ប៉ាម៉ាក់ទើបមានកូនដំបូងប្រហែលជាអាចមានចម្ងល់ដែរថាតើកូនយំមានន័យអ្វីខ្លះ គួរឲ្យបារម្ភឬយ៉ាងណា? កូនតូចមិនទាន់ចេះនិយាយមែន តែកូនក៏មានវិធីបង្កើតទំនាក់ទំនងជាមួយប៉ាម៉ាក់បានដែរ។ តើមានអ្វីខ្លះ? ប៉ាម៉ាក់គួរជួយកូនបែបណា?

១. យំ

យំ គឺជាមធ្យោបាយទំនាក់ទំនងដំបូងបំផុតរបស់ក្មេង។ គិតចាប់ពីពេលកើតមកភ្លាម កូនមានវិធីដ៏មានប្រសិទ្ធភាពមួយដើម្បីប្រាប់ពីអារម្មណ៍ និងការគិតរបស់ពួកគេតាមរយៈការយំនេះឯង។

កូនយំអាចព្រោះគេចង់ប្រាប់ថាត្រូវការអ្វីមួយ ដូចជាការលួងលោម ឃ្លាន អស់កម្លាំង រងា ឬក្ដៅពេក ជាដើម។ យ៉ាងណា ក៏មានដែរ ក្មេងខ្លះទៀតយំដោយមិនមានមូលហេតុច្បាស់លាស់។

២. របៀបកូនចាប់ផ្ដើមនិយាយ

កូនតូចរបស់ប៉ាម៉ាក់ ពិតជាបានទទួលនូវព័ត៌មានអំពីពាក្យត្រូវនិយាយជាច្រើនគិតតាំងពីពេលកើតមក។ កូនអាចគ្រាន់តែស្ដាប់ប៉ាម៉ាក់ និងមើលពេលប៉ាម៉ាក់និយាយ ក៏គេអាចយល់ពីមូលដ្ឋាននៃវិធីទាក់ទងគ្នាដែរ។

ឧទាហរណ៍ ក្មេងមិនទាន់ចេះនិយាយអាចប្រើភ្នែកដើម្បីទាក់ទងជាមួយប៉ាម៉ាក់ ដោយអាអូនអាចសម្លឹងទៅកាន់ភ្នែក ឬមាត់របស់ប៉ាម៉ាក់។ ដូចគ្នាដែរ កូនក៏ចាប់ផ្ដើមរៀនស្ដាប់នូវពាក្យពេចន៍យើងនិយាយ និងសំឡេងយើងបញ្ចេញផងដែរ។

នៅវ័យប្រហែលជា៧ទៅ៨សប្ដាហ៍ កូនអាចចាប់ផ្ដើមបញ្ចេញសំឡេង មួយចំនួនដែលប៉ាម៉ាក់អាចសង្កេតដឹងបាន។ នៅពេលកូនកាន់តែចម្រើនវ័យជាងនេះ គេក៏ចាប់ផ្ដើមបង្កើតសំឡេងកាន់តែច្រើនបែបដែរ និងបន្ទាប់មកក៏ចាប់ផ្ដើមចេះញញឹម និងវាសដៃ ជើងចុះឡើងជាដើម។

៣. ជំរុញកូនឲ្យនិយាយ

ពេលកូនយើងវ័យកាន់តែច្រើនខែ ពេលមិនគេង គេអាចត្រូវការលេងច្រើន បង្កើតទំនាក់ទំនងច្រើនជាមួយអ្នកនៅជុំវិញ។ នៅពេលឃើញកូនហាក់ចង់និយាយស្ដីជាមួយ ប៉ាម៉ាក់គួរ៖

បង្ហាញក្ដីត្រេកអរ ផ្ដល់ភាពកក់ក្ដៅ និងនាំកូននិយាយ
បង្ហាញទម្រង់ទឹកមុខផ្សេងលេងជាមួយកូន
និយាយពីអ្វីមួយដែលកូនបានចង្អុលទៅកាន់
បក់ដៃដាក់កូនចុះឡើង បើកូនបញ្ចេញសញ្ញាបក់ដៃដាក់យើង

ប៉ាម៉ាក់មួយចំនួនបាននិយាយជាមួយកូន ទាំងដែលកូនមិនឆ្លើយតបជាមួយ តែថាការធ្វើដូចនេះមិនមានអ្វីខុសនោះទេ ការនិយាយជាមួយកូនកាន់តែច្រើន នឹងជួយកូនឲ្យរៀនពីវិធីទាក់ទងជាមួយមនុស្សជុំវិញកាន់តែច្រើនដែរ។

រឿងដែលសំខាន់ ប៉ាម៉ាក់ត្រូវបង្ហាញក្ដីស្រឡាញ់ដល់កូន លេងជាមួយកូន បង្ហាញការពេញចិត្តក្នុងការនិយាយជាមួយកូន នាំឲ្យកូននិយាយ ដែលអ្វីទាំងនេះជាការបង្រៀនកូនលើជំនាញនិយាយដែរ។

៤. បារម្ភរឿងកូនមិនចេះនិយាយ?

ក្មេងម្នាក់ៗមានកម្រិតនៃការលូតលាស់ខុសៗគ្នា។ ក្មេងខ្លះអាចប្រើភ្នែក និងសំឡេង បង្កើតទំនាក់ទំនងបានលឿន ខណៈក្មេងខ្លះទៀតត្រូវការពេលរហូតដល់អាយុបីខែក៏មាន។ ដូចនេះ មិនមានអ្វីគួរឲ្យបារម្ភពេកទេបើកូនយើងមិនចេះធ្វើកាយវិការណាមួយដូចក្មេងអាយុស្របាលគ្នានោះ។

អ្វីដែលសំខាន់ និងត្រូវចាំនោះ គឺថាក្មេងអាចមានភាពខុសគ្នាក្នុងការបង្ហាញអារម្មណ៍របស់ខ្លួន។ ក្មេងខ្លះចូលចិត្តនិយាយច្រើន តែក្មេងខ្លះបែរជាស្ងាត់ស្ងៀមទៅវិញ។

ប៉ុន្តែពេលខ្លះភាពយឺតយ៉ាវក្នុងការមានទំនាក់ទំនងជាមួយអ្នកនៅជុំវិញខ្លួន ក៏អាចបង្ហាញពីសញ្ញានៃជំងឺខ្វះការលូតលាស់ឬការលូតលាស់យឺត មានផ្នែកភាសា ពិបាកស្ដាប់ ខ្សោយបញ្ញា និងមានជំងឺអូទីស្សឹម។ ដូចនេះហើយ មានតែប៉ាម៉ាក់ផ្ទាល់ទេដែលអាចដឹងថាកូនមានការលូតលាស់ផ្នែកទំនាក់ទំនងយឺត និងគួរឲ្យបារម្ភកម្រិតណា។ បើមានក្ដីបារម្ភបែបនេះ ត្រូវពិគ្រោះជាមួយគ្រូពេទ្យទើបជាការប្រសើរ។

កូនតូចបង្កើតទំនាក់ទំនងជាមួយប៉ាម៉ាក់ តាមវិធីទាំងនេះ

១. យំ​

២. របៀប​កូន​ចាប់​ផ្ដើម​និយាយ​

៣. ជំរុញ​កូន​ឲ្យ​និយាយ​

៤. បារម្ភ​រឿង​កូន​មិន​ចេះ​និយាយ?

១. យំ

២. របៀបកូនចាប់ផ្ដើមនិយាយ

៣. ជំរុញកូនឲ្យនិយាយ

៤. បារម្ភរឿងកូនមិនចេះនិយាយ?