អំឡុងពេលកូនដល់អាយុអាចញ៉ាំអាហាររឹងបាន វាមានសារសំខាន់ណាស់ក្នុងការផ្ដល់អាហារបំប៉នចាំបាច់ដល់កូនតូច។ ពិតណាស់ កង្វះសារធាតុចិញ្ចឹមណាមួយ អំឡុងពេលនេះ អាចជះឥទ្ធិពលមិនល្អ ដល់ការលូតលាស់របស់ក្មេងនាពេលអនាគត។ នៅពេលដែលអាអូនមានអាយុ៦ខែ ពួកគេត្រូវការអាហារបំប៉ន រួមជាមួយនឹងទឹកដោះម្ដាយ ដើម្បីទទួលបានថាមពលច្រើន និងជួយសម្រួលដល់ការអភិវឌ្ឍ និងការលូតលាស់ថែមទៀតផង។
សារធាតុចិញ្ចឹមសំខាន់ៗទាំង៤ សម្រាប់កូនអាយុ៦ខែឡើង
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ដូច្នេះហើយ ម៉ាក់ៗគប្បីបញ្ចូលសារធាតុចិញ្ចឹមសំខាន់ៗទាំងនេះ ទៅក្នុងរបបអាហាររបស់កូន នៅពេលដែលអាអូនអាយុបាន៦ខែ។
អត្ថន័យពណ៌ និងរូបរាងលាមកទារក នៅទីនេះ
១. កាល់ស្យូម
តម្រូវការកាល់ស្យូមប្រចាំថ្ងៃសម្រាប់កូន គឺយ៉ាងហោចណាស់៥០០មិល្លីក្រាម។ ភាគច្រើន តម្រូវការកាល់ស្យូមត្រូវបានបំពេញតាមរយៈទឹកដោះម្ដាយ ឬម្សៅទឹកដោះគោ។ វាជួយដល់ការអភិវឌ្ឍន៍ឆ្អឹង និងធ្មេញ ព្រមទាំងជួយឲ្យបញ្ចៀសការបាក់ឆ្អឹង នៅពេលដែលក្មេងចាប់ផ្ដើមចេះរត់លេង។ យ៉ាងណាមិញ ម៉ាក់ៗក៏អាចបន្ថែមកាល់ស្យូមទៅក្នុងរបបអាហាររបស់កូន ដូចជាទឹកដោះគោជូរ ទឹកក្រូចស្រស់ និងឈីសជាដើម នៅពេលកូនកាន់តែធំ។
២. អូមេហ្គា៣
ជាក់ស្ដែង អូមេហ្គា៣មិនត្រឹមតែមានអត្ថប្រយោជន៍យ៉ាងច្រើនចំពោះមនុស្សពេញវ័យនោះទេ វាក៏ផ្ដល់គុណប្រយោជន៍ដ៏អស្ចារ្យសម្រាប់ក្មេងៗដូចគ្នា។ ត្រីសាល់ម៉ុន និងផ្លែប័រគឺជាប្រភពនៃអូមេហ្គា៣។ ម៉ាក់ៗក៏អាចបំពេញអូមេហ្គា៣ដល់កូន ដោយញ៉ាំវា និងបញ្ជូនទៅឲ្យកូនតាមរយៈទឹកដោះម្ដាយ។ អូមេហ្គា៣មានសារសំខាន់ណាស់ សម្រាប់ការអភិវឌ្ឍខួរក្បាល និងភ្នែក។
៣. ជាតិដែក
ជាមួយគ្នានេះដែរ ជាតិដែកមិនត្រឹមតែផលិតHemoglobin និងផ្ដល់បរិមាណអុកស៊ីសែនគ្រប់គ្រាន់ដល់បេះដូងប៉ុណ្ណោះទេ វាក៏មានតួនាទីសំខាន់ក្នុងការបង្កើនការចងចាំ និងអភិវឌ្ឍខួរក្បាលថែមទៀតផង។ ជាធម្មតា ទារកកើតមកមានជាតិដែកគ្រប់គ្រាន់សម្រាប់រយៈពេល៤ ទៅ៥ខែ។ ប៉ុន្តែ បន្ទាប់ពីនោះ ពួកគេត្រូវការបំពេញជាតិដែកតាមរយៈតម្រូវការប្រចាំថ្ងៃនៃរបបអាហារចំនួន១១មិល្លីក្រាម។ អាហារដែលសំបូរទៅដោយជាតិដែក មានដូចជា ស្ពៃពួយឡេង ស៊ុត ដំឡូងបារាំង និងសណ្ដែកសៀង។ល។
៤. វីតាមីនផ្សេងៗ
វីតាមីនសំខាន់ៗដូចជា វីតាមីនA B C D E និងK មានគុណប្រយោជន៍ជួយដល់ការលូតលាស់ និងការអភិវឌ្ឍរបស់ក្មេងប្រកបដោយសុខភាពល្អ។ វីតាមីនA ដែលមាននៅក្នុងដំឡូងជ្វា ការ៉ុត និងផ្កាខាត់ណាបៃតង ជំនួយសុខភាពស្បែក និងភ្នែក។ រីឯវីតាមីនD ដែលមាននៅក្នុងទឹកដោះគោ ត្រីសាល់ម៉ុន ឬតៅហ៊ូ ជួយធ្វើឲ្យឆ្អឹងរឹងមាំ។ ចំណែកឯវីតាមីនC ដែលមានសារធាតុប្រឆាំងនឹងអុកស៊ីតកម្មខ្ពស់ អាចការពារក្មេងពីជំងឺផ្សេងៗ ដូចជារាក់ស៊ីធ្មេញ ហើយវាមាននៅក្នុងអាហារសម្រាប់ទារកដូចជាផ្លែក្រូច ផ្លែស្រ្តបឺរី និងប៉េងប៉ោះជាដើម។
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម