ដោយសារបច្ចេកវិទ្យាបច្ចុប្បន្នកាន់តែទំនើប តិចនិកព្យាបាលបញ្ហាសុខភាពផ្សេងៗ ក៏កាន់តែសម្បូរបែប ពិសេសវិធីសាស្ត្រថ្មីៗ ព្យាបាលជំងឺមុន ត្រូវគេរកឃើញជាបន្តបន្ទាប់ ដោយក្នុងនោះមានទាំងការប្រើថ្នាំលេប ថ្នាំលាប ការព្យាបាលបែបធម្មជាតិជាដើម។ ប៉ុន្តែនៅមានវិធីព្យាបាលពិសេសមួយទៀត គ្នាយើងខ្លះអាចមិនដឹង នោះគឺព្យាបាលមុនដោយចាក់ថ្នាំក្រោមស្បែក ដែលត្រូវអ្នកជំនាញអះអាងមានប្រសិទ្ធភាពខ្ពស់។ ចាក់ថ្នាំក្រោមស្បែកម៉េចវិញ? តោះ! មកស្វែងយល់ក្នុងអត្ថបទ “Hello គ្រូពេទ្យ’ ទាំងអស់គ្នា។
ស្វែងយល់ពីវិធីព្យាបាលមុនដោយចាក់ថ្នាំក្រោមស្បែក
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១- មូលហេតុនាំឲ្យកើតមុន
គ្នាយើងស្ទើរទាំងអស់ ច្បាស់ជាធ្លាប់ជួបរឿងកើតមុន ទោះតិច ឬច្រើនក៏ដោយ ហើយក៏មានគ្នាយើងមិនតិចដែរ បានដឹងពីមូលហេតុ មុនកើតឡើងដោយសារអ្វីឲ្យប្រាកដ? ពិតណាស់ ជាទូទៅមុនកើតឡើង នៅពេលរន្ធរោមលើស្បែកមានពោរពេញ សម្បូរទៅដោយខ្លាញ់ និងកោសិកាងាប់ៗ នាំឲ្យកោសិកានោះ ឡើងមកខាងលើផ្ទៃមុខ និងស្ទះនៅក្នុងរន្ធរោម។ យ៉ាងណា នៅមានកត្តាជាច្រើនទៀត អាចធ្វើឲ្យឡើងមុនពេញមុខ ដូចជា៖
– កត្តាអ័រម៉ូន៖ អ័រម៉ូន អាចធ្វើឲ្យមានបម្រែបម្រួលការផលិតសារធាតុខ្លាញ់ ជាមូលហេតុដែលមុនភាគច្រើនកើតលើក្មេងវ័យជំទង់ នៅពេលដែលអ័រម៉ូនកើតឡើងមិនប្រក្រតី។
– របបអាហារ៖ អាហារផលិតពីទឹកដោះគោ និងអាហារសម្បូរជាតិស្ករ ក៏អាចធ្វើឲ្យមានបញ្ហាមុនដូចគ្នា។
– ប្រើប្រាស់ថ្នាំ៖ ថ្នាំមួយចំនួន អាចធ្វើឲ្យឡើងមុន ដូចនេះគួរតែពិគ្រោះជាមួយគ្រូពេទ្យ មុននឹងប្រើថ្នាំណាមួយ។
– ស្បែកកខ្វក់៖ បញ្ហាមុននឹងកាន់តែធ្ងន់ បើរន្ធរោមមិនខ្យល់ចេញចូលគ្រប់គ្រាន់។ ការបែកញើស និងការប៉ះពាល់ស្បែកមុខ អាចធ្វើឲ្យរន្ធរោមមិនស្អាត ហេតុនេះគ្នាយើង គួរតែជូត និងលាងមុខឲ្យបានស្អាត ពិសេសស្រីៗពេលផាត់តុបតែងមុខ។
អត្ថបទពាក់ព័ន្ធ៖
២- វិធីព្យាបាលមុនដោយចាក់ថ្នាំក្រោមស្បែក
ការចាក់ថ្នាំទៅក្រោមស្បែកមុខ ជាវិធីព្យាបាលមួយ មិនមែនជាការវះកាត់ ដោយអ្នកជំនាញព្យាបាលបញ្ហាមុន នឹងប្រើម្ជុលតូចៗ ជាមួយថ្នាំមួយចំនួន ចាក់ទៅក្រោមជាលិកាស្បែក។ ការចាក់ថ្នាំទៅក្រោមស្បែក ជាវិធីសាស្រ្តសម្រាប់ព្យាបាលបញ្ហាជាច្រើន ពិសេសបញ្ហាមុន និងមិនប៉ះពាល់សុខភាពធ្ងន់ធ្ងរនោះទេ ដោយថ្មីៗនេះ ពលរដ្ឋជាច្រើននៅទ្វីបអឺរ៉ុប និងសហរដ្ឋអាមេរិក ទទួលស្គាល់ថា វិធីព្យាបាលបែបនេះ ពិតជាមានប្រសិទ្ធភាពខ្ពស់។
ការចាក់ថ្នាំទៅក្រោមស្បែក អាចព្យាបាលបញ្ហាមុន តាមរយៈការភ្ញោចទាំងសារធាតុគីមី និងរាងកាយ។ ការចាក់ថ្នាំពិសេសមួយចំនួន អាចបង្កើតសារធាតុប្រឆាំងអុកសុីតកម្មទៅលើស្បែក ដើម្បីបន្ថយការបញ្ចេញខ្លាញ់ ជួយឲ្យបញ្ហាកើតមុនប្រសើរឡើង។ ក្រៅពីនេះ វិធីសាស្ត្រចាក់ថ្នាំក្រោមស្បែក អាចភ្ញោចឲ្យមានការលូតលាស់កោសិកាថ្មីៗ ជំនួសកោសិកាចាស់ដែលងាប់ ជួយឲ្យស្បែកភ្លឺថ្លាជាងមុនទៀតផង។
បញ្ហាមុន ពិតណាស់ អាចព្យាបាលបានជាសះស្បើយ តាមរយៈការព្យាបាលមួយដ៏ត្រឹមត្រូវ និងទម្លាប់រស់នៅមួយដែលសមស្រប។ យ៉ាងណា គ្នាយើងគួរពិគ្រោះជាមួយអ្នកឯកទេសស្បែក ដើម្បីទទួលព័ត៌មានបន្ថែម ពីវិធីសាស្ត្រព្យាបាល និងជម្រើសផ្សេងទៀត។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម