ហាត់ប្រាណដើម្បីសុខភាព និងរាងស្អាត គឺមានច្រើនវិធី ហើយគុណប្រយោជន៍ ក៏ខុសៗគ្នាទៅតាមវិធីហាត់នីមួយៗដែរ។ ប៉ុន្តែវិធីហាត់ប្រាណពេញនិយមបំផុត គឺការរត់ ដោយគ្នាយើងភាគច្រើន ជ្រើសយកវិធីរត់ហាត់ប្រាណ ព្រោះងាយស្រួល មិនស៊ាំញ៉ាំ មិនត្រូវការឧបករណ៍ច្រើនទេ ដោយគុណប្រយោជន៍ ក៏ទទួលបានគួរសម ពិសេសជួយឲ្យសុខភាពឆ្អឹងកាន់តែរឹងមាំ ការពារពុកឆ្អឹង មានដូចរៀបរាប់ក្នុងអត្ថបទខាងក្រោម។
១- រត់ធ្វើឲ្យឆ្អឹងកាន់តែរឹងមាំ
គ្រប់ជំហានយើងរត់ រមែងតែងតែប្រើសម្ពាធខ្លាំងសង្កត់លើឆ្អឹងជើងទាំងពីរ។ ហេតុនេះហើយ នាំឲ្យការរត់ហាត់ប្រាណ ត្រូវចាត់ទុកជាសកម្មភាព មានការប៉ះទង្គិចជាងសកម្មភាពដើរ ព្រោះតែមានកម្លាំងសង្កត់លើឆ្អឹង និងសន្លាក់។ ឆ្អឹង ជាជាលិការស់រវើក អាចមានការលូតលាស់ខ្លាំងជាងមុន ពេលមានកម្លាំងសង្កត់លើ ដើម្បីជួយទ្រទម្ងន់រាងកាយបានល្អ។
២- រត់ហាត់ប្រាណជួយបង្កើនកំហាប់ឆ្អឹង
ការប៉ះទង្គិចទៅលើឆ្អឹងនៅពេលរត់ មានឥទ្ធិពលលើដង់ស៊ីតេឆ្អឹងដូចគ្នា ដែលដង់ស៊ីតេឆ្អឹង កំណត់បរិមាណជាតិរ៉ែក្នុងឆ្អឹងរបស់យើង។ បើគ្នាយើង មានកំហាប់ឆ្អឹងទាប អាចប្រឈមជំងឺពុកឆ្អឹង បង្កទៅជាឆ្អឹងខ្សោយមិនអាចទ្រទម្ងន់ខ្លួនបាន មានន័យថាសកម្មភាពប៉ះទង្គិចខ្សោយៗដូចជា ការដើរហាត់ប្រាណពុំសូវបង្កើនកំហាប់ឆ្អឹងខ្ពស់ ដូចសកម្មភាពរត់ហាត់ប្រាណទេ។ អ្នកស្រាវជ្រាវជឿជាក់ថា ប៉ាម៉ាក់ អ៊ំៗហ្វឹកហាត់រត់តាំងពីវ័យក្មេង អាចជំរុញការផលិតរ៉ែខួរឆ្អឹង ដើម្បីការពារការបាត់បង់ឆ្អឹង និងបន្ថយហានិភ័យពីជំងឺពុកឆ្អឹងនៅពេលចាស់។
មានការលើកឡើងថា រត់ហាត់ប្រាណឲ្យបានចម្ងាយចន្លោះពី ២០-៣០គីឡូម៉ែត្រ/សប្ដាហ៍ អាចទទួលលទ្ធផលវិជ្ជមានកាន់តែច្រើន។ យ៉ាងណា មានការណែនាំដល់គ្នាយើង មិនត្រូវរត់លើសចម្ងាយកំណត់ខាងលើនេះទេ ព្រោះការរត់ហាត់ប្រាណច្រើន អាចបង្កើនកម្រិតអ័រម៉ូនករទីសុល (Cortisol) ក្នុងឈាម ព្រោះពេលកម្រិតអ័រម៉ូនកើនច្រើនពេក នឹងធ្វើឲ្យខូចជាលិកាឆ្អឹង។ យោងតាមការសិក្សាមួយ អះអាងថា គ្នាយើងរត់រហូតដល់ ៩០ គីឡូម៉ែត្រ/សប្ដាហ៍ មានកំហាប់ឆ្អឹងទាបជាងមនុស្ស អង្គុយមួយកន្លែងមិនធ្វើសកម្មភាពអ្វីសោះ។
អត្ថបទពាក់ព័ន្ធ៖
- អាហារល្អៗគួរញ៉ាំមុនពេលហាត់ប្រាណ
- កំហុសទាំង ៦ ច្រើនមើលរំលង ពេលរត់ហាត់ប្រាណ
៣- តិចនិករត់ជួយឲ្យឆ្អឹងរឹងមាំ
ឆ្អឹងយើងម្នាក់ៗ នឹងស៊ាំទៅនឹងការរត់ ហើយលែងវិវត្តន៍ទៀតហើយ។ ដូច្នេះ យើងត្រូវបង្កើនសកម្មភាពរត់បន្តិចម្ដងៗ រហូតដល់ចម្ងាយផ្លូវកំណត់មួយដែលគ្រូពេទ្យបានណែនាំ។ បើទើបចាប់ផ្ដើមដំបូង សូមកុំសាកល្បងរហូតដល់ ២០គីឡូម៉ែត្រ ព្រោះរាងកាយយើង ត្រូវការពេលវេលាសមស្របដើម្បីកែតម្រូវ។ ការធ្វើទាំងបង្ខំ អាចបណ្ដាលឲ្យមានរបួស និងបញ្ហាសុខភាពធ្ងន់ធ្ងរ ហេតុនេះ យើងត្រូវរៀបចំផែនការឲ្យមានទម្លាប់រត់ និងធ្វើឲ្យបានខ្ជាប់ខ្ជួន។ ការផ្លាស់ប្ដូរចម្ងាយផ្លូវ គួរធ្វើឡើងរង្វង់ពីរសប្ដាហ៍ក្រោយចាប់ផ្តើមរត់ បែបនេះ ការរត់មិនអាចប៉ះពាល់ដល់ឆ្អឹងទេ យើងនឹងត្រូវប្រើសកម្មភាពហ្វឹកហាត់ទម្ងន់ផ្សេងទៀតបញ្ចូលគ្នា ដើម្បីបង្កើនដង់ស៊ីតេឆ្អឹង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះនិងប្រឹក្សាយោបល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ។
[embed-health-tool-bmi]
