គ្នាយើងមានបញ្ហាមុខឡើងមុន មុខមានខ្លាញ់ ឬស្នាមជ្រួញមែនទេ? ការមានស្បែកស្អាតមិនមែនមកពីកត្តាហ្សែនតែមួយមុខទេ ប៉ុន្តែការថែទាំស្បែកជាប្រចាំក៏ជួយដល់សុខភាពស្បែកដែរដោយជួយសម្អាត កម្ចាត់កោសិកាងាប់ និងផ្តល់សំណើមដល់មុខ។ យើងអាចថែទាំស្បែកមុខបានដោយធ្វើម៉ាសបិទមុខបានដោយខ្លួនឯងនៅផ្ទះទៅតាមប្រភេទស្បែកមុខរបស់យើង។
១. ម៉ាសសម្រាប់មុខឡើងមុន
មុនគឺជាបញ្ហាស្បែកទូទៅមួយដែលយើងតែងជួបប្រទះ។ មុនកើតឡើងនៅពេលខ្លាញ់ កោសិកាស្បែកងាប់ និងបាក់តេរីស្ទះនៅនឹងរន្ធញើស។ ប៉ុន្តែប្រូតេអ៊ីនក្នុងស៊ុតពណ៌សអាចកម្ចាត់បាក់តេរីនៅលើស្បែក និងជួយបំបាត់ស្នាមជាំបាន។
គ្រឿងផ្សំ៖ ស៊ុតពណ៌ស ២ ទៅ ៣ គ្រាប់។
របៀបធ្វើ៖ យកស៊ុតពណ៌សដាក់ក្នុងចាន រួចយកសំឡីជ្រលក់នឹងស៊ុតពណ៌ស ហើយជូតថ្នមៗលើមុខ។ ក្រោយពីជូតហើយទុកចោល ១០ ទៅ ១៥ នាទី និងជូតសម្អាតជាមួយកន្សែងសើម។ បន្ទាប់ពីនេះលាបទឹកសំណើម (moisturizer)លើផ្ទៃមុខបន្ថែម។
២. ម៉ាសសម្រាប់មុខឡើងពណ៌
ការប្រែពណ៌លើស្បែកកើតឡើងនៅពេលដែលមុនបានជាសះស្បើយ ហើយវាត្រូវបានគេហៅថាការឡើងពណ៍លើស្បែកក្រោយមានការរលាក (post-inflammatory hyperpigmentation)។ សម្រាប់បញ្ហាស្បែកបែបនេះយើងអាចធ្វើម៉ាសល្មៀតដោយខ្លួនឯងដើម្បីកាត់បន្ថយការរលាក។
គ្រឿងផ្សំ៖ ម្សៅល្មៀត ១ ស្លាបព្រាកាហ្វេ និងទឹកឃ្មុំ ១ ទៅ ២ស្លាបព្រាកាហ្វេ។
របៀបធ្វើ៖ យកម្សៅល្មៀតទៅលាយជាមួយនឹងទឹកឃ្មុំ រួចយកមកម៉ាស្សាថ្នមៗលើមុខ និងទុកចោល ១០ នាទី។ បន្ទាប់ពីនេះលាងសម្អាតនឹងទឹកក្ដៅឧណ្ហៗ។
៣. ម៉ាសសម្អាតរន្ធញើស
Oatmeal និងbanking soda អាចកម្ចាត់កោសិកាស្បែកងាប់ និងសម្អាតរន្ធញើសបាន។
គ្រឿងផ្សំ៖ oatmeal ២ ស្លាបព្រាកាហ្វេ និងBanking soda ១ ស្លាបព្រាកាហ្វេ។
របៀបធ្វើ៖ លាយ oatmeal និង banking soda ជាមួយនឹងទឹកបន្តិច រួចយកមកម៉ាស្សាលើមុខថ្នមៗ និងទុករហូតដល់ម៉ាសស្ងួតទើបលាងសម្អាតជាមួយនឹងទឹកក្ដៅឧណ្ហៗ។ ក្រោយពីលាងសម្អាតហើយលាបទឹកសំណើម (moisturizer)លើផ្ទៃមុខបន្ថែម។
៤. ម៉ាសសម្រាប់មុខខ្លាញ់
មុខសម្បូរខ្លាញ់ដោយសាររន្ធញើសរបស់យើងផលិតខ្លាញ់ច្រើន។ ខ្លាញ់នេះអាចកកនៅក្នុងរន្ធញើសដែលបណ្ដាលឲ្យមុខឡើងមុន និងរលាក។ ផ្លែចេកអាចជួយស្រូបយកជាតិខ្លាញ់នៅលើស្បែក ខណៈក្រូចឆ្មារជួយសម្អាតរន្ធញើស។
