ម៉ាក់ប៉ាមួយចំនួនអាចនឹងដឹងហើយថាជាតិស្ករផ្តល់ផលប៉ះពាល់យ៉ាងណាចំពោះកូន ចុះចំណែកអំបិលវិញ តើអំបិលអាចផ្តល់ប៉ះពាល់ដល់សុខភាពរបស់កូនដូចជាតិស្ករដែរឬយ៉ាងណា?
តិចនិកជួយម៉ាក់ៗ កាត់បន្ថយបរិមាណអំបិលក្នុងរបបអាហារកូន
ម៉ាក់ប៉ាមួយចំនួនអាចនឹងមិនទាន់ដឹងច្បាស់ពីផលប៉ះពាល់ដែលអំបិលមានទៅលើសុខភាពកូននៅឡើយនោះទេ។ អំបិលក៏ដូចជាស្ករដែរ នៅពេលកូនញ៉ាំអាហារដែលមានអំបិលច្រើនអាចបង្កឲ្យមានជំងឺលើសសម្ពាធឈាមដែលអាចបង្កើនហានិភ័យជំងឺបេះដូង និងជំងឺគ្រោះថ្នាក់សរសៃឈាមខួរក្បាលនៅពេលក្រោយ។ បើយោងតាមមជ្ឈមណ្ឌលប្រឆាំងជំងឺឆ្លងសហរដ្ឋអាមេរិក ក្មេងម្នាក់ក្នុងចំណោម៩នាក់គឺមានជំងឺលើសសម្ពាធឈាម។
១. វិធីកាត់បន្ថយអំបិលក្នុងរបបអាហារកូន
ដើម្បីសុខភាពរបស់កូន ម៉ាក់ប៉ាអាចបន្ថយបរិមាណអំបិលសម្រាប់កូនបានដោយអនុវត្តតាមប៉ុន្មានវិធីនេះ៖
- អានស្លាកសញ្ញា៖ ម៉ាក់ប៉ាគួរអានស្លាកសញ្ញាលើកញ្ចប់អាហារឲ្យបានច្បាស់ និងធ្វើការប្រៀបធៀបបរិមាណអំបិលក្នុងផលិតផលមួយទៅផលិតផលមួយទៀតរួចជ្រើសរើសយកផលិតផលណាដែលមានបរិមាណអំបិលតិច។ ម៉្យាងទៀត យកល្អគួរជ្រើសរើសអាហារស្រស់ និងចៀសវាងអាហារវេចខ្ចប់ស្រាប់។
- ចម្អិនអាហារដោយបន្ថយអំបិល៖ នៅពេលចម្អិនអាហារនៅផ្ទះ ម៉ាក់ប៉ាគួរកាត់បន្ថយអំបិល និងជ្រើសរើសគ្រឿងផ្សំផ្សេងដែលស្រស់ដូចជាគ្រឿងទេស និងខ្ទឹមសជាដើម។
- កាត់បន្ថយអាហារសម្រន់របស់កូន៖ យកល្អគួរបន្ថយបរិមាណអាហារសម្រន់របស់កូនដូចជានំដំឡូងកញ្ចប់ និងនំប្រៃជាដើម។ ម៉ាក់ប៉ាគួរឲ្យកូនញ៉ាំផ្លែឈើស្រស់ជំនួសវិញ។
អាហារមានជាតិអំបិលច្រើនក៏អាចបណ្ដាលឲ្យមានជំងឺធាត់លើកុមារដែរ។ ក្មេងដែលញ៉ាំបរិមាណអំបិលច្រើនត្រូវបានរាយការណ៍ថាច្រើនតែផឹកភេសជ្ជៈមានជាតិស្ករ និងកាឡូរីខ្ពស់ដែលអាចបង្កើនហានិភ័យជំងឺធាត់។
២. បរិមាណអំបិលកូនគួរញ៉ាំ
កម្រិតបរិមាណអំបិលដែលក្មេងត្រូវការទៅតាមអាយុមាន៖
- ១–៣ឆ្នាំត្រូវការអំបិល ២ក្រាមក្នុងមួយថ្ងៃ (ស្មើនឹងសូដ្យូម ០,៨ក្រាម)
- ៤–៦ឆ្នាំត្រូវការអំបិល ៣ក្រាមក្នុងមួយថ្ងៃ (ស្មើនឹងសូដ្យូម ១,២ក្រាម)
- ៧–១០ឆ្នាំត្រូវការអំបិល ៥ក្រាមក្នុងមួយថ្ងៃ (ស្មើនឹងសូដ្យូម ២ក្រាម)
- ១១ឆ្នាំឡើងទៅត្រូវការអំបិល ៦ក្រាមក្នុងមួយថ្ងៃ (ស្មើនឹងសូដ្យូម ២,៤ក្រាម)។
មានការណែនាំថាផលិតផលអាហារដែលមានជាតិសូដ្យូមច្រើនជាង ០,៦ក្រាមក្នុងអាហារ ១០០ក្រាម គឺចាត់ទុកថាមានបរិមាណអំបិលខ្ពស់ហើយ។ ម៉ាក់ប៉ាអាចគណនាបរិមាណអំបិលក្នុងអាហារដោយយកបរិមាណសូដ្យូមក្នុងអាហារមកគុណនឹង ២,៥។
ត្រួតពិនិត្យដោយ
ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខអត្ថបទដោយ ទូច សុខា · កែ 22/10/2024