អាយុ ៤១ សប្តាហ៍៖ អាអូនផ្តើមយល់ពាក្យមួយចំនួន ហាមនិយាយភាសាក្មេងតបទៅកូន

ការលូតលាស់ និងអាកប្បកិរិយា

ក្នុងសប្តាហ៍នេះ កូនយើងចាប់ផ្តើមយល់នូវពាក្យធម្មតាមួយចំនួនហើយ ដូចនេះយើងគួរតែព្យាយាមនិយាយជាមួយអាអូនឲ្យបានច្រើនតាមដែលអាចធ្វើទៅបាន។ យើងគួរបង្ហាត់កូនដោយនិយាយតាមពាក្យគេបាននិយាយ ឬពាក្យមនុស្សពេញវ័យប្រើ។ ឧទាហរណ៍ ពួកគេនិយាយ “បាៗ’ យើងអាចនិយាយជាមួយកូន ដូចជា “កូន! កូនចង់បានដបទឹកដោះគោមែន?’។ ដើម្បីឲ្យការវិវត្តរបស់កូនបានល្អប្រសើរយើងមិនគួរប្រើពាក្យសម្តីរបស់ទារកតបទៅកូនទេ។ ទោះបីពេលខ្លះយើងមានអារម្មណ៍ថាដូចមនុស្សឆ្កួតក៏ដោយ ក៏គួរតែព្យាយាមលើកទឹកចិត្តកូនតូចក្នុងការនិយាយដោយឆ្លើយតបទៅវិញរហូត។

នៅអាទិត្យដំបូងនៃខែទី ១០ នេះ កូនយើងអាច ៖

អាយុ ៤១ សប្តាហ៍៖ អាអូនផ្តើមយល់ពាក្យមួយចំនួន ហាមនិយាយភាសាក្មេងតបទៅកូន

– ឈរដោយតោងដោយខ្លួន

– ទាញអ្វីមួយដើម្បីក្រោកឈរ

– បដិសេធ ប្រសិនយើងយកប្រដាប់លេងចេញ

– និយាយពាក្យ “ម៉ាម៉ា’ ឬ “ដាដា’

– ចេះលេងបិទពួន

– ផ្លាស់ប្តូរកាយវិការជាមួយយើង។

១- បង្រៀនកូនដោយរបៀបណា?

ការទាក់ទងជាមួយកូនយើងជាប់រហូតជាវិធីមួយដែលល្អបំផុតសម្រាប់ការលូតលាស់ ដូចនេះយើងត្រូវប្រាប់កូននូវឈ្មោះវត្ថុជុំវិញខ្លួនម្តងមួយម្តងមួយ ដើម្បីឲ្យកូនបានស្គាល់។ វិធីល្អបំផុតយើងអាចបង្រៀនកូនតាមរយៈការសម្តែង ដូចនេះកូនអាចដឹងពីពាក្យ ឬឃ្លាសំខាន់ៗបានលឿន។ តែហាមដាច់ខាតណាម៉ាកប៉ា កុំនិយាយជាមួយកូនជាភាសាកូនក្មេងឲ្យសោះ។

សុខភាព និង សុវត្ថិភាព

២- ពិគ្រោះជាមួយពេទ្ររឿងអីខ្លះ?

ជាទូទៅក្នុងខែនេះ គ្រូពេទ្យមិនណាត់ជួបយើងទេ ប៉ុន្តែហោចណាស់យើងគួរតែទាក់ទងពេទ្យភ្លាមៗ បើមានការបារម្ភរឿងអ្វីមួយ មិនថាបញ្ហាសុខភាពយើង ឬក៏កូននោះទេ។

៣- ត្រូវដឹងពីអីខ្លះ?

ធ្លាប់ឮចាស់ៗនិយាយរឿងខ្មោចសង្កត់អត់? គ្មានខ្មោចឯណាមកសង្កត់ទេគឺសំដៅលើការឈប់ដកដង្ហើមបណ្តោះអាសន្នពេលគេង។ បញ្ហានេះមកពីមានរបស់អ្វីមួយស្ទះផ្លូវដង្ហើមកូន ការរីកប៉ោងនៃសាច់បំពង់ក ធ្លាក់ថ្គាម រហែកក្រអូមមាត់ ឬប្រព័ន្ធប្រសាទវិវត្តមិនទាន់ពេញលេញជាដើម។ ចំពោះបេប៊ីមានបញ្ហាខួរក្បាល ឬជំងឺ Down Syndrome (ក្មេងកើតមកមិនប្រក្រតី) អាចប្រឈមខ្ពស់នឹងបញ្ហានេះ។

អំឡុងគេងកូនអាចស្រម៉ុកឮ ក្អក ពិបាកដកដង្ហើម រសេះរសោះ បែកញើសខ្លាំង ឬងើបច្រើនដងពេលយប់។ បើគ្មានការព្យាបាលទេ បញ្ហានេះអាចនាំឲ្យមានផលវិបាកដល់ជំងឺបេះដូង និងសសៃឈាមបេះដូង។

ការព្រួយបារម្ភ

៤- រឿងអ្វីខ្លះត្រូវបារម្ភ?

នៅសប្តាហ៍នេះ អាអូននឹងមានទម្លាប់មួយចំនួនដូចជាការងក់ក្បាល ឬរមៀលជាដើម ដែលនេះបង្ហាញថាកូនអាចស្គាល់ ឬធ្វើតាមចង្វាក់អ្វីមួយដូចជាញាក់ខ្លួន ឬស្មា។ ភ្លាមៗយើងមិនអាចបង្ខំកូនឲ្យបោះចោលនូវទម្លាប់ទាំងនេះបានទេ ប៉ុន្តែយើងអាចធ្វើតាមវិធីមួយចំនួនដើម្បីសម្រួលដល់យើង និងកូនទៅនឹងទម្លាប់នេះ៖

– ឱ្យកូនអង្គុយលេង និងងក់ក្បាល

– ឲ្យញាក់នៅលើកៅអីអាចរង្គើបាន

– ឲ្យកូនលេងជាមួយវត្ថុដែលអាចបង្កើតសំឡេង

– ឱ្យកូនអ្នកលេងឲ្យបានច្រើននៅពេលថ្ងៃ

– បង្កើតទម្លាប់ការគេងឲ្យទៀងទាត់

– កុំទាន់ដាក់កូនចុះក្រោម បើកំពុងរង្គើក្នុងអង្រឹង។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ Chorn Sophearom · កែ 23/01/2019