“Hello គ្រូពេទ្យ’ ធ្លាប់ប្រាប់ហើយ ថ្នាំពន្យារកំណើត មានផលប្រយោជន៍ច្រើន ជួយសម្អាតស្បែក កាត់បន្ថយហានិភ័យមហារីក។ នៅពេលប្រើប្រាស់ថ្នាំនេះច្រើនឆ្នាំ គ្នាយើងភាគច្រើនអាចនឹងខ្វាយខ្វល់ ពេលឈប់ប្រើអាចប៉ះពាល់អ្វីខ្លះ?
ពិតណាស់ ផលប៉ះពាល់ច្បាស់ជាមាន ប៉ុន្តែក៏អាស្រ័យលើប្រភេទថ្នាំ និងកម្រិតបរិមាណយើងប្រើដែរ ហើយខាងក្រោមនេះ ជាអ្វីអាចនឹងកើតមានលើរាងកាយយើង នៅពេលឈប់លេបថ្នាំពន្យារកំណើត។
១- ទម្ងន់នៅដដែល
ក្រោយឈប់លេបថ្នាំពន្យារកំណើត ស្រីៗប្រហែលជាអាចស្រកទម្ងន់ ១គីឡូ ឬនៅថេរ។ ទោះបីគ្នាយើងភាគច្រើន ជឿថាខ្លួនឡើងទម្ងន់ ប៉ុន្ដែការស្រាវជ្រាវបែបវិទ្យាសាស្រ្ត មិនបានរកឃើញ ការជាប់ពាក់ព័ន្ធរវាងការលេបថ្នាំពន្យារកំណើត ជាមួយនឹងការឡើងទម្ងន់នោះទេ។
ក្នុងការសិក្សានៅឆ្នាំ ២០១៤ លើករណីពាក់ព័ន្ធចំនួន ៤៩ រកឃើញថា ការពន្យារកំណើត ពុំបានបង្កផលប៉ះពាល់ទម្ងន់រាងកាយឡើយ។ “ពុំមានភស្ដុតាងច្បាស់លាស់ បង្ហាញថា ការចាប់ផ្ដើម ឬការបញ្ឈប់ការលេបថ្នាំពន្យារកំណើត នឹងជះឥទ្ធិពលដល់ទម្ងន់នោះទេ“។ នេះជាការបញ្ជាក់របស់លោក Neha Bhardwaj សាស្រ្ដាចារ្យផ្នែកវិទ្យាសាស្រ្តបន្ដពូជ នៃសាលាឱសថសាស្រ្ត Icahn ក្រុងញូវយ៉ក។
២- អាចកើតមុន
ថ្នាំពន្យារកំណើត បានបំបាត់ការកើតមុនសម្រាប់ស្រីៗភាគច្រើន ដោយសារថ្នាំនេះ អាចធ្វើឲ្យអ័រម៉ូន អង់ដ្រូហ្សែន ចុះខ្សោយ បង្កើតឲ្យមានខ្លាញ់នៅលើស្បែក។ ដូច្នេះ គ្នាយើងប្រហែលអាចកើតមុនវិញ ក្រោយឈប់លេបថ្នាំនេះ។
៣- អាចជ្រុះសក់
ក្រោយឈប់លេបថ្នាំពន្យារកំណើត អាចកើតមានជំងឺ Telogen Effluvium ជាហេតុបង្កឲ្យជ្រុះសក់។ Telogen Effluvium ជាធម្មតា កើតមានក្នុងរយៈពេល ៦ខែ ក្រោយរាងកាយធ្វើការបន្ស៉ាំទៅនឹងស្ថានភាពមិនផឹកថ្នាំពន្យារកំណើត។ ប៉ុន្ដែវេជ្ជបណ្ឌិតផ្នែករោគស្ត្រី Alyssa Dweck នៅក្រុងញូវយ៉ក បញ្ជាក់ថា ករណីជ្រុះសក់នេះ ជាបញ្ហាស្មុគស្មាញមួយ ដោយសារវាពាក់ព័ន្ធនឹងកត្ដាផ្សេងទៀតផងដែរ ដូចជា ស្រ្តេស ជាដើម។
