ជំងឺគ្រុនឈាមភាគច្រើនកើតលើកូនក្មេង តែមនុស្សពេញវ័យ ឬចាស់ក៏កើតមានជំងឺនេះដែរ។ គ្រុនឈាមលើមនុស្សចាស់ និងកូនក្មេងមិនខុសគ្នានោះទេ វាបង្កឡើងដោយមូសខ្លាញីដែលមានមេរោគខាំយើង។

អ្វីដែលគួរព្រួយបារម្ភនោះ ប្រសិនមនុស្សធំកើតជំងឺគ្រុនឈាមនោះស្ថានភាពអាក្រក់ជាងក្មេងទៅទៀត។ ចំពោះមូលហេតុនេះ លោកវេជ្ជបណ្ឌិត ចាន់ ស៊ីណេត ឯកទេសជំងឺទូទៅ ថា មនុស្សធំដែលឆ្លងជំងឺគ្រុនឈាមក្តៅខ្លួនខ្លាំងជាងកូនក្មេង ឯកម្តៅនោះទៀតសោតមិនងាយនឹងធ្លាក់ចុះនោះទេ ធ្វើឲ្យកំហាប់ឈាមឡើងខ្ពស់ ងាយនឹងបែកគ្រាប់ឈាម ហូរឈាមនៅខាងក្នុងខ្លួន Shock (សម្ពាធឈាមធ្លាក់ចុះ ជីពចរខ្សោយ សរីរាង្គខ្លះខូច…) បើព្យាបាលមិនទាន់ពេលទេ នឹងគ្រោះថ្នាក់ដល់ជីវិត។

ចំពោះអ្នកដែលធ្លាប់កើតជំងឺគ្រុនឈាមពីមុនមក ហើយកើតជំងឺគ្រុនឈាមលើកទី២ ទី៣ នោះរឹតតែធ្ងន់ធ្ងរជាងអ្នកដែលធ្លាប់កើតពីមុនមក។ លោកវេជ្ជបណ្ឌិត ចាន់ ស៊ីណេត បញ្ជាក់។

អត្ថបទពាក់ព័ន្ធ៖៥ ចំណុចខ្លឹមៗទាក់ទងរឿងគ្រុនឈាម គ្រប់គ្នាត្រូវដឹង

វេជ្ជបណ្ឌិត ចាន់ ស៊ីណេត - ជំងឺហឺត — វេជ្ជបណ្ឌិត ចាន់ ស៊ីណេត ឯកទេសជំងឺទូទៅ

១- រោគសញ្ញានៃជំងឺគ្រុនឈាម

មិនថាមនុស្សចាស់ ឬកូនក្មេងនោះទេ នៅពេលមូសខ្លាញីដែលមានផ្ទុកមេរោគខាំ នឹងចេញរោគសញ្ញាមួយចំនួនខាងក្រោមនេះ។

– ក្តៅខ្លួន ៣៩-៤០ អង្សារសេ

– ឈឺក្បាល ប្រឡង់ភ្នែក

– ចង្អោរ ក្អួត

– ឈឺពោះ

– ឈឺសាច់ដុំ សន្លាក់ដៃជើង

– មុខក្រហម

– មានស្នាមអុចក្រហមលើស្បែក

– ហូរឈាមតាមអញ្ចាញធ្មេញ ឬស្បែក (ករណីធ្ងន់ធ្ងរ)។

បើយើងមានរោគសញ្ញាទាំងប៉ុន្មានខាងលើនេះ ពិសេសក្តៅខ្លួន ៣-៥ ថ្ងៃហើយប្រើថ្នាំបញ្ចុះកម្តៅមិនបាត់ ត្រូវប្រញាប់ទៅជួបគ្រូពេទ្យ។

២- វិធីបង្ការជំងឺគ្រុនឈាម

មូលហេតុនៃការកើតជំងឺគ្រុនឈាមរបស់មនុស្សធំ និងកុមារដូចគ្នា គឺមូសខ្លាញីខាំនៅពេលថ្ងៃ ដូច្នេះវិធីបង្ការក៏ដូចគ្នាដែរ។

– កុំនៅកន្លែងងឹត

– បំបាត់ជម្រកមូស

– គេងចងមុង

– ស្លៀកពាក់ខោអាវវែងៗ

– លាបក្រែម ឬបាញ់ស្ព្រៃយ៍ការពារខ្លួនពេលទៅកន្លែងមានមូស។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

កុំប្រហែស! គ្រុន​ឈាម​កើត​លើ​មនុស្ស​ចាស់ គ្រោះ​ថ្នាក់​ជាង​ក្មេង​​ទៅ​ទៀត

កុំប្រហែស! គ្រុនឈាមកើតលើមនុស្សចាស់ គ្រោះថ្នាក់ជាងក្មេងទៅទៀត