ក្រោយពីធ្វើការពេញមួយថ្ងៃ យើងគ្រប់គ្នាពិតជាមានអារម្មណ៍ថាហត់ និងចង់សម្រាក។ ប៉ុន្តែនៅពេលចូលគេង យើងពិបាកក្នុងការគេងឲ្យបានលក់ ហើយនៅពេលគេងលក់វិញ បែរជាភ្ញាក់ក្រោយពីគេងបានប៉ុន្មានម៉ោង និងមិនអាចគេងលក់ម្ដងទៀតទៅវិញ។ ការណ៍នេះអាចមកពីរបបអាហារមិនត្រឹមត្រូវដែលមិនមានសារធាតុចិញ្ចឹមរាងកាយត្រូវការក្នុងការដំណើរការរបស់រាងកាយ។ អត្ថបទនេះនឹងបង្ហាញគ្នាយើងពីវីតាមីន និងរ៉ែសំខាន់ៗ៧ប្រភេទដែលជួយឲ្យគ្នាយើងគេងលក់ស្រួល និងបង្កើនថាមពលដល់រាងកាយផងដែរ។
១. វីតាមីន D
អ្នកជំនាញជឿថាវីតាមីន D មិនមែនជាវីតាមីនទេ តែជាអ័រម៉ូនដែលរាងកាយផលិតក្រោមជំនួយពីពន្លឺព្រះអាទិត្យ។ ការវិភាគទៅលើការសិក្សាជាច្រើនបានចេញផ្សាយនៅ មជ្ឈមណ្ឌលព័ត៌មានជាតិស្ដីពី បច្ចេកវិទ្យាជីវសាស្ត្ររបស់អាមេរិក (National Center for Biotechnology Information) បានរកឃើញថាកង្វះវីតាមីន D មានទំនាក់ទំនងខ្ពស់នឹងហានិភ័យបញ្ហាក្នុងការគេង ហើយអ្នកដែលទទួលបានវីតាមីន D តិចជាង ២០ណានូក្រាម(ng)/មីល្លិលីត្រ អាចបង្កើនហានិភ័យបញ្ហាក្នុងការគេង។យើងអាចទទួលបានវីតាមីន D ពីអាហារបំប៉ន និងពន្លឺព្រះអាទិត្យ។ អាហារដែលមានវីតាមីន D មានស៊ុត ត្រីសាល់ម៉ុន ត្រីធូណា និងផ្សិត។
២. វីតាមីន E
ការសិក្សាឆ្នាំ២០១១ ពីឥទ្ធិពលរបស់វីតាមីន E ទៅលើការការពារប្រព័ន្ធប្រសាទបានបង្ហាញថាវីតាមីន E អាចបង្ការការគេងមិនគ្រប់គ្រាន់ដែលអាចបង្កឲ្យការចងចាំចុះខ្សោយ ក៏ដូចជារក្សាលំនឹងសកម្មភាពសារធាតុអុកស៊ីតកម្មនៅផ្នែក hippocampus នៅក្នុងខួរក្បាលនៅពេលគេងមិនគ្រប់គ្រាន់។ បន្ថែមពីនេះទៀត វីតាមីន E គឺជាសារធាតុប្រឆាំងអុកស៊ីតកម្មដែលការពារជាលិកាពីពពួករ៉ាឌីកាល់សេរី និងដើរតួនាទីជួយរក្សាសុខភាពឲ្យល្អពេលចាស់ទៅ។ វីតាមីននេះក៏ជួយរក្សាប្រព័ន្ធភាពស៊ាំឲ្យខ្លាំង និងសំខាន់សម្រាប់ការផលិតកោសិកាគ្រាប់ឈាមក្រហម រួមទាំងជួយរាងកាយក្នុងការប្រើប្រាស់វីតាមីន K។ គ្រាប់ផ្កាឈូករ័ត្ន និងគ្រាប់អាល់ម៉ុងសុទ្ធតែមានវីតាមីន E។
៣. វីតាមីន B
វីតាមីន B មាន៨ប្រភេទដែលសំខាន់សម្រាប់សុខភាព។ ការសិក្សាបានបង្ហាញថាប្រភេទវីតាមីន B ដូចជាវីតាមីន B3 B5 B6 B9 និងB12 អាចជួយសម្រួលដល់ការផ្គត់ផ្គង់ Tryptophan ដែលជួយរាងកាយផលិតអ័រម៉ូនមេឡាតូនីន (Melatonin)។ អ័រម៉ូនមេឡាតូនីន (Melatonin) ជាអ័រម៉ូនធ្វើឲ្យយើងងងុយគេង។ ដើម្បីឲ្យរាងកាយទទួលបានវីតាមីន B យើងអាចញ៉ាំពពួកគ្រាប់ធញ្ញជាតិ (whole grain) សាច់ បន្លែ និងផ្លែឈើ។
