ម៉ាក់ៗខ្លះ ព្រោះតែមិនចង់ខ្ជះខ្ជាយទឹកដោះគោដែលកូនទើបម៉ឹមបន្តិច ឬឆុងហើយកូនមិនបៅ ច្រើនតែស្ដាយក៏យកទៅទុក ឬក្លាស្សេក្នុងទូទឹកកក ដើម្បីឲ្យកូនញ៉ាំពេលក្រោយទៀត។ តើទឹកដោះគោឆុងរួចអាចរក្សាទុកបានប៉ុន្មានម៉ោង មិនខូចគុណភាព?

ដើម្បីឲ្យច្បាស់ពីបញ្ហានេះ លោកស្រីវេជ្ជបណ្ឌិត ហួរ ដានេ អនុប្រធាននាយកដ្ឋានអាហារូបត្ថម្ភ នៃមន្ទីរពេទ្យកុមារជាតិបានប្រាប់មក Helloគ្រូពេទ្យ ថា ទឹកដោះគោឆុងនៅសល់ អាចយកទៅទុកនៅកន្លែងដែលមានសីតុណ្ហភាពធម្មតា ឬក្នុងទូទឹកកកបាន តែទុកបានត្រឹម ១-១ ម៉ោងកន្លះប៉ុណ្ណោះ។ បើទុកយូរជាងនេះ ទឹកដោះគោខូចគុណភាពហើយ ត្រូវចាក់វាចោល កុំទៅស្ដាយអី ព្រោះពេលឲ្យកូនបន្តបៅទឹកដោះគោទាំងនោះ អាចធ្វើឲ្យឈឺពោះ ក្អួត ឬរាករូសក៏មាន លើសពីនោះ មេរោគនឹងចាប់លូតលាស់ក្នុងទឹកដោះគោ។

ទោះទឹកដោះឆុងរួចអាចរក្សាទុកបានពី ១-១ម៉ោងកន្លះ ក្តី តែលោកស្រីវេជ្ជបណ្ឌិតមិនលើកទឹកចិត្តឲ្យយើងឆុងទឹកដោះគោច្រើនសល់ទុកឲ្យកូនមឹមលើកក្រោយទៀតឡើយ គួរតែឆុងត្រឹមកម្រិតល្មមកូនម៉ឹមអស់ទៅបានហើយ។

ម៉ាក់ៗដែលឲ្យកូនម៉ឹមដោះគោត្រូវចងចាំថា ទឹកដោះគោខុសពីទឹកដោះម្ដាយ ព្រោះទឹកដោះម្ដាយអាចរក្សាទុករហូតទៅដល់ច្រើនថ្ងៃ ប្រសិនបើយើងយកទៅបង្កក។

អត្ថបទពាក់ព័ន្ធ៖

ចង់ឲ្យកូនបៅម្សៅទឹកដោះគោ គួរស្វែងយល់ពីគុណវិបត្តិ និងគុណសម្បត្តិជាមុន
ចេះរបៀបឆុងម្សៅទឹកដោះគោត្រឹមត្រូវ ទើបអូនៗមិនសូវឈឺ

ប្រសិនបើកូនម៉ឹមផង ឈប់ផង ពេលឈប់យើងត្រូវយកគម្របទឹកដបទឹកដោះគោមកបិទភ្លាមៗ ហើយបើអស់ហើយត្រូវលាងសម្អាតដបទឹកដោះគោភ្លាមៗ ព្រោះបើទុលចោលវានឹងមានកំណកជាប់ដប ធ្វើឲ្យពិបាកលាងសម្អាត ឬងាយនឹងកើតមេរោគ។ ចំណែកការលាងស្អាតត្រូវប្រើជាមួយសាប៊ូ បន្ទាប់មកស្ងោរសម្លាប់មេរោគ ត្រូវរលាស់ទឹកឲ្យស្ងួត ដើម្បីកុំឲ្យដបបែកញើស និងទុកដាក់នៅកន្លែងស្ងួត ស្អាត បិទឲ្យជិត កុំឲ្យមានធូលីចូល។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ទឹកដោះគោ​​​កូន​​​ម៉ឹម​​​​​សល់ អាច​​ទុក​​បាន​​ប៉ុន្មាន​​ម៉ោង?​

ទឹកដោះគោកូនម៉ឹមសល់ អាចទុកបានប៉ុន្មានម៉ោង?