ទឹកដោះម្ដាយជាអាហារលេខ ១ របស់ទារក ហើយអ្នកជំនាញមួយចំនួនតែងប្រៀបធៀបទឹកដោះម្ដាយដូចនឹងឱសថទិព្វសម្រាប់ទារក ព្រោះមានផ្ទុកសារធាតុចិញ្ចឹមគ្រប់មុខដែលទារកត្រូវការ និងជួយការពារកូនពីការកើតជំងឺតូចតាចមួយចំនួនថែមទៀតផង។ ទោះជាយ៉ាងណា ទឹកដោះម្ដាយខ្វះនូវវីតាមីនចាំបាច់មួយសម្រាប់ទារកនោះគឺ វីតាមីន D។
ទឹកដោះម្ដាយសំខាន់ តែបើមិនប្រយ័ត្នកូនអាចខ្វះវីតាមីនមួយប្រភេទ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
យោងតាម CDC អាមេរិកឲ្យដឹងថា វីតាមីន D ត្រូវការជាចាំបាច់ ដើម្បីគាំទ្រដល់ការលូតលាស់ឆ្អឹងឲ្យមានសុខភាពល្អ បង្ការបញ្ហាដែលបណ្ដាលឲ្យឆ្អឹងខ្សោយ ឬខូចទ្រង់ទ្រាយ។ កង្វះវីតាមីន Dលើទារកដែលបំបៅដោយទឹកដោះម្តាយគឺកម្រណាស់ ប៉ុន្តែវាអាចកើតឡើងបើទារកមិនទទួលបានវីតាមីន D បន្ថែមពីអាហារ ឬអាហារបំប៉នវីតាមីន D ឬការទទួលបានពីពន្លឺព្រះអាទិត្យមិនគ្រប់គ្រាន់។
ទាក់ទងនឹងបញ្ហានេះដែរ លោកស្រីវេជ្ជបណ្ឌិត កុសល កណិការ ឯកទេសជំងឺកុមារ សញ្ញាប័ត្រពីប្រទេសបារាំង បានពន្យល់ឲ្យដឹងដែរថា ដោយសារទឹកដោះម្ដាយមិនសូវសម្បូរវីតាមីន D ហេតុដូច្នេះហើយ ទារក ឬកុមារដែលបៅទឹកដោះម្ដាយ ត្រូវបានណែនាំឲ្យទទួលវីតាមីន D3 បន្ថែមចំនួន ៤០០IU/ថ្ងៃ (ចាប់តាំងពីពេលកើតដល់អាយុ ៦ខែ)។ លោកស្រីបន្តថា ចំណែក កុមារដែលបៅទឹកដោះគោម្សៅ មិនចាំបាច់ផ្ដល់វីតាមីន D បន្ថែមដូចក្មេងបៅទឹកដោះម្ដាយនោះទេ។
វេជ្ជបណ្ឌិតរូបនេះបន្ថែមឲ្យដឹងទៀតថា ចាប់ពីអាយុ ៦ខែ នៅពេលដែលកុមារទទួលបាននូវអាហារសម្រន់បន្ថែមដែលសម្បូរវីតាមីនហើយ កុមារញ៉ាំអាហារបានច្រើន និងត្រូវពន្លឺថ្ងៃគ្រប់គ្រាន់ កុមារមិនចាំបាច់បន្ថែមវីតាមីន D ទៀតទេ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម