ការបំបៅដោះកូន៖ អ្វីដែលម្តាយគ្រប់រូបត្រូវដឹង

ការបំបៅដោះកូនគឺសំដៅទៅលើការបញ្ចេញទឹកដោះពីក្រពេញដោះ និងក្នុងអំឡុងពេលដែលម្ដាយបំបៅដោះកូន។ ការយល់ដឹងពីការបំបៅកូន និងរបៀបដែលវាធ្វើការអាចជួយឲ្យម្តាយដោះស្រាយពីបញ្ហាក្នុងពេលបំបៅដោះកូនបានជាច្រើន។

១- ការផ្លាស់ប្តូរក្នុងខ្លួនក្នុងអំឡុងពេលបំបៅកូន

នៅដំណាក់កាលដំបូងនៃការមានផ្ទៃពោះ អ័រម៉ូន (អ័រម៉ូនអឺស្ត្រូសែន ប្រូសេស្តេរ៉ូន ប្រូឡាក់ទីន និងអ័រម៉ូនដទៃទៀត) បានធ្វើឲ្យសុដន់ម្តាយមានការផ្លាស់ប្តូរ។ ការផ្លាស់ប្តូរទាំងនោះមានដូចជាការឈឺ ហើម ក្បាលសុដន់ និងជុំវិញក្បាលសុដន់ឡើងពណ៍ខ្មៅ។ សញ្ញាមួយទៀតដែលអាចឲ្យអ្នកដឹងគឺនៅជុំវិញក្បាលសុដន់មានការឡើងដុំពកតូចៗ ហើយវានឹងរីកធំទៅៗដែលអ្នកអាចសម្គាល់ឃើញបាន។ នៅខាងក្នុងខ្លួនមានក្រពេញទឹកដោះ ជាលិកាទ្រទ្រង់ និងខ្លាញ់ដែលសុទ្ធតែជាផ្នែកធ្វើឲ្យសុដន់ឡើងធំដែលសំដៅលើរូបរាង និងទំហំនៃសុដន់។

ការបង្កើតសុកអាចធ្វើឲ្យមានរំញោចក្នុងការបញ្ចេញអ័រម៉ូនអេស្ត្រូសែន និងប្រូសេស្តេរ៉ូដែលជម្រុញដល់ប្រព័ន្ធជីវសាស្រ្តស្មុគស្មាញ – ដែលធ្វើឲ្យមានការផលិតទឹកដោះក្នុងខ្លួន។

២- ដំណើរការផលិតទឹកដោះ

នៅពេលដែលទារកក្នុងផ្ទៃអាយុ ៦សប្ដាហ៍នឹងមានបំពង់មួយបានកើតឡើងដើម្បីដឹកជញ្ជូនទឹកដោះទៅសុដន់ បំពង់នោះនឹងនៅស្ងៀមរហូតដល់អ្នកពេញវ័យ ដើម្បីរង់ចាំអ័រម៉ូនអេស្ត្រូសែនធ្វើឲ្យវាលូតលាស់។ នៅពេលមានផ្ទៃពោះក្រពេញដោះនឹងចាប់ផ្តើមធ្វើការ។ ពេលដែលទារកកើតជាលិកាដែលនៅក្នុងសុដន់អ្នកបានពង្រីកខ្លួនយ៉ាងខ្លាំងដែលធ្វើឲ្យសុដន់បន្ថែមទម្ងន់និមួយៗ ជិត ៧០០ក្រាម ជាមូលហេតុដែលធ្វើឲ្យម្តាយគ្រប់រូបមានអារម្មណ៍ថាសុដន់ខ្លួនឯងធ្ងន់ ២ ឬ ៣ ថ្ងៃក្រោយពេលសម្រាលកូន។

៣- ប្រភពទឹកដោះ

អ័រម៉ូនប្រូឡាក់ទីនអនុញ្ញាតបំពង់ទឹកដោះតូចៗទាញយកប្រូតេអ៊ីន ស្ករ និងជាតិខ្លាញ់ពីចរន្តឈាមដើម្បីផលិតទឹកដោះ។ ប្រព័ន្ធបំពង់ទឹកដោះបានវិវត្តន៍ពេញលេញក្នុងត្រីមាសទី ២ ។ ទឹកដោះនឹងផលិតក្នុងរយៈពេល ៤៨ ទៅ ៩៦ ម៉ោងក្នុងកំឡុងពេលសំរាល។ នៅពេលដែលសុកបានធ្លាក់ចេញមកក្រៅនោះអ័រម៉ូនអេស្ត្រូសែននិងប្រូសេស្តេរ៉ូននឹងធ្លាក់ចុះខណៈពេលដែលអ័រម៉ូនប្រូឡាក់ទីនកើនឡើងដែលធ្វើឲ្យមានការផលិតទឹកដោះជាច្រើនដើម្បីបំបៅដល់កូន។

៤- របៀបដែលទឹកដោះហូរចេញពីម្តាយទៅកូន

នៅពេលដែលបៅអ័រម៉ូនអុកស៊ីតូស៊ីននិងប្រូឡាក់ទីនបានបញ្ចេញទៅក្នុងចរន្តឈាម។ នៅពេលដែលទឹកដោះបានចូលដល់ក្នុងសុដន់ អុកស៊ីតូស៊ីននឹងផ្តល់សញ្ញាកោសិកាផលិតទឹកដោះដែលនៅជុំវិញដោះអ្នកឲ្យមានការកន្រ្តាក់ និងច្របាច់។ ការហូរទឹកដោះ និងសម្ពាធនៃការហូរគឺកើតឡើងដោយការបៅរបស់ទារក ហើយទឹកដោះនឹងហូរចូលក្នុងមាត់កូនអ្នកដោយផ្ទាល់។

៥- ភាពមិនស្រួលក្នុងពេលបំបៅដោះកូន គួរបារម្ភទេ?

ពីរបីថ្ងៃដំបូងនៃការបំបៅដោះកូនអ្នកម្ដាយអាចឈឺក្នុងស្បូន។ ការមិនស្រួលនេះគឺបណ្តាលមកពីអ័រម៉ូនអុកស៊ីតូស៊ីនកំពុងជួយឲ្យស្បូន ត្រឡប់មកទំហំធម្មតាវិញ។ អុកស៊ីតូស៊ីនក៏ជួយម៉ាក់ៗ ឲ្យមានអារម្មណ៍ស្ងប់ស្ងៀម ពេញចិត្ត និងរំភើបនៅពេលដែលបំបៅកូន។ អារម្មណ៍នេះកើតឡើងមានន័យថា អ្នកបានបំបៅកូនបានល្អត្រឹមត្រូវ។

អត្ថបទពាក់ព័ន្ធ៖

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញដើម្បីស្វែងយល់ពីដំណោះស្រាយរបស់អ្នក។ Hello Health Group មិនចេញ វេជ្ជបញ្ជា មិនធ្វើរោគវិនិច្ឆ័យ ឬការព្យាបាលជូនទេ៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ ចាន់ សុខឡាង · កែ 31/05/2019