វ័យចាស់ (អាយុល្បាក់ ៦០ឡើងទៅ) ពិតជាត្រូវការ ការយកចិត្តទុកដាក់ខ្ពស់ ជាពិសេស ប្រសិនបើលេចចេញសញ្ញាខុសប្រក្រតី គួរឲ្យសង្ស័យមួយចំនួន។ កុំចេះតែមិនអី បើមានចាស់ៗ ក្នុងគ្រួសារ ជាពិសេសប៉ាម៉ាក់ ឬយាយតា នៅផ្ទះ មានអីមិនស្រួល។ បញ្ហាខ្លះ អាចឈានដល់ពិការភាព ឬស្លាប់បាន។ ហេតុនេះហើយ សូមតាមឃ្លាំមើលរោគសញ្ញាដូចតទៅនេះដែលត្រូវការការពិនិត្យសុខភាពភ្លាមៗ ឬជាប្រចាំទៀងទាត់ជាមួយវេជ្ជបណ្ឌិត។ អ្វីដែលគួរធ្វើគឺ គួរមានលេខទូរសព្ទ ពេទ្យដែលជឿទុកចិត្តបាន ក្នុងករណីបន្ទាន់ ឬសួរនាំ ប្រឹក្សាបន្ថែម។
១- #ដកដង្ហើមបែបដង្ហក់
ក្រៅពីគាំងបេះដូង ការឈឺទ្រូងក៏ជារោគសញ្ញាឲ្យដឹងហេតុផងដែរ។ មនុស្សចាស់ម្នាក់ៗមានរោគសញ្ញាខុសប្លែកៗគ្នា។ ឧទាហរណ៍ ប្រសិនបើពិបាកដកដង្ហើមបន្ទាប់ពីដើរបានរយៈពេលខ្លី វាអាចជារោគសញ្ញាដំណាក់កាលដំបូងនៃ ការស្ទះដោយភាគ ឬទាំងស្រុងនៃសរសៃអាកទែដែលដឹកនាំឈាមទៅកាន់បេះដូង ឬភាសាពេទ្យហៅថា Coronary ischemia។ បើ ជួបប្រទះនូវការហត់ដង្ហក់រ៉ាំរ៉ៃ ឬខុសធម្មតាសូមទៅជួបវេជ្ជបណ្ឌិតភ្លាម។ ក្នុងករណីដែល កើត រោគសញ្ញាបន្ថែមណាមួយដូចជាសម្ពាធ ឬតឹងនៅក្នុងទ្រូង ដង្ហក់ ឬវិលមុខ សូមស្វះស្វែងរកការថែទាំសង្គ្រោះបន្ទាន់ភ្លាមៗ។
២- #ធេងធោងវិលមុខ
បើនៅសុខៗស្រាប់តែ វិលមុខខ្លាំង ធេងធោង ឈរមិននឹង នោះវាអាចនឹងជាសញ្ញានៃជំងឺស្ទះ/ដាច់សរសៃឈាមក្នុងខួរក្បាល (Stroke)។ តាមដានឲ្យជាប់ បើចាស់ៗ ឧស្សាហ៍បែបនេះ កុំបណ្ដោយ ហើយគិតថាមិនអី។ រោគសញ្ញាបន្ថែមរួមមានពិបាកនិយាយ ឬនិយាយពាក្យឡុលៗជាប់រដឹក មានអារម្មណ៍វិលមុខខ្លាំង មើលអត់ច្បាស់ និងភាពទន់ខ្សោយ ឬស្ពឹកមុខ ដៃ ឬជើង ជាដើម។
៣- #ធ្លាក់ឈាមក្រោយអស់រដូវ
សម្រាប់អ៊ុំៗ ឬយាយៗ បើធ្លាក់ឈាម ឬហូរឈាមតាមទ្វារមាសក្រោយអស់រដូវហើយនោះ បញ្ជាក់ថាមានបញ្ហាខុសភាពហើយ គួរតែជួបវេជ្ជបណ្ឌិតឲ្យបានលឿនបំផុត។ ករណីខ្លះនៃការហូរឈាមតាមទ្វារមាសក្រោយអស់រដូវគឺមិនសូវធ្ងន់ធ្ងរដូចករណីផ្សេងដទៃទៀត។ ការហូរឈាមនេះ អាចជាសញ្ញា ជំងឺមហារីកជាដើម។
៤- #លិង្គមិនងើប
វិបត្តិការបះរឹងនៃលិង្គ (ED) ឬអសមត្ថភាពផ្លូវភេទបុរស ត្រូវបានរកឃើញកាន់តែច្រើនជាងធម្មតាជាមួយនឹងវ័យកាន់តែកើនឡើង។ ក្រៅពីបញ្ហាទៅលើផ្លូវភេទ ជំងឺ ED អាចមានទំនាក់ទំនងទៅនឹងជំងឺសរសៃឈាមបេះដូង ជំងឺទឹកនោមផ្អែម និងសភាពបញ្ហាជំងឺដទៃផ្សេងទៀត។ ខណៈដែលតាមធម្មតាមានបុព្វហេតុផ្លូវកាយ ជំងឺ ED ក៏អាចជាការឆ្លើយតបរបស់ផ្លូវកាយផងដែរទៅនឹងភាពតានតឹងផ្លូវចិត្ត ឬជំងឺធ្លាក់ទឹកចិត្តដែលកើនឡើង។ ការព្យាបាលគឺមានសម្រាប់សភាពជំងឺនេះ។
៥- #ទល់លាមក
ប្រសិនបើមនុស្សចាស់ជួបប្រទះនូវការទល់លាមកភ្លាមៗ ឬជួបប្រទះនូវរោគសញ្ញាដទៃផ្សេងទៀតដែលអមមកជាមួយ អាចនឹងមានបញ្ហាធំជាងនេះ ដូចជាប្រជុំរោគសញ្ញាពោះវៀនខ្សោយ ឬថែមទាំងអាចជាមហារីកពោះវៀនធំទៀតផង។ វេជ្ជបណ្ឌិតអាចនឹងត្រូវការពិនិត្យថាតើមានឈាមនៅក្នុងលាមកដែរឬទេ មានការឆ្លាស់គ្នារវាងការទល់លាមក ការរាករូស និងភាពរាន់ក្នុងការបន្ទោបង់លាមកដើម្បីរុករកមើលបញ្ហាសុខភាព។
អាហារដែលអ្នកកំពុងបរិភោគ និងឱសថតាមវេជ្ជបញ្ជាដែលអ្នកកំពុងតែប្រើប្រាស់ចូលរួមចំណែកនៅក្នុងការផ្លាស់ប្តូរពណ៌សម្បុរលាមកបាន។ ឧទាហរណ៍ ឱសថបំប៉នបន្ថែមជាតិដែក និងឱសថសម្រាប់រាករូសដូចជា Pepto-Bismol អាចប្លែងលាមកទៅជាពណ៌ខ្មៅ ឬឡើងខ្មៅដូចជ័រឈើ។ អ្វីមួយក៏ដោយនៅក្នុងរយៈចន្លោះពីពណ៌ត្នោតដល់ពណ៌បៃតងគឺជាទូទៅធម្មតា តែលាមកខ្មៅ ឬលាមកមានឈាមគឺកម្រនឹងមិនអីណាស់។
ជំងឺដំបៅរលាកខូងសាច់ ឫសដូងបាត ជំងឺរលាកកំពកពោះវៀនធំ និងសភាពបញ្ហាផ្នែកក្រពះពោះវៀន (GI)ដទៃផ្សេងទៀតគឺត្រូវតែពិនិត្យមើលពេលទៅជួបវេជ្ជបណ្ឌិត។
៦- #ហើមឬឈឺដោះ
ការឈឺចាប់ ឬហើម ហើយប្រែពណ៌សុដន់ ឬមានខ្ទុះនៅក្បាលដោះ អាចជាសញ្ញាទីមួយនៃជំងឺមហារីកដោះ ទាំងប្រុស ទាំងស្រី។ ប្រសិនបើរកឃើញបានពីដើមទី ឬយើងហៅថា ដំណាក់កាលដំបូង ជំងឺមហារីកដោះអាចព្យាបាលបាន។
៧- #ជាំឬប្រែពណ៌ស្បែក
កាន់តែចាស់ទៅ ស្បែកបាត់បង់ភាពយឺតរលាស់ ហើយឆ្លងកាត់ការប្រែប្រួលច្រើន។ សម្រាប់ហេតុផលនេះ មនុស្សចាស់ខ្លះអាចនឹងជឿទាំងខុសថាការជាំ ឬការប្រែពណ៌សម្បុរស្បែកខុសធម្មតាកើនខ្លាំងឡើងៗជាការធម្មតា។ យ៉ាងនេះក្តី ការជាំស្បែក និងការប្រែពណ៌សម្បុរស្បែកខុសធម្មតាអាចត្រូវបានបង្កឡើយដោយសារឱសថ ដូចជាឱសថពង្រាវឈាមការពារឈាមកក និងសភាពវេជ្ជសាស្ត្រដែលអាចនឹងជះឥទ្ធិពលលើកោសិកាគ្រាប់ឈាមក្រហម និងពេលវេលាឈាមកក។
៨- #ឆាប់ហត់អស់កម្លាំង
កង្វះវីតាមីន និងជាតិរ៉ែខនិជ ជំងឺស្លេកស្លាំង និងការប្រែកាន់តែអាក្រក់ឡើងនៃសភាពសុខភាពនាពេលបច្ចុប្បន្នអាចនឹងជាអ្វីដែលត្រូវបន្ទោស។ ដោយគ្មានការពិនិត្យសុខភាពឲ្យបានគ្រប់ជ្រុងជ្រោយទេនោះ ប្រការនេះអាចជះផលប៉ះទង្គិចជាអវិជ្ជមានទៅលើសុខភាពជាទូទៅ ហើយដាក់ឲ្យមានភាពមានកម្រិតដែនកំណត់ផ្លូវកាយសម្រាប់មនុស្សចាស់។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញ វេជ្ជបញ្ជា មិនធ្វើរោគវិនិច្ឆ័យ ឬការព្យាបាលជូនទេ៕
[embed-health-tool-bmi]
