សម័យនេះ ដោយសារអាហារ Fast Foods ពេញនិយមខ្លាំង នាំឲ្យគ្នាយើងជាច្រើន ប្រឈមខ្ពស់បញ្ហាលើសជាតិកូលេស្តេរ៉ូល ហើយបញ្ហាសុខភាពគួរឲ្យខ្លាចមួយនេះ មិនត្រឹមកើតមានលើមនុស្សពេញវ័យទេ ក្មេងៗអាយុ ២ ឆ្នាំឡើង ក៏អាចកើតបានដែរ។ ក្មេងៗមិនដឹងអីទេ ឲ្យតែឃ្លានញ៉ាំហើយ តែយើងជាប៉ាម៉ាក់គេ ត្រូវចេះរកវិធីដោះស្រាយ ដើម្បីជួយកូនកុំឲ្យមានបញ្ហាសុខភាពដោយសារលើសជាតិកូលេស្តេរ៉ូល។ “Hello គ្រូពេទ្យ” នឹងប្រាប់វិធីសាស្ត្រខ្លះៗ ឲ្យប៉ាម៉ាក់បានដឹង។
១- តើក្មេងៗអាចលើសជាតិកូលេស្តេរ៉ូលដែរ?
បញ្ហាលើសកូលេស្តេរ៉ូល មិនមែនកើតឡើងតែលើមនុស្សពេញវ័យទេ វាក៏អាចកើតឡើងលើក្មេងៗដូចគ្នា។ មិនតែប៉ុណ្ណោះ វាថែមទាំងអាចធ្វើឲ្យកូនយើង ប្រឈមទៅនឹងបញ្ហាសុខភាពជាច្រើន ជាពិសេស ជំងឺបេះដូង នៅពេលកូនយើងធំធាត់ពេញវ័យ។ កំណកដុំកូលេស្តេរ៉ូលទាំងនោះ អាចទៅកកស្ទះតាមជញ្ជាំងសរសៃឈាមអាកទែរ បណ្តាលឲ្យសរសៃឈាមទាំងនោះ រួមត្បៀតតូច ធ្វើឲ្យមានការរាំងស្ទះដល់លំហូរឈាមហូរទៅកាន់បេះដូង និងសរីរាង្គដទៃ ជាហេតុបណ្តាលឲ្យជំងឺដាច់សរសៃឈាមខួរក្បាល បញ្ហាបេះដូង និងបញ្ហាសុខភាពដទៃ អាចកើតមានឡើង។
យោងទៅតាមសមាគមនបេះដូងអាមេរិក (American Heart Association) ក្មេងៗមានវ័យពី ២-១៩ ឆ្នាំ គួរតែមានកម្រិតកូលេស្តេរ៉ូលសរុប ស្ថិតក្នុងបរិមាណ ១៧០ ឬក៏ទាបជាងនេះ។
២- មូលហេតុនាំឲ្យជាតិកូលេស្តេរ៉ូលក្នុងឈាមក្មេងឡើងខ្ពស់
មានមូលហេតុចម្បងមួយចំនួន សុទ្ធតែអាចនាំឲ្យជាកូលេស្តេរ៉ូលក្នុងរាងកាយក្មេងៗ ឡើងខ្ពស់បាន ដូចជា៖
– របបអាហារមិនល្អ
– មិនហាត់ប្រាណ
– មានជំងឺធាត់ ឬលើសទម្ងន់
– កត្តាតំណរពូជ (ហ្សែន) ក៏ជាមូលហេតុចម្បងមួយ ព្រោះថាបញ្ហាលើសកូលេស្តេរ៉ូល អាចមានទៅតាមគ្រួសារ។ ក្មេងៗមានប៉ាម៉ាក់ មានបញ្ហាសុខភាពនេះ ងាយប្រឈមលើសកូលេស្តេរ៉ូលជាងក្មេងដទៃ។
៣- វិធីការពារបញ្ហាលើសកូលេស្តេរ៉ូលលើក្មេងៗ
ដើម្បីការពារបញ្ហាលើសជាតិកូលេស្តេរ៉ូលចំពោះក្មេងៗ កត្តាចាំបាច់បំផុត ប៉ាម៉ាក់ គួរចាប់ផ្តើមកែប្រែទម្លាប់រស់នៅរបស់អូនៗ ដូចខាងក្រោម៖
– តមអាហារ៖ ប៉ាម៉ាក់សុទ្ធតែដឹងហើយថា ជាតិសរសៃ មានពីរប្រភេទ គឺជាតិសរសៃរលាយ អាចជួយកាត់បន្ថយកម្រិតកូលេស្តេរ៉ូលក្នុងឈាម និងជាតិសរសៃមិនរលាយ អាចជួយកាត់បន្ថយអត្រាកើតជំងឺបេះដូង ក៏ដូចជាកាត់បន្ថយអាការៈធ្ងន់ធ្ងរនៃជំងឺបេះដូងផងដែរ។ ហេតុនេះ យើងគួរឲ្យក្មេងញ៉ាំបន្លែផ្លែឈើឲ្យបានយ៉ាងតិច ៥មុខ ជារៀងរាល់ថ្ងៃ ដូចជា ចេក ការ៉ុត ឬបន្លែស្លឹកបៃតងដទៃទៀត។ ប្រភេទអាហារសម្បូរជាតិសរសៃ អាចជួយកូនយើងកាត់បន្ថយកម្រិតកូលេស្តេរ៉ូលក្នុងឈាមបានមានដូចជា៖
- ផ្លែប៊ើរី (Berry)៖ ស្ទើរតែគ្រប់ប្រភេទនៃអំបូរផ្លែឈើមួយនេះ សុទ្ធតែផ្តល់អត្ថប្រយោជន៍ខ្ពស់ចំពោះសុខភាពកូនយើង យ៉ាងណាមិញ ផ្លែរ៉ាស់ប៊ើរី (Raspberries) សម្បូរជាតិសរសៃជាងគេ។ បើនៅស្រុកយើង អំបូរផ្លែប៊ើរី មានតម្លៃថ្លៃជាងផ្លែឈើផ្សេងៗទៀត ប៉ាម៉ាក់ ក៏អាចឲ្យកូនយើងញ៉ាំផ្លែឈើសម្បូរជាតិសរសៃ មានតម្លៃសមរម្យ ដូចជា ផ្លែប៉ោម ក៏បាន។
- ធញ្ញជាតិ៖ គ្រាប់ធញ្ញជាតិ គឺមានផ្ទុកជាតិសរសៃខ្ពស់ ខណៈក្មេងភាគច្រើន ក៏ចូលចិត្តញ៉ាំធញ្ញជាតិនេះដែរ។ ហេតុនេះគប្បីជ្រើសរើសប្រភេទសម្បូរជាតិសរសៃឲ្យកូនយើងញ៉ាំ។ យ៉ាងណាមិញ ប៉ាម៉ាក់ ត្រូវចាំពិនិត្យមើលកម្រិតជាតិស្ករលើគ្រាប់ធញ្ញជាតិទាំងនោះផង។
មួយវិញទៀត ត្រូវប្រាកដថា អាហារក្មេងញ៉ាំមានកម្រិតកូលេស្តេរ៉ូលសរុប ពិសេសខ្លាញ់មិនល្អ (ខ្លាញ់ឆ្អែត) ទាប។ ប្រភេទខ្លាញ់ឆ្អែត ភាគច្រើន មាននៅក្នុងផលិតផលបានមកពីសត្វ ដូចជា ស៊ុត សាច់ និងផលិតផលទឹកដោះគោ (ឈីស និងបឺរ)។ ខ្លាញ់ប្រភេទ នេះក៏សម្បូរនៅក្នុងនំកញ្ចប់ ដូចជា នំ Cookies និងដំឡូងបារាំង ជាដើម។ គប្បីចៀសវាងពពួកអាហារចៀន និងអាហារកំប៉ុងផង។ សរុបមក មិនគួរឲ្យក្មេងញ៉ាំខ្លាញ់សរុបលើសពី ៣០% នៃកាល់ឡូរីសរុបប្រចាំថ្ងៃរបស់ក្មេងនោះឡើយ រីឯប្រភេទខ្លាញ់ឆ្អែតវិញ មិនត្រូវឲ្យលើស ១០% នៃកាល់ឡូរីសរុប។ យ៉ាងណាមិញ ត្រូវចៀសវាងញ៉ាំរាល់ប្រភេទខ្លាញ់មិនល្អទាំងនេះ ឲ្យបានតិចបំផុតតាមតែអាចធ្វើទៅបាន។
– ហាត់ប្រាណ៖ ត្រូវណែនាំកូនឲ្យហាត់ប្រាណជាប្រចាំ យ៉ាងហោចណាស់ គួរឲ្យកូនលេងកីឡាណា តម្រូវឲ្យបញ្ចេញសកម្មភាពរាងកាយឲ្យបានយ៉ាងតិច មួយម៉ោងក្នុងថ្ងៃ។ លំហាត់ប្រាណបែបអេរ៉ូប៊ិក (Aerobic exercise) ក៏ល្អសម្រាប់ក្មេងដូចគ្នា ព្រោះអាចជួយបង្កើនកម្រិតកូលេស្តេរ៉ូលល្អ (HDL) និងកាត់បន្ថយហានិភ័យកើតជំងឺបេះដូង។
– ផ្លាស់ប្តូរទម្លាប់ប្រចាំថ្ងៃ៖ ត្រូវផ្លាស់ប្តូរទម្លាប់ប្រចាំថ្ងៃមិនល្អរបស់កូនបន្តិចម្តងៗ ដូចជា គួរកម្រិតការមើលទូរទស្សន៍ ឬក៏លេងហ្គេមតាមទូរសព្ទ ត្រឹម ១-២ ម៉ោង/ថ្ងៃ បានហើយ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ។
[embed-health-tool-bmi]
