យើងក៏សង្កេតឃើញថាអ្នកស្លាប់ដោយសារជំងឺកូវីដ-១៩ កើនឡើងខ្ពស់ ដែលជាមធ្យមពី ២០ ទៅ ៣០នាក់ ក្នុង១ថ្ងៃ។ ហេតុអ្វីបានជាអ្នកជំងឺកូវីដ-១៩ ស្លាប់ច្រើនដូច្នេះ?
ជំទាវ ឱ វណ្ណឌីន លើកឡើង ៤ មូលហេតុបណ្តាលឱ្យអ្នកជំងឺកូវីដស្លាប់ច្រើន
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
លោកស្រី វេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបានបកស្រាយថា អ្នកជំងឺកូវីដស្លាប់ច្រើនដោយសារតែមូលហេតុសំខាន់ ៤យ៉ាង។
- ការភ្លេចខ្លួន៖ អ្នកជំងឺអាងថាបានចាក់វ៉ាក់សាំងហើយ ភ្លេចការពារខ្លួន ឬគិតថា អត់បានចេញក្រៅ តែភ្លេចគិតថាកូនចៅគាត់ចេញក្រៅ។ អាចនឹងភ្លេចការពារខ្លួន ហើយឆ្លងជំងឺកូវីដ ក៏ដូចជានាំជំងឺកូវីដ-១៩ ចូលផ្ទះ។
- ការមិនដឹងខ្លួន៖ អ្នកជំងឺមួយចំនួនមិនដឹងថា បានឆ្លងជំងឺកូវីដ-១៩ ទេ ជាពិសេសមនុស្សចាស់។ អ្នកមានវ័យច្រើនគិតថាជារឿងធម្មតា ព្រោះមនុស្សចាស់តែងតែឈឺច្រើនអ៊ឹចឹងហើយ។ ចាស់ៗច្រើនតែសម្រាកព្យាបាលនៅផ្ទះធម្មតា រហូតដល់មានបញ្ហាផ្លូវដង្ហើម ទើបស្ទុះស្ទារកគ្រូពេទ្យ ឬទៅធ្វើតេស្ត។ ពេលនោះវីរុសវាយលុកនៅក្នុងសរីរាង្គរបស់ខ្លាំងទៅហើយ ដូច្នេះក្រុមគ្រូពេទ្យមិនអាចជួយសង្រ្គោះបានទេ ហេតុនេះបានជាអ្នកជំងឺខ្លះមិនទាន់ទៅដល់ពេទ្យផងក៏ស្លាប់បាត់ទៅហើយ ខណៈមួយចំនួនទៀតទៅពេទ្យមួយរយៈខ្លីប៉ុណ្ណោះក៏ស្លាប់។
- វ័យ៖ ដោយសារអ្នកជំងឺកូវីដ-១៩ មានវ័យចាស់ រាងកាយ ក៏ដូចជាប្រព័ន្ធសុំាខ្សោយ បូកផ្សំជំងឺប្រចាំកាយទៀត ជំងឺនេះងាយនឹងវិវឌ្ឍលឿនហើយបណ្ដាលឱ្យបាត់បង់ជីវិត។
- វីរុសបំប្លែងថ្មី៖ វីរុសបំប្លែងថ្មីមានការឆ្លងលឿន វិវឌ្ឍលឿន គ្រោះថ្នាក់ និងពិបាកគ្រប់គ្រងជាងវីរុសដែលមិនមែនបំប្លែងខ្លួន។ បច្ចុប្បន្ននេះវីរុសបំប្លែងថ្មីអាល់ហ្វា (Alpha) បានឆ្លងចូលសហគមន៍ហើយ ម៉្យាងទៀតក៏មានការនាំចូលវីរុសបំប្លែងថ្មីឌែលតា (Delta) ដែរ។
លោកជំទាវបានបន្តថា ការចាក់វ៉ាក់សាំងបង្ការជំងឺកូវីដ-១៩ គ្រាន់តែអាចអាចការពារយើងកុំឱ្យធ្លាក់ខ្លួនឈឺធ្ងន់ធ្ងរ នៅពេលឆ្លងជំងឺ និងកាត់បន្ថយការព្យាបាលនៅមន្ទីរពេទ្យប៉ុណ្ណោះ មិនអាចការពារយើងពីការឆ្លងជំងឺកូវីដ-១៩ ១០០% បានទេ។ ដូច្នេះយើងមិនត្រូវភ្លេចខ្លួន ឬធ្វេសប្រហែសក្នុងការការពារខ្លួនទេ ដោយសម្អាងថាបានចាក់វ៉ាក់សាំងហើយ។ យើងត្រូវប្រកាន់យកនូវវិធានការការពារ ហើយអនុវត្តឱ្យបានត្រឹមត្រូវនូវវិធាន ៣ កុំ និង ៣ ការពារ គួបផ្សំនឹងការចាក់វ៉ាក់សាំង។ ជាពិសេសបើសង្ស័យថាខ្លួនមានជំងឺកូវីដ ត្រូវធ្វើតេស្តភ្លាម។ លើសពីនេះទៅទៀតយើងត្រូវចេះថែរក្សាសុខភាពផ្ទាល់ខ្លួន ព្រោះបើប្រព័ន្ធការពាររាងកាយរបស់យើងខ្សោយ យើងងាយនឹងឆ្លងជំងឺកូវីដណាស់ ហើយធ្វើឱ្យពិបាកក្នុងការព្យាបាល។
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម