ្នកមានបញ្ហាតម្រងនោម ត្រូវកំណត់ការញ៉ាំជាតិកាបូអ៊ីដ្រាតឲ្យបានច្បាស់លាស់ និងត្រឹមត្រូវ ព្រោះកាបូអ៊ីដ្រាតខ្លះ មានកម្រិតជាតិផូស្វរ ឬប៉ូតាស្យូមខ្ពស់ អាចប៉ះពាល់ដល់ស្ថានភាពជំងឺយើងបាន។ បើមានជំងឺទឹកនោមផ្អែម អាហារត្រូវញ៉ាំ ត្រូវមានកម្រិតកាបូអ៊ីដ្រាតសមរម្យ។
អត្ថបទពាក់ព័ន្ធ៖
- មិនចង់កើតក្រួសក្នុងតម្រងនោម គួរយល់របៀបបង្ការទាំងនេះ
- មិនសូវផឹកទឹក ប្រយ័ត្នកើតក្រួសក្នុងតម្រងនោម
៤- ជាតិខ្លាញ់
ខ្លាញ់មានពីប្រភេទ គឺខ្លាញ់ល្អ និងខ្លាញ់អាក្រក់។ ខ្លាញ់ល្អ ជាខ្លាញ់មិនឆ្អែត (Unsaturated fat) ខណៈអាហារសម្បូរខ្លាញ់ល្អ មានប្រេងពោត ប្រេងអូលីវ ឬប្រេងសណ្ដែក ខណៈខ្លាញ់មិនឆ្អែត អាចជួយបន្ថយកម្រិតខ្លាញ់កូលេស្តេរ៉ូលក្នុងឈាម។ ក្នុងករណីយើងត្រូវការឡើងទម្ងន់ សូមញ៉ាំអាហារមានខ្លាញ់មិនឆ្អែតឲ្យបានច្រើន។ ផ្ទុយទៅវិញ បើកំពុងសម្រកទម្ងន់ ត្រូវកម្រិតការញ៉ាំខ្លាញ់ប្រភេទនេះ។ ដូចគ្នាទៅនឹងប្រភេទអាហារផ្សេងទៀត ញ៉ាំក្នុងកម្រិតមធ្យម ជាគន្លឹះដើម្បីទទួលបានសុខភាពកាន់តែល្អ ព្រោះបើញ៉ាំខ្លាញ់ប្រភេទនេះច្រើនពេក ក៏អាចបង្កឲ្យមានបញ្ហាដូចគ្នា។
មួយវិញទៀត ខ្លាញ់អាក្រក់ ឬអាចហៅថា ខ្លាញ់ឆ្អែតនោះ អាចបង្កើនកម្រិតកូលេស្តេរ៉ូល ក៏ដូចជាធ្វើឲ្យយើងប្រឈមនឹងជំងឺបេះដូងផ្សេងៗ។ អាហារមានខ្លាញ់អាក្រក់ មានដូចជា ខ្លាញ់ជ្រូក បឺរ និងសាច់ ជាពិសេស គឺពពួកអាហារកំប៉ុង។
៥- ជាតិសូដ្យូម
អំបិល ផ្សំឡើងដោយមានសារធាតុសូដ្យូម ដែលជាជាតិរ៉ែ អាចឃើញមានសឹងតែគ្រប់ប្រភេទអាហារ។ ញ៉ាំអំបិលច្រើនពេក ធ្វើឲ្យយើងស្រេកទឹក អាចនាំឲ្យហើម និងកើនសម្ពាធឈាម។ បន្ទាប់មក តម្រងនោមនឹងធ្វើការកាន់តែធ្ងន់ ដើម្បីរំលាយជាតិអំបិលយើងបានញ៉ាំ។ ដើម្បីតម្រងនោម និងបេះដូង សូមកម្រិតជាតិសូដ្យូមដែលញ៉ាំឲ្យបានត្រឹមត្រូវ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmr]
