ជើងស្អាត ក្បាលពោះរាបស្មើ សាច់ភ្លៅតឹងណែន សាច់ដុំមាំ ជាក្តីប្រាថ្នាមនុស្សគ្រប់គ្នា តែទាស់ត្រង់ថា សម័យនេះ យើងមានការងាររវល់ច្រើន សឹងរកពេលសម្រាកគ្មាន មានពេលឯណាទៅហាត់ប្រាណ។
ដោយសារបញ្ហានេះ “Hello គ្រូពេទ្យ’ នឹងបង្ហាញពីតិចនិកមួយចំនួន ណែនាំដោយគ្រូលំហាត់ប្រាណ មកប្រាប់គ្នាយើងគ្មានពេលគ្រប់គ្រាន់ ពោល តែនៅអាចហាត់បាន ដោយគ្រាន់ចំណាយពេល ២០ នាទីប៉ុណ្ណោះ នឹងអាចហាត់ចលនាបានសព្វគ្រប់រាងកាយ ថែរាងឲ្យស្អាត។
![ចលនាទី១](https://cdn.hellokrupet.com/wp-content/uploads/2019/06/ចលនាទី១_Hello-គ្រូពេទ្យ.jpg)
ចលនាទី១៖ អង្គុយចោងហោង
ចលនាសាច់ដុំ៖ សាច់ដុំភ្លៅខាងមុខ សាច់ត្រគាក សរសៃពួរ សាច់ចង្កេះខាងក្រោយ
របៀបធ្វើ៖ ដាក់របារដុំដែក (បើមាន សមស្របតាមកម្លាំងខ្លួន) នៅពីលើស្មា ហើយត្រូវប្រាកដថា មិនមែនដាក់លើកទេ។ អង្គុយដាក់ជើងឃ្លាតគ្នាឲ្យឆ្ងាយបន្តិច (ដូចរូប) ព្យាយាមឲ្យទ្រូងពើងទៅមុខ រួចព្យាយាមងើបចុះឡើងៗ ធ្វើបែបនេះ ១២ដង ដោយរាប់ ១២ដង ចាត់ទុកថាបាន ១ជុំ ធ្វើ ៣ជុំ ចន្លោះ ១ជុំ សម្រាក ៣០ វិនាទី។
![ចលនាទី២](https://cdn.hellokrupet.com/wp-content/uploads/2019/06/ចលនាទី២_Hello-គ្រូពេទ្យ.jpg)
ចលនាទី២៖ លំនឹងខ្លួនផ្នែកចំហៀង
ចលនាសាច់ដុំ៖ ត្រគាក ពោះ និងភ្លៅ
របៀបធ្វើ៖ ផ្អៀងធ្វើលំនឹងខ្លួន ដូចរូប ដោយប្រើកែងដៃទប់ និងធ្វើចលនាលើកជើង ៤៥ ដឺក្រេ (ដូចរូប)។ ជើងម្ខាងទៀត ដាក់ទីតាំងធម្មតា ធ្វើចលនាលើកជើង ១៥ដង ទើបប្តូរទៅជើងម្ខាងទៀត រួចធ្វើ ១៥ដង ដូចគ្នា។ ធ្វើឲ្យបាន ៣ជុំ ១ជុំ សម្រាក ៣០ វិនាទី។
![ចលនាទី៣](https://cdn.hellokrupet.com/wp-content/uploads/2019/06/ចលនាទី៣_Hello-គ្រូពេទ្យ.jpg)
ចលនាទី៣៖ ចលនាជើងទី ១
ចលនាសាច់ដុំ៖ ត្រគាក ភ្លៅ សរសៃពួរ និងពោះ
របៀបធ្វើ៖ ទប់ដងខ្លួនអ្នក ប្រើប្រអប់ដៃ និងជង្គង់ លើកជើងអ្នក (ដូចរូប) ដាក់ត្រង់ស្របពីក្បាល និងចុងជើង រួចជើងម្ខាងដាក់ចុះ។ លើកចុះលើកឡើង ១៥ដង (ជើងម្ខាង) រួចប្តូរទៅម្ខាងទៀត ធ្វើ ៣ជុំ ក្នុង ១ជុំ សម្រាក ៣០ វិនាទី។
![ចលនាទី៤](https://cdn.hellokrupet.com/wp-content/uploads/2019/06/ចលនាទី៤_Hello-គ្រូពេទ្យ.jpg)
ចលនាទី៤៖ ចលនាជើងទី ២
ចលនាសាច់ដុំ៖ ត្រគាក ភ្លៅ
របៀបធ្វើ៖ ប្រើប្រអប់ដៃ និងជង្គង់ទប់ដូចចលនាទី ៣ រួចលើកជើងខាងស្តាំ ត្រង់ជង្គង់ឲ្យខ្ពស់ រួចដាក់ចុះ។
លើកចុះលើកឡើង ១៥ដង រួចប្តូរទៅជើងឆ្វេង ១៥ដង ដូចគ្នា និងធ្វើឲ្យបាន ៣ជុំ ក្នុង ១ជុំ សម្រាក ៣០ វិនាទី។
![ចលនាទី៥](https://cdn.hellokrupet.com/wp-content/uploads/2019/06/ចលនាទី៥_Hello-គ្រូពេទ្យ-1.jpg)
ចលនាទី៥៖ ចលនាងើបបែបអក្សរ V
ចលនាសាច់ដុំ៖ សាច់ពោះផ្នែកខាងលើ និងក្រោម សាច់ខ្នងផ្នែកខាងក្រោម និងត្រគាក
របៀបធ្វើ៖ ដេកផ្ងារ លើកដៃឡើង (ដូចរូប) លើកជើងអ្នកព្រមគ្នា រួចព្យាយាមយកដៃ ប៉ះឲ្យដល់ជើង
ងើបចុះឡើងៗ រួចគេងដូចទីតាំងដើមវិញ។ ធ្វើ ១២ដង ធ្វើឲ្យបាន ៣ជុំ ចន្លោះ ១ជុំ សម្រាក ៣០ វិនាទី។
![ចលនាទី៦](https://cdn.hellokrupet.com/wp-content/uploads/2019/06/ចលនាទី៦_Hello-គ្រូពេទ្យ-1.jpg)
ចលនាទី៦៖ ចលនាងើបត្រគាក
ចលនាសាច់ដុំ៖ ត្រគាក សរសៃពួរ
របៀបធ្វើ៖ គេងផ្ងារ ដាក់ជង្គង់ទៅលើ ហើយដាក់ដៃរាបស្មើ រួចចាំលើកត្រគាកឡើង (ដូចរូប)។ លើកចុះលើកឡើង ១៥ដង ធ្វើឲ្យបាន ៣ជុំ ក្នុង ១ជុំ សម្រាក ៣០ វិនាទី។
![ចលនាទី៧](https://cdn.hellokrupet.com/wp-content/uploads/2019/06/ចលនាទី៧_Hello-គ្រូពេទ្យ-1.jpg)
ចលនាទី៧៖ លំនឹងដៃ និងជង្គង់
ចលនាសាច់ដុំ៖ ពោះ ត្រគាក និងសរសៃពួរ
របៀបធ្វើ៖ ទប់លំនឹង ត្រង់ខ្លួនដោយប្រើដៃទប់ (ដូចរូប) រួចធ្វើចលនាជង្គង់ (ទាំងឆ្វេងស្តាំ) ទៅខាងកែងដៃ ចុះឡើងៗ សរុប ១២ដង
និងធ្វើឲ្យបាន ៣ជុំ ចន្លោះពេលសម្រាក ៣០វិនាទី ក្នុងមួយជុំ។
![ចលនាទី៨](https://cdn.hellokrupet.com/wp-content/uploads/2019/06/ចលនាទី៨_Hello-គ្រូពេទ្យ.jpg)
ចលនាទី៨៖ ចលនាទប់ជញ្ជាំង
ចលនាសាច់ដុំ៖ ពោះ ដៃ ស្មា និងទ្រូង
របៀបធ្វើ៖ ធ្វើចលនារុញទប់ជញ្ជាំង (ដូចរូប) ដាក់ដៃឲ្យស្មើស្របតាមស្មា សឹមរុញចុះឡើងៗ ចំនួន ១៥ដង និងធ្វើឲ្យបាន ៣ជុំ ក្នុងមួយជុំសម្រាក ៣០ វិនាទី។
សម្គាល់៖ ពេលមានអារម្មណ៍ថាស្រួលខ្លួន អាចធ្វើឲ្យបានច្រើនដង ព្យាយាមទៅកម្រិតមួយទៀត ដោយដាក់ជើងឲ្យឆ្ងាយពីជញ្ជាំង ឆ្ងាយជាងមុន។
អត្ថបទពាក់ព័ន្ធ៖
- បច្ចេកទេសរត់ហាត់ប្រាណបែបសាមញ្ញៗ តែសុខភាពល្អ រាងស្អាត
- បើពេលហាត់ប្រាណ ប្រទះអាការៈទាំងនេះ ត្រូវប្រយ័ត្នផង!
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmi]