អាការៈឈឺពោះ និងចង្អោរអាចកើតឡើងនៅអំឡុងពេល និងក្រោយពេលហាត់ប្រាណ មិនថាយើងស្ថិតក្នុងវ័យណា ឬមានទម្ងន់ប៉ុន្មានឡើយ។ ជាទូទៅ អាការៈឈឺពោះនេះ មានលក្ខណៈស្រាល ដែលងាយស្រួលក្នុងការព្យាបាល។ ពេលខ្លះ យើងអាចដោះស្រាយបញ្ហានេះបានតាមរយៈការផ្លាស់ប្ដូរបែបបទរស់នៅ ឬការញ៉ាំរបបអាហារត្រឹមត្រូវ។ ប៉ុន្តែ ជួនកាល យើងក៏ចាំបាច់ផ្លាស់ប្ដូរការហាត់ប្រាណ ដើម្បីសម្រួលដល់លក្ខខណ្ឌសុខភាពផងដែរ។
មូលហេតុទាំង៤នេះ អាចបង្កជាអាការៈឈឺពោះក្រោយហាត់ប្រាណ
១. ការឈឺពោះបណ្ដោះអាសន្នទាក់ទងនឹងការធ្វើលំហាត់ប្រាណ
នេះជាមូលហេតុទូទៅមួយ ដែលបង្កជាការឈឺចាប់នៅក្នុងពោះទាក់ទងនឹងការធ្វើលំហាត់ប្រាណ។ អាការៈនេះកើតឡើងនៅអំឡុងពេលដែលយើងធ្វើចលនានៅត្រង់តំបន់ពោះដដែលៗ ដូចជាការបោះបាល់ ឬរត់ជាដើម។ យោងតាមការសិក្សាមួយបានបង្ហាញថា កីឡាកររត់ប្រណាំងម្នាក់ក្នុងចំណោម៥នាក់ អាចប្រឈមនឹងអាការៈឈឺពោះបណ្ដោះអាសន្ននេះ ខណៈពេលរត់។
យ៉ាងណាមិញ មូលហេតុជាក់លាក់នៃអាការៈនេះនៅមិនទាន់បានដឹងច្បាស់នៅឡើយ ប៉ុន្តែយើងអាចបញ្ចៀសវាបានដោយការមិនញ៉ាំអាហារច្រើនពេកក្នុងរយៈពេល១ ទៅ២ម៉ោងមុនពេលធ្វើលំហាត់ប្រាណ។
២. ការហាត់ប្រាណ ឬបញ្ចេញសកម្មភាពខ្លាំងក្លា
ការហាត់ប្រាណ ឬបញ្ចេញសកម្មភាពខ្លាំងក្លាអាចប៉ះពាល់ដោយផ្ទាល់ដល់បរិវេណពោះ នៅអំឡុងពេល និងក្រោយពេលហាត់ប្រាណ។ បើទោះបីជាយើងហាត់ប្រាណជាប្រចាំក៏ដោយ ក៏អាចវិវត្តន៍ទៅជាអាការៈចង្អោរ ឬការឈឺចាប់នៅអំឡុងពេលពេលហាត់ប្រាណ ជាងអ្នកដែលហាត់ប្រាណលក្ខណៈបែបស្រាលៗដែរ។
៣. លក្ខខណ្ឌសុខភាព
ប្រសិនបើយើងមានជំងឺក្រពះ និងពោះវៀន ការហាត់ប្រាណអាចធ្វើឲ្យរោគសញ្ញារបស់យើងកាន់តែធ្ងន់ធ្ងរ។ ប៉ុន្តែ នេះមិនមានន័យថាយើងមិនគួរធ្វើលំហាត់ប្រាណឡើយ។ ពិតណាស់ គ្នាយើងអាចសាកល្បងលំហាត់ប្រាណដែលមានលក្ខណៈស្រាលៗ ដូចជាការដើរ ឬជិះកង់ និងគប្បីជៀសវាងការធ្វើលំហាត់ប្រាណធ្ងន់ធ្ងរ។
យោងតាមការស្រាវជ្រាវដែលទាក់ទងនឹងពោះវៀនរបស់Canadian Societyបានបង្ហាញថា លក្ខខណ្ឌសុខភាពមួយចំនួនដែលកាន់តែធ្ងន់ធ្ងរនៅពេលធ្វើលំហាត់ប្រាណខ្លាំងក្លា មានដូចជាជំងឺច្រាលទឹកអាសុីតក្រពះ និងជំងឺរលាកពោះវៀន ។ នៅក្នុងករណីនេះ គ្នាយើងគប្បីពិគ្រោះយោបល់ជាមួយនឹងគ្រូពេទ្យអំពីការធ្វើលំហាត់ប្រាណ ដើម្បីបានការណែនាំពីការផ្លាស់ប្ដូរបែបបទរស់នៅចំនួន ក៏ដូចជាជៀសផុតពីអាការៈឈឺពោះក្រោយធ្វើលំហាត់ប្រាណរួច។
[embed-health-tool-bmr]