៤. កាល់ស្យូម និងម៉ាញ៉េស្យូម
អ្នកជំនាញជាច្រើនបានណែនាំឲ្យញ៉ាំសារធាតុទាំងពីរនេះមុនចូលគេងព្រោះសារធាតុទាំងពីរនេះមានតួនាទីក្នុងការកន្ទ្រាក់សាច់ដុំ និងការបន្ធូរអារម្មណ៍។ អ្នកជំនាញជឿថាការខ្វះកាល់ស្យូម និងម៉ាញ៉េស្យូមអាចបង្កឲ្យមានការរំខានដល់ដំណេកនៅពេលយប់ ហើយកាល់ស្យូមត្រូវធ្វើការជាមួយ Tryptophan (អ័រម៉ូនដែលទាក់ទងនឹងការងងុយគេង) ដើម្បីផលិតអ័រម៉ូនមេឡាតូនីនជួយក្នុងការគេង។ ការគេងមិនល្អក្នុងករណីធ្ងន់ធ្ងរអាចជារោគសញ្ញាដំបូងនៃកង្វះជាតិម៉ាញ៉េស្យូម។ របបអាហារដែលសំបូរដោយបន្លែបៃតង និងគ្រាប់ធញ្ញជាតិអាចជួយឲ្យទទួលបានកាល់ស្យូម និងម៉ាញ៉េស្យូមគ្រប់គ្រាន់។
៥. អាស៊ីតអាមីណូ Theanine
អាស៊ីតអាមីណូ Theanine មានក្នុងស្លឹកតែ ជាពិសេសគឺតែបៃតង និងប្រភេទផ្សិតមួយចំនួន។ អាស៊ីតអាមីណូ Theanine អាចជួយជំរុញដល់សារធាតុគីមីនៅក្នុងខួរក្បាលដូចជា dopamine GABA និងserotonin ដែលសុទ្ធតែជួយដល់ការគេង។ ម៉្យាងទៀត អាស៊ីដអាមីណូ Theanine អាចបន្ថយកម្រិតគីមីនៅក្នុងខួរក្បាលដែលកំពុងមានសកម្មភាពឥទ្ធិពលផ្សេងៗ។ អ្នកជំនាញជឿថាTheanine អាចជួយបង្កើនភាពងងុយ និងជួយឲ្យគេងលក់លឿន ក៏ដូចជាជួយឲ្យគុណភាពនៃដំណេកកាន់តែល្អ។ ដូចបានលើកឡើងខាងលើ យើងអាចទទួល អាស៊ីតអាមីណូTheanine បានពីតែបៃតង។
៦ ជាតិដែក
រោគសញ្ញាទីមួយដែលបង្ហាញកម្រិតជាតិដែកក្នុងឈាមទាបគឺអស់កម្លាំង និងការរំខានដំណេក។ កម្រិតជាតិដែកទាបគឺជាកត្តាហានិភ័យមួយនៃរោគសញ្ញាជើងនៅមិនស្ងៀមដែលអាចរំខានដល់ដំណេក ហើយក៏អាចបង្កអារម្មណ៍ថប់បារម្ភធ្វើឲ្យពិបាកក្នុងការគេងដែរ។ ដើម្បីជួយរាងកាយក្នុងស្រូបយកជាតិដែកបានល្អ វីតាមីន C អាចជួយបាន។ អាហារដែលសំបូរដោយជាតិដែកមានសាច់គោ អយស្ទើរ សាច់មាន់ សណ្ដែក តៅហ៊ូ ដំឡូងបារាំងដុត គ្រាប់ស្វាយចន្ទី និងបន្លែពណ៌បៃតងជាដើម។
៧. អាស៊ីតអាមីណូ Tryptophan
ការសិក្សាជាច្រើនបានបង្ហាញថាអាស៊ីតអាមីណូ Tryptophan អាចធ្វើឲ្យងងុយគេង និងជួយឲ្យគេងលក់លឿន។ យើងអាចទទួលបានអាស៊ីតអាមីណូនេះពីគ្រាប់ធញ្ញជាតិ សាច់មាន់ ទឹកដោះគោ ស្ពៃពួយឡេង ស៊ុត និងត្រីសាល់ម៉ុន។
អត្ថបទពាក់ព័ន្ធ៖
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