មូលហេតុទាំងនេះ ធ្វើឱ្យកើតជំងឺពកក ឬក្រពេញទីរ៉ូអ៊ីតរីកធំ

    មូលហេតុទាំងនេះ ធ្វើឱ្យកើតជំងឺពកក ឬក្រពេញទីរ៉ូអ៊ីតរីកធំ

    ជំងឺពកកកើតឡើងនៅពេលក្រពេញទីរ៉ូអ៊ីតរីកធំខុសធម្មតា។ ក្រពេញ​ទីរ៉ូអ៊ីត​គឺជាក្រពេញតូច​មួយ​ដែល​មានរាងដូចមេអំបៅស្ថិតនៅខាងមុខក និងនៅពីក្រោមគ្រាប់ពោន។ តើជំងឺពក ក កើត​ឡើង​ដោយ​សារមូលហេតុអ្វី?

    ជំងឺពក ក បណ្តាលមកពីមូលហេតុទូទៅមួយចំនួនដូចជា៖

    ១. កង្វះជាតិអ៊ីយ៉ូត

    ក្រពេញទីរ៉ូអ៊ីតប្រើប្រាស់ជាតិអ៊ីយ៉ូតដើម្បីផលិតអ័រម៉ូនទីរ៉ូអ៊ីត។ នៅពេលរាងកាយ​យើងខ្វះ​ជាតិ​អ៊ីយ៉ូត ក្រពេញទីរ៉ូអ៊ីតធ្វើការលើសកម្រិតដើម្បីផលិត​អ័រម៉ូនទីរ៉ូអ៊ីតបន្ថែម។ ជាលទ្ធផលក្រពេញ​ទីរ៉ូអ៊ីត​រីកធំដែលបណ្តាលឱ្យយើងកើតជំងឺពកក។ ជាតិអ៊ីយ៉ូតមាននៅក្នុងទឹកសមុទ្រ ក្នុងដីនៅ​តំបន់​ឆ្នេរ និង​ក្នុងអំបិលដែលបានបន្ថែមជាតិអ៊ីយ៉ូត។

    ២. ក្រពេញទីរ៉ូអ៊ីតសកម្មជ្រុល

    ពេលខ្លះជំងឺពកកអាចកើតដោយសារក្រពេញទីរ៉ូអ៊ីតផលិតអ័រម៉ូនទីរ៉ូអ៊ីតច្រើនពេក។ អង្គបដិប្រាណ​ដែលផលិតដោយប្រព័ន្ធភាពស៊ាំបានវាយប្រហារក្រពេញទីរ៉ូអ៊ីតដែលបណ្តាលឱ្យវាផលិតអ័រម៉ូន thyroxine លើស ជាលទ្ធផលក្រពេញទីរ៉ូអ៊ីតហើម។

    ៣. ជំងឺ Hashimoto

    ជំងឺ Hashimoto គឺជាជំងឺប្រព័ន្ធភាពសុំា​ដែលអង្គបដិប្រាណផលិត​ដោយប្រព័ន្ធភាពស៊ាំវាយ​ប្រហារ​ក្រពេញទីរ៉ូអ៊ីតដែលធ្វើឱ្យក្រពេញទីរ៉ូអ៊ីតផលិត​អ័រម៉ូនទីរ៉ូអ៊ីតតិច។ ដូច្នេះក្រពេញភីតូរីសផលិតអ័រម៉ូន TSH បន្ថែមដើម្បីរំញោចក្រពេញទីរ៉ូអ៊ីតក្នុងការផលិតអ័រម៉ូនទីរ៉ូអ៊ីតបន្ថែម និងបណ្តាលឱ្យ​ក្រពេញ​ទីរ៉ូអ៊ីត​រីកធំ។

    ៤. ការមានដុំពកតូចៗនៅក្រពេញទីរ៉ូអ៊ីត

    លក្ខខណ្ឌនេះក៏បណ្តាលឱ្យក្រពេញទីរ៉ូអ៊ីតរីកធំដែរ។

    ៥. មហារីកក្រពេញទីរ៉ូអ៊ីត

    មហារីកក្រពេញទីរ៉ូអ៊ីតធ្វើឱ្យក្រពេញទីរ៉ូអ៊ីតរីកធំ។

    ៦. ការមានផ្ទៃពោះ

    អ័រម៉ូន chorionic gonadotropin (HCG) ដែលរាងកាយផលិត​នៅពេលស្រ្តី​មានផ្ទៃពោះ​អាចធ្វើឱ្យ​ក្រពេញ​ទីរ៉ូអ៊ីតរីកធំបន្តិច។

    ចង់គណនាទម្ងន់ស្រ្តីពពោះ ចុចទីនេះ!

    ៧. ជំងឺរលាកក្រពេញទីរ៉ូអ៊ីត

    ជំងឺនេះបណ្តាលឱ្យមានការឈឺចាប់ និងហើមនៅក្នុងក្រពេញទីរ៉ូអ៊ីត និងបណ្តាល​ឱ្យរាងកាយ​ផលិត​អ័រម៉ូន thyroxine ច្រើន ឬតិចពេក។

    រលាកក្រពេញទីរ៉ូអ៊ីត

    ជំងឺពកកមានអាការៈ និងរោគសញ្ញាដូចខាងក្រោម តែមិនមែនជំងឺ​ពកក​​​ទាំងអស់​សុទ្ធតែ​បង្កឱ្យ​មាន​អាការៈនិងរោគសញ្ញាទេ៖

    • ហើម កផ្នែកខាងមុខ និងនៅក្រោមគ្រាប់ពោន
    • តឹងក្នុងបំពង់ក
    • ក្អក
    • មានសំឡេងស្អក
    • ពិបាកលេបអាហារ
    • ពិបាកដកដង្ហើម
    • វិលមុខពេលលើកដៃឡើងខ្ពស់ផុតក្បាល

    ជាទូទៅជំងឺពកកកើតឡើងលើស្រ្តីច្រើនជាងបុរស និងកើតលើស្រ្តីដែលមាន​វ័យចាប់ពី ៤០​ ឆ្នាំ​ឡើង​ទៅ។ ប្រសិនបើដុំពកកតូច នឹងមិនបង្កផលរំខាន គ្រូពេទ្យអាចសម្រេចចិត្តមិនព្យាបាល។ ទោះបី​យ៉ាង​ណាក៏ដោយអ្នកដែលមានជំងឺពកកត្រូវតាមដានស្ថានភាពដុំពកកឱ្យជាប់លាប់។

    Hello Health Group និង “Hello គ្រូពេទ្យ” មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

    រូបថត​របស់​អ្នក​និពន្ធbadge
    ដោយ សុខ វណ្ណ កែសម្រួល​ចុងក្រោយ 19/10/2021
    ត្រួតពិនិត្យដោយ វេជ្ជ. ចាន់ ស៊ីណេត