ពលរដ្ឋខ្មែរយើងមិនតិចទេដែលបានទៅពិនិត្យ និងព្យាបាលសុខភាពនៅតាមមន្ទីរពេទ្យនានានៅប្រទេសវៀតណាមក្នុងមួយឆ្នាំៗ។ តែបើចូលក្នុងមន្ទីរពេទ្យហើយ គួរប្រុងប្រយ័ត្ន ព្រោះនៅទីនោះសម្បូរបាក់តេរីដែលស៊ាំនឹងថ្នាំច្រើនណាស់។
ក្នុងការសិក្សាលើអ្នកជំងឺ ២.២៣៣ នាក់ ក្នុងមន្ទីរពេទ្យ ១២ កន្លែង ពី ឆ្នាំ២០១៧-២០១៨ អ្នកវិទ្យាសាស្ត្រស៊ុយអែត និងវៀតណាម រកឃើញថា អ្នកជំងឺមានផ្ទុកបាក់តេរីស៊ាំនឹងថ្នាំជាច្រើន ដោយមានទាំងប្រភេទបាក់តេរី Carbapenem-resistant Enterobacteriaceae ដែលស៊ាំនឹងក្រុមថ្នាំបំបាត់ការឈឺចាប់ ប្រើដើម្បីព្យាបាលការឆ្លងមេរោគធ្ងន់ធ្ងរ។
ក្នុងការសិក្សា អ្នកវិទ្យាសាស្ត្រឃើញមានអត្រាខ្ពស់នៃបាក់តេរីពោះវៀនដែលស៊ាំនឹងថ្នាំជាច្រើន នៅតាមមន្ទីរពេទ្យនានា។ លោកសាស្ត្រាចារ្យ Hakan Hanberger ដឹកនាំការសិក្សា បញ្ជាក់ថា “រយៈពេលកាន់តែយូរ ដែលអ្នកជំងឺស្នាក់នៅមន្ទីរពេទ្យ ហានិភ័យនឹងកាន់តែខ្ពស់ ដែលពួកគេឆ្លងបាក់តេរីស៊ាំនឹងក្រុមថ្នាំ Carbapenems“។ ការសិក្សា ប៉ាន់ស្មានថា ប្រសិនបើអ្នកជំងឺស្នាក់នៅមន្ទីរពេទ្យ ១ថ្ងៃ ពួកគេមានឱកាសឆ្លងមេរោគ រហូតដល់ ៤,២%។
ការសិក្សា សន្និដ្ឋានថា មានការរាលដាលនៃបាក់តេរីស៊ាំនឹងថ្នាំជាច្រើន នៅក្នុងមន្ទីរពេទ្យវៀតណាម ដោយមានការចម្លងយ៉ាងខ្លាំងទៅអ្នកជំងឺ។ ចំណែកអង្គការសុខភាពពិភពលោក (WHO) បានចាត់ទុកវៀតណាមជាប្រទេសមានអត្រាខ្ពស់ខ្លាំង នៃការឆ្លងមេរោគស៊ាំនឹងថ្នាំបំបាត់ការឈឺចាប់។
អត្ថបទពាក់ព័ន្ធ៖
- អស្ចារ្យ! ពេទ្យប្រើពិសខ្យាដំរី សម្លាប់បាក់តេរីបង្កជំងឺដល់ទៅ២មុខ
- ឱបថើបឆ្កែឆ្មា អាចឆ្លងបាក់តេរី គ្រោះថ្នាក់ដល់ជីវិត
ដើម្បីលុបបំបាត់បញ្ហានេះ វៀតណាម ចាំបាច់ដាក់ចេញវិធានការនានា ដូចជា លើកកម្ពស់អនាម័យដៃ ប្រើវិធីសាស្ត្រសម្អាតនៅតាមមន្ទីរពេទ្យ និងទុកអ្នកជំងឺឆ្លងមេរោគឲ្យនៅដាច់តែឯង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmi]
