គ្នាយើងមួយចំនួន ប្រហែលជាធ្លាប់ជួបហើយ អាការៈព្រឺសម្បុរ ប៉ះរោមតូចៗ ជាពិសេសពេល ទស្សនាភាពយន្តព្រឺព្រួច ឬស្ថិតក្នុងស្ថានភាពដែលស្លុងអារម្មណ៍ខ្លាំង។ បញ្ហានេះ ពាក់ព័ន្ធនឹងសាច់ដុំតូចៗ នៅជុំវិញរោមរបស់យើង។ ខាងក្រោមនេះ ជាមូលហេតុបណ្ដាលឲ្យព្រឺសម្បុរ បះរោម៖
១. ស្ថានភាពត្រជាក់ពេក
ភាពត្រជាក់(ខ្លាំង ដែលអាចធ្វើឲ្យយើងរងារ) ខួរក្បាលនឹងបញ្ជូនសញ្ញាទៅកាន់រាងកាយ ដើម្បីផលិតកម្ដៅ។ ពេលនោះ អាការៈព្រឺសម្បុរ ជាសញ្ញាមួយ រួមជាមួយអាការៈញ័រ ឱបដៃ ឬខ្លួន និងស្បែកឡើងស្លេក។
២. បញ្ហាអារម្មណ៍ខ្លាំងពេក
ពេលយើងមានអារម្មណ៍ខ្លាំងពេក ដូចជា ភ័យ ឬចំណង់ផ្លូវភេទ រាងកាយរបស់យើង បញ្ចេញអ័រម៉ូនជាច្រើន ដែលធ្វើឲ្យសាច់ដុំតូចៗនៅក្រោមស្បែក ឡើងរឹង ហើយបណ្ដាលឲ្យប៉ះរោម ឬព្រឺសម្បុរ។ អាការៈបែបនេះ ភាគច្រើន កើតឡើងនៅត្រង់កំភួនដៃ។
ក្នុងករណីនេះ ក្រៅពីបះរោមហើយ នៅមានអាការៈមួយចំនួនទៀត ដូចជា ញាក់ បេះដូងលោតញាប់ ដង្ហើមលឿនជាងមុន និងហូរទឹកភ្នែក។
៣. ការរាំងស្ទះឫសរោម
ស្បែករបស់យើង មានសមាសធាតុរឹងមួយ ហៅថា Keratin ដែលជួយការពារការឆ្លងមេរោគនានា។ ប្រសិនបើវាមានសមាសធាតុ Keratin ច្រើនពេក (Keratosis Pilaris) វាអាចបណ្ដាលឲ្យរាំងស្ទះត្រង់ឫសរោម នឹងបណ្ដាលឲ្យរោមតូចៗ បះឡើង។ បញ្ហានេះ ភាគច្រើន កើតឡើងលើកុមារ។
៤. ពេលប្រកាច់
នេះជាករណីកម្រ ទាល់តែមានជំងឺឆ្កួតជ្រូក ហើយបញ្ហាប្រកាច់ ចាប់ផ្ដើមនៅក្នុងផ្នែកនៃខួរក្បាល ដែលគ្រប់គ្រងលើអារម្មណ៍។ ក្នុងករណីនេះ វាក៏បណ្ដាលឲ្យអ្នកជំងឺ មានអារម្មណ៍ច្រឡំ ហើម ឬខាំបបូរមាត់ ភ្នែកសម្លឹងឡើងលើ និងបញ្ចេញសកម្មភាពតាមរយៈម្រាមដៃ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmi]