៤- អាចមានវដ្ដរដូវមិនទៀងទាត់
លោក Josh Klein វេជ្ជបណ្ឌិតផ្នែកឱសថសាស្រ្ត នៅទីក្រុងញូយ៉ក អះអាងថា ស្រីៗមួយចំនួន ធ្លាប់លេបថ្នាំពន្យារកំណើត មានវដ្ដរដូវទៀតទាត់ ប៉ុន្ដែក្រោយការឈប់លេបថ្នាំនេះ អាចជួបបញ្ហាវដ្តរដូវមិនទៀង។ យ៉ាងណា ក្រោយរយៈពេល ២-៣ ខែ ទើបវដ្តរដូវត្រឡប់មកធម្មតាវិញ។
៥- វីតាមីន D អាចធ្លាក់ចុះ
ការសិក្សាថ្មី របស់សារព័ត៌មានសុខភាព Journal of Clinical Endocrinology & Metabolism រកឃើញថា ស្រីៗជាច្រើន បានជួបវិបត្តិធ្លាក់ចុះកម្រិតវីតាមីន D នៅពេលឈប់លេបថ្នាំពន្យារកំណើត។ នេះជាបញ្ហាចម្បងមួយ ពិសេសសម្រាប់គ្នាយើងព្យាយាមចង់មានផ្ទៃពោះ ខណៈវីតាមីន D អាចជួយគាំទ្រដល់គ្រោងឆ្អឹងបេប៊ី អំឡុងពេលពពោះ។
អត្ថបទពាក់ព័ន្ធ៖
៦- មានអារម្មណ៍ប្លែកនៅលើសុដន់
គ្នាយើងជាច្រើន ធ្លាប់លើកឡើងពាក់ព័ន្ធករណីឈឺចាប់សុដន់ មុនពេលមករដូវ ក្រោយឈប់លេបថ្នាំពន្យារកំណើត។ នៅពេលកំពុងលេបថ្នាំពន្យារកំណើត ថ្នាំនេះ បានជួយគ្រប់គ្រងកម្រិតអ័រម៉ូនស្រ្ដី ជួយបញ្ចៀសរោគសញ្ញាឈឺសុដន់ សម្រាប់ស្រ្ដីភាគច្រើន។ វេជ្ជបណ្ឌិតផ្នែករោគស្ត្រី Alyssa Dweck បញ្ជាក់ថា ស្រីៗមួយចំនួន ក៏ជួបបម្រែបម្រួលលក្ខណៈរបស់សុដន់ផងដែរ។
៧- ឈឺក្បាលច្រើនជាងមុន
យោងតាមការសិក្សានៅឆ្នាំ ២០០៤ ស្រីៗមួយចំនួន បានជួបបញ្ហាឈឺក្បាលប្រកាំង អំឡុងពេលមករដូវ ដែលនេះ ទំនងដោយសារការធ្លាក់ចុះនៃកម្រិតអ័រម៉ូន អង់ដ្រូហ្សែន។
៨- មានបញ្ហាចំណង់ផ្លូវភេទខ្លាំងជាងមុន
វេជ្ជបណ្ឌិតផ្នែករោគស្រ្ដី Guirlaine Agnant នៃមន្ទីរពេទ្យ Montefiore Mount Vernon ក្រុងញូវយ៉ក អះអាងថា ស្រីៗមួយចំនួន បានលើកឡើងពីបញ្ហាមានចំណង់ផ្លូវភេទខ្លាំង នៅពេលពួកគេបានលេបថ្នាំពន្យារកំណើតជាលើកដំបូង។ នេះទំនងជាដោយសារបម្រែបម្រួលការផលិតអរម៉ូន។ វេជ្ជបណ្ឌិតបន្ថែមថា ស្រ្ដីភាគច្រើន ជាធម្មតាជួបបញ្ហាកើនឡើងចំណង់ផ្លូវភេទ នៅពេលពួកគេឈប់លេបថ្នាំពន្យារកំណើត។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmi]
