ជារឿយ គ្នាយើងមួយចំនួនគិតថា ជំងឺបេះដូងច្រើនជាបញ្ហារបស់ប្រុសៗ ប៉ុន្តែជំងឺបេះដូងជាហានិភ័យសុខភាពអាចគំរាមកំហែងអាយុជីវិតទាំងប្រុសៗ និងស្រីៗ។ ដោយសារ រោគសញ្ញាខ្លះនៃជំងឺបេះដូងកើតលើស្រីៗអាចខុសគ្នាពីបុរស ជាហេតុធ្វើឲ្យស្រីៗគ្នាយើងមិនដឹងថា គួរសម្គាល់ជំងឺបេះដូងបែបណា។

រោគសញ្ញាជំងឺបេះដូងដែលបង្ហាញញឹកញាប់នៅលើមនុស្សស្រី វាដូចគ្នាទៅនឹងមនុស្សប្រុសដែរដូចជា ឈឺទ្រូង មានសម្ពាធ ឬពិបាកក្នុងទ្រូង២-៣នាទី ឬទៅមកៗ។ ប៉ុន្តែស្រីៗកើតជំងឺបេះដូង មិនបង្ហាញសញ្ញាឈឺទ្រូងទេ គឺមានតែអារម្មណ៍ថាតឹងណែនទ្រូងប៉ុណ្ណោះ។ នេះបើតាមការឲ្យដឹងរបស់លោកវេជ្ជបណ្ឌិត ចាន់ ស៊ីណេត ឯកទេសជំងឺទូទៅ។

ខុសពីមនុស្សប្រុស ស្រីៗអាចកើតមានជំងឺគាំងបេះដូង ដោយមិនបង្ហាញរោគសញ្ញាពាក់ព័ន្ធនឹងការឈឺដើមទ្រូងដូចជា៖

មិនស្រណុកនៅក ថ្គាម ស្មារ ខ្នងផ្នែកខាងលើ ឬនៅពោះ
ដកដង្ហើមបានខ្លី
ឈឺដៃម្ខាង ឬទាំងពីរ
ក្អួត ចង្អោរ
បែកញើស
ស្រាលក្បាល វិលមុខ
អស់កម្លាំងខុសធម្មតា
ពិបាករំលាយអាហារ។ល។

រោគសញ្ញាទាំងអស់នេះ អាចមានសណ្ឋានមិនច្បាស់លាស់ ដែលធ្វើឲ្យស្រីៗពិបាកចំណាំទុកថា ខ្លួនមានកើតជំងឺបេះដូង ឬមួយយ៉ាងណា។ ម៉្យាងវិញទៀត ដោយហេតុផលថា មនុស្សស្រីមិនសូវសម្គាល់ពីសញ្ញានៃជំងឺបេះដូង ទើបបណ្ដាលឲ្យចូលសង្គ្រោះបន្ទាន់ ក្រោយពេលបេះដូងទទួលផលប៉ះពាល់រួចហើយ។

វេជ្ជបណ្ឌិតរូបនេះបន្តថា មានកត្តាប្រឈមជាច្រើនដែលធ្វើឲ្យកើតជំងឺបេះដូងដូចជា មានខ្លាញ់អាក្រក់ក្នុងសរសៃឈាមខ្ពស់ សម្ពាធឈាមខ្ពស់ និងជំងឺធាត់។ ប៉ុន្តែ កត្តាប្រឈមផ្សេងៗដែលធ្វើឲ្យវិវត្តជាជំងឺបេះដូងលើមនុស្សស្រីរួមមាន៖

– ជំងឺទឹកនោមផ្អែម

– ស្ត្រេស និងជំងឺបាក់ទឹកចិត្ត

– ជក់បារី

– ធ្វើចលនារាងកាយមិនច្រើន

– ស្ត្រីអស់រដូវ

– មានផលវិបាកពេលពពោះ

– មានប្រវត្តិគ្រួសារកើតជំងឺបេះដូង

– កើតជំងឺរលាកផ្សេងៗ។

ស្រីៗគ្រប់រូប គួរយកចិត្តទុកដាក់ទៅលើជំងឺបេះដូង មិនមែនកើតតែលើស្ត្រីវ័យចំណាស់ទេ មនុស្សស្រីវ័យក្រោម៦៥ឆ្នាំ ក៏ប្រឈមនឹងកើតជំងឺបេះដូងដែរ ពិសេសអ្នកដែលមានប្រវត្តិគ្រួសារកើតជំងឺបេះដូង។

ស្ទះសរសៃឈាមបេះដូង

ក្រៅពីឈឺទ្រូងរោគសញ្ញាជំងឺបេះដូងទាំងនេះ កើតញឹកញាប់លើស្រីៗ