គ្រឿងផ្សំ៖ ផ្លែចេក ១ ផ្លែ ទឹកក្រូចឆ្មារ ១ មិល្លីលីត្រ និងប្រេងអូលីវ ១ ស្លាបព្រាកាហ្វេ។
របៀបធ្វើ៖ យកផ្លែចេកទៅកិន រួចលាយជាមួយនឹងទឹកក្រូចឆ្មារ និងប្រេងអូលីវ។ ក្រោយពីលាយរួចយកទៅបិទលើមុខ និងទុកចោល ១៥ នាទីទើបលាងសម្អាតចេញជាមួយទឹកក្ដៅឧណ្ហៗ។
៥. ម៉ាសសម្រាប់មុខស្ងួត
ម៉ាស់នេះគឺជួយឲ្យស្បែករក្សាជាតិសំណើម និងជួយបំបាត់អាការៈរមាស់ និងស្បែកស្រអាប់។
គ្រឿងផ្សំ៖ មានផ្លែត្រសក់កន្លះផ្លែ និងជែលប្រទាលកន្ទុយក្រពើ ២ ស្លាបព្រាកាហ្វេ។
របៀបធ្វើ៖ យកត្រសក់ទៅកិន និងលាយជាមួយជែលប្រទាលកន្ទុយក្រពើ រួចយកមកម៉ាស្សាថ្នមៗលើមុខ និងទុកចោល ៣០ នាទីទើបលាងសម្អាតនឹងទឹកចេញវិញ។
៦. ម៉ាសសម្រាប់ស្នាមជ្រួញ
ការព្យាបាលមុខជាប្រចាំអាចកាត់បន្ថយស្នាមជ្រីវជ្រួញបាន ហើយជួយឲ្យស្បែកតឹងផងដែរ។ ការប្រើប្រាស់ផ្លែបឺរ និងម្សៅកាកាវជួយជំរុញដល់ការផលិតខូឡាជេន រីឯទឹកឃ្មុំផ្តល់សំណើមដល់ស្បែក និងជួយឲ្យស្បែកទន់។
គ្រឿងផ្សំ៖ ផ្លែបឺរ ២ ផ្លែ ទឹកឃ្មុំ ១ ស្លាបព្រាកាហ្វេ និងម្សៅកាកាវ ២ ស្លាបព្រាកាហ្វេ។
របៀបធ្វើ៖ យកផ្លែបឺរទៅកិន ហើយលាយជាមួយនឹងម្សៅកាកាវ និងទឹកឃ្មុំ រួចយកទៅម៉ាស្សាថ្នមលើមុខ និងទុកចោល ២០ នាទីទើបលាងសម្អាតនឹងទឹកក្ដៅឧណ្ហៗ។
អ្វីដែលគួរធ្វើ និងមិនគួរធ្វើដើម្បីទទួលបានប្រសិទ្ធភាពពីម៉ាស៖
គួរធ្វើ៖
- មុននឹងបិទម៉ាសគួរសម្អាតមុខជាមុនសិន
- ទុកម៉ាសចោលចន្លោះ ១០ ទៅ ៣០ នាទីដើម្បីឲ្យសារធាតុជ្រាបចូលស្បែកមុខ និងគួរបិទមុនពេលងូតទឹក
- ក្រោយពីសម្អាតម៉ាសចេញពីមុខគួរប្រើទឹកសំណើម (moisturizer)
- គួរជ្រើសរើសម៉ាសឲ្យត្រូវប្រភេទមុខរបស់យើង
- ក្រោយពីសម្អាតម៉ាស គួរលាងមុខនឹងទឹកត្រជាក់ដើម្បីផ្ចិតរន្ធញើស។
មិនគួរធ្វើ៖
- មិនត្រូវប្រើម៉ាសប្រសិនជាយើងមានបញ្ហារលាកស្បែក ស្បែកឡើងក្រហម រមាស់ ឬមានកន្ទួល
- កុំប្រើម៉ាសរាល់យប់ យកល្អគួរប្រើមួយទៅពីរដងក្នុងមួយសប្តាហ៍
- កុំទុកម៉ាស់ចោលលើមុខយូរម៉ោងពេកដែលនេះអាចធ្វើឲ្យរលាកស្បែក
- កុំដុសមុខខ្លាំងៗពេលលាងសម្អាតម៉ាសចេញ ព្រោះអាចបង្កឲ្យរលាក និងឡើងក្រហម។
អត្ថបទពាក់ព័ន្ធ៖
- ស្បែកស្ងួតបណ្ដាលមកពីកត្តាទាំងនេះ តើត្រូវដោះស្រាយបែបណា?
- ស្ថានភាពស្បែក ៤ ប្រភេទនេះ គ្នាយើងគួរដឹង ដើម្បីងាយស្រួលថែទាំ
- វីតាមីន C លាក់កំពូលអត្ថប្រយោជន៍ អាចជួយស្បែកឲ្យស ភ្លឺរលោង
[embed-health-tool-due-date]
