ជាទូទៅ ក្រោយពីកើតភ្លាម ក្រសួងសុខាភិបាលតម្រូវឲ្យទារកគ្រប់រូបទទួលបានវ៉ាក់សាំងផ្សេងៗ ដើម្បីការពារសុខភាព និងជួយឲ្យអាអូនលូតលាស់បានល្អ បង្ការការកើតជំងឺផ្សេងៗ។ តើម៉ាក់ប៉ាមានធ្លាប់ឆ្ងល់ទេថា ក្រោយកើតចេញមកហើយ នៅអាយុប៉ុណ្ណេះ អាអូនត្រូវចាក់វ៉ាក់សាំងថ្នាក់ជាតិអ្វីខ្លះ?

ទាក់ទងនឹងការចាក់វ៉ាក់សាំងនេះ លោកស្រីវេជ្ជបណ្ឌិត កុសល កណិការ បានឲ្យដឹងថា បន្ទាប់ពីសម្រាលចេញមកហើយនោះ ទារកទាំងអស់ត្រូវទទួលបានវ៉ាក់សាំងថ្នាក់ជាតិ ៧លើក ដែលគិតចាប់តាំងពីអាអូនទើបនឹងកើត រហូតដល់អាយុ១ឆ្នាំកន្លះ ដែលវ៉ាក់សាំងទាំងនោះមានវ៉ាក់សាំងការពារជំងឺដូចជា៖

លើកទី១៖ ទើបកើតមុន ២៤ម៉ោង ចាក់វ៉ាក់សាំងការពារ ជំងឺរលាកថ្លើមប្រភេទB និងជំងឺរបេង
លើកទី២ ៣ និងទី៤ ៖ អាយុ ១ខែកន្លះ-៣ខែកន្លះ ចាក់វ៉ាក់សាំងការពារ ជំងឺគ្រុនស្វិតដៃជើង រលាកថ្លើមប្រភេទB ក្អកមាន់ ខាន់ស្លាក់ តេតាណូស រលាកសួត និងរលាកស្រោមខួរក្បាល
លើកទី៥៖ អាយុ ៦ខែ អាអូនត្រូវចាក់វ៉ាក់សាំងការពារ ជំងឺកញ្ជ្រឹល និងជំងឺស្អូច
លើកទី៦ និងទី៧៖ អាយុ ៩ខែ ដល់១៨ខែ ឬ១ឆ្នាំកន្លះ ចាក់វ៉ាក់សាំងការពារ ជំងឺកញ្ជ្រឹល ស្អូច និងរលាកខួរក្បាល។

វេជ្ជបណ្ឌិតឯកទេសជំងឺកុមាររូបនេះបានណែនាំម៉ាក់ប៉ាគ្រប់រូបឲ្យពិនិត្យមើលពេលវេលា និងប្រភេទវ៉ាក់សាំងទៅតាមកម្មវិធីជាតិដែលត្រូវចាក់ឲ្យកូនឲ្យបានច្បាស់លាស់។ ក្រៅពីវ៉ាក់សាំងថ្នាក់ជាតិរៀបរាប់ខាងលើ ម៉ាក់ប៉ាក៏អាចបន្ថែមវ៉ាក់សាំងក្រៅកម្មវិធីជាតិឲ្យកូនបានដែរ ដោយត្រូវមានការពិគ្រោះ និងណែនាំពីគ្រូពេទ្យជំនាញត្រឹមត្រូវ។

បន្ថែមពីលើនេះ លោកស្រីវេជ្ជបណ្ឌិតបញ្ជាក់ថា ក្រោយចាក់វ៉ាក់សាំងរួច អាអូនអាចនឹងចេញសញ្ញាប្លែកមួយចំនួនដែលម៉ាក់ប៉ាមិនចាំបាច់បារម្ភពេកទេដូចជា ក្ដៅខ្លួន (ជាសញ្ញានៃការឆ្លើយតបរបស់ប្រព័ន្ធភាពស៊ាំទៅនឹងវ៉ាក់សាំង) ឈឺនៅកន្លែងចាក់ និងអាអូនអាចមិនស្រួលខ្លួន។ល។

វ៉ាក់សាំង

វ៉ាក់សាំងថ្នាក់ជាតិ ៧ លើក អាអូនទើបកើត ដល់អាយុ ១ឆ្នាំកន្លះត្រូវចាក់