អំឡុងពេលពពោះ ដោយសារសុខភាពខ្សោយ អាចបង្កឲ្យស្រីៗ រងឥទ្ធិពលពីជំងឺមួយចំនួន ហេតុនេះគប្បី រក្សាសុខភាពឲ្យបានល្អ ដើម្បីត្រៀមសម្រាលបេប៊ី គួរឲ្យស្រលាញ់ដោយសុវត្ថិភាព។ ចុះមានធ្លាប់ឮជំងឺទី៥ ពេលពពោះអត់? ជាជំងឺអ្វីឲ្យប្រាកដ? គ្រោះថ្នាក់ដល់ម៉ាក់ៗ និងគភ៌អត់?

១- អ្វីជាជំងឺទី ៥?

ជំងឺទី៥ បណ្តាលមកពីមេរោគ HPV ប្រភេទ B19 ហើយឆ្លងតាមរយៈការក្អក កណ្តាស់ ឬប៉ះពាល់សារធាតុរាវចេញពីរាងកាយ គ្នាយើងមានផ្ទុកមេរោគ។ ជំងឺនេះ ជាធម្មតាមានអាការៈស្រាល នឹងជាដោយខ្លួនឯងដោយ មិនចាំបាច់ព្យាបាលនោះទេ ខណៈស្រីពពោះភាគច្រើន មានជំងឺនេះ នៅតែអាចសម្រាលកូនមានសុខភាពល្អបាន។

២- ជំងឺនេះមានរោគសញ្ញាអ្វីខ្លះ?

គ្នាយើងមានជំងឺនេះ អាចមានរោគសញ្ញា ដូចជា ឈឺសន្លាក់ រយៈពេល ៤-៥ ថ្ងៃ ដល់ច្រើនសប្តាហ៍ ដោយមាន ក្តៅខ្លួន ឈឺក្បាល ឈឺក និងកន្ទួលក្រហមនៅថ្ពាល់ ជើង ក្បាលពោះ និងក។

៣- ធ្វើរោគវិនិច្ឆ័យដោយរបៀបណា?

ដើម្បីធ្វើរោគវិនិច្ឆ័យ យើងត្រូវធ្វើតេស្តឈាមសម្រាប់ការបង្ករោគ ទោះបីជាមានកណ្ទួលរមាស់ ឬអត់ក៏ដោយ។ នៅពេលគ្រូពេទ្យរកឃើញយើងមានជំងឺ គាត់នឹងផ្តោតសំខាន់លើទារកក្នុងផ្ទៃ។ ក្រៅពីនេះ បើចាំបាច់ អាចត្រូវសុំពិនិត្យអេកូនៅចន្លោះសប្តាហ៍ទី ៨-១២។

ការធ្វើតេស្តជួយរកពីផលវិបាកនៃការពពោះ បើអេកូបង្ហាញពីសញ្ញាទារកឈឺ ពេទ្យនឹងណែនាំឲ្យធ្វើតេស្ត ១-២ ទៀត ដោយការចោះស្រោមទឹកភ្លោះ ឬសុក ដើម្បីរកការបង្ករោគ និងភាពធ្ងន់ធ្ងរនៃជំងឺ។

អត្ថបទពាក់ព័ន្ធ៖

អាថ៌កំបាំងស្រីៗមិនធា្លប់ដឹង ឲ្យនាំត្រីមាសទីបីនៃការពពោះជាពេលវេលាសំខាន់បំផុត
អាការៈសំខាន់ ស្រី្តពពោះជួបនៅត្រីមាសទី៣ កៀកថ្ងៃសម្រាល

៤- ផលវិបាករបស់ជំងឺទី ៥ អំឡុងពេលពោះ

ជំងឺនេះ អាចបង្កជាផលវិបាកលើស្រីៗពេលមានផ្ទៃពោះ ប៉ុន្តែអត្រាមានប្រហែលត្រឹម ៥% ប៉ុណ្ណោះ។ ជំងឺស្លេកស្លាំង ជាផលវិបាកធំមួយចំពោះទារកក្នុងផ្ទៃ។ បើទារកខ្វះឈាមក្រហម អាចនាំឲ្យខ្វះអុកស៊ីហ្សែន សម្រាប់លូតលាស់រាងកាយ។ ករណីមួយចំនួន មិនធ្ងន់ធ្ងរ និងអាចតាមដានសុខភាពក្រោយសម្រាល។ បើទារកស្លេកខ្លាំង គេអាចកើតជំងឺ Hydrops សំដៅលើការចាល់ជាតិទឹកខុសប្រក្រតីនៅក្នុងរាងកាយ ធ្វើឲ្យមានជំងឺខូចបេះដូងពីកំណើត និងអាចស្លាប់។ ដើម្បីសង្គ្រោះទារក គ្រូពេទ្យនឹងបញ្ចូលឈាមនៅពេលទារកស្ថិតនៅក្នុងស្បូននៅឡើយ។ បើទារកមានជំងឺនេះនៅត្រីមាសទី ៣ ត្រូវជំរុញសម្រាលឲ្យបានលឿន។

៥- ជំងឺនេះអាចទប់ស្កាត់បានទេ?

មកដល់ពេលនេះ មិនទាន់មានអ្នកជំនាញណា អាចបង្កើតវ៉ាក់សាំងបង្ការជំងឺនេះនៅឡើយទេ ដូច្នេះយើងត្រូវទប់ស្កាត់វាពីដំបូង។ ដើម្បីចៀសផុត ត្រូវបិទមាត់ពេលកណ្តាស ឬក្អក លាងដៃជាមួយសាប៊ូ និងទឹកក្តៅជាប្រចាំ ចៀសវាងប៉ះពាល់សារធាតុរាវពីរាងកាយមានផ្ទុកជំងឺនេះ។

ជំងឺទី ៥ អំឡុងពេលពពោះ ជាជំងឺអ្វី? គ្រោះថ្នាក់ដែរអត់?