មានបញ្ហាដំណេក ម្នាក់ៗមិនស្រួលចិត្តទេ ខំរិះរកវិធីផ្សេងៗ ក្នុងនោះការប្រើថ្នាំងងុយដេកជាជំនួយ ច្បាស់ជាជម្រើសចុងក្រោយហើយ។ ការប្រើថ្នាំងងុយដេកត្បិតតែជួយរឿងដំណេកបាន តែយើងក៏ត្រូវរងនូវផលរំខានមកវិញដែរ។
១- អ្វីទៅជាថ្នាំងងុយគេង
ថ្នាំងងុយគេងជាពពួកថ្នាំដែលមានសកម្មភាពលើខួរក្បាលដែលធ្វើឲ្យយើងអាចគេងលក់ស្រួល។ ថ្នាំនេះប្រើសម្រាប់អ្នកជំងឺដេកមិនលក់ (Insomnia) និងអ្នកមានបញ្ហាក្នុងការដេក (គេងមិនស្កប់)។ នេះបើតាមការបញ្ជាក់របស់ឱសថការី គឹម កាណែល។
២- ប្រភេទថ្នាំងងុយគេង
ថ្នាំងងុយគេងមានច្រើនប្រភេទ ប្រភេទនីមួយៗប្រើទៅតាមស្ថានភាពរបស់អ្នកជំងឺ តើមានបញ្ហាដំណេកស្រាល ឬក៏ធ្ងន់ ហើយការប្រើថ្នាំងងុយគេងភាគច្រើនទាល់តែមានវេជ្ជបញ្ជា។
៣- ផលរំខានរបស់ថ្នាំងងុយគេង
ការលេបថ្នាំងងុយគេងអាចជួយបញ្ហាដំណេកយើងបានមែន តែក៏មានផលរំខានមកវិញខ្លះៗដែរ។ ឱសថការី គឹម កាណែល បន្តថា ផលរំខានអាស្រ័យទៅលើប្រភេទថ្នាំដែលយើងប្រើ ក្នុងចំណោមនោះ ផលរំខានដែលកើតមានញឹកញាប់រួមមាន៖
– ក្រហាយ ឬចាក់ៗនៅដៃជើង និងទ្រូង
– មិនឃ្លានអាហារ
– ទល់លាមក
– ឈឺពោះ រាក
– ពិបាករក្សាលំនឹងខ្លួនប្រាណ
– វិលមុខ
– ស្ងួតមាត់ និងក
– ឈឺក្បាល
– មិនសូវចងចាំ
– យល់សប្តិអាក្រក់
– ខ្សោយកម្លាំង។
៤- ការប្រើថ្នាំលើសកម្រិត
ការប្រើថ្នាំងងុយគេងលើសកម្រិតអាចបណ្ដាលឲ្យផលរំខានរបស់ថ្នាំកើនឡើងខ្ពស់ និងមានរយៈពេលយូរ ហើយករណីខ្លះអាចគ្រោះថ្នាក់ដល់ជីវិត។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmi]
